མདོ་བ་དགོན་བསམ་གཏན་གླིང་ནི། རབ་བྱུང་བཅུ་གཉིས་པའི་དཀྱིལ་ཡས་མས་སུ། སྤྱི་ལོ་ ༡༧༢ ༠ ཡས་མས་ཤིག་ཏུ་ཁུང་རག་ཟེར་བའི་ལུང་བར། གཉན་རྩེ་དཔོན་སློབ་ཀྱིས་བཏབ་པ། དགའ་ལྡན་པ་བློ་བཟང་དཔལ་འབྱོར་གྱིས་སྤོས་པར་བཤད། རྒྱུད་ཀྱི་འདོན་ཆ་དང་ཆོས་སྤྱོད་བསྐང་གསོ་རྣམས་བཙུགས། གཉན་རྩེ་དཔོན་སློབ་མཆོག་གིས་དགོན་འདི་ཆོས་རྒྱལ་ལ་གཉེར་དུ་གཏད་པས་ཚ་ཁོ། མགོ་ལོག་གི་མི་འགས་གཙེས་པ་ལ་རྟགས་མཚན་མངོན་སུམ་དུ་བསྟན། ལྕགས་མཁར་ཟུར་བཅུ་དྲུག་པ་བཙུགས། དགའ་ལྡན་པ་ངག་དབང་རིན་ཆེན་དང༌།བྱང་ཆུབ་དབང་རྒྱལ་གཉིས་ཀྱིས་ཀྱང་བསྐྱངས། མདོ་བ་ཡར་འཕེལ་ཚང་ཞེས་པའི་དགེ་སློང་བསམ་གྱིས་མི་ཁྱབ་པ་ཞིག་བྱོན་པ་དེ་ཉིད་ཚེ་དང་སྒྲུབ་པ་སྙོམས་པར་མཛད། ཨ་མཆོག་འཇམ་དབྱངས་མཁྱེན་རབ་རྒྱ་མཚོས་ཐོག་མའི་ཡོངས་འཛིན་དུ་བསྟེན་པར་བཤད། ཆུང་ངུའི་དུས་ནས་འབུ་སྲིན་ཕྲ་མོ་ཡན་ཆོད་ཀྱི་སྲོག་ལ་མི་འཇིགས་པའི་སྦྱིན་པས་སྐྱོབས་པ་དང༌། དགེ་བའི་བཤེས་གཉེན་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན། ཁོང་གི་བླ་མའི་སྐུ་བརྙན་ནང་བཞུགས་སྐུ་འབུམ་ཕྱག་དཔལ་མཛད་པ་དེར། དུས་བཟང་རྣམས་སུ་དྲི་བཟང་འཐུལ་བ་སོགས་ངོ་མཚར་བ་ཤིན་ཏུ་མང་། དེ་ལ་ཕྱག་དང་བསྐོར་བ་བྱེད་པ་མཐའ་ཡས་པ་བྱུང་དང་འབྱུང་བཞིན་ཡོད་པ་རྣམས་ཀྱི་ནད་གདོན་སྡིག་སྒྲིབ་དག་སྦྱངས་ཏེ་འབྲེལ་ཚད་དོན་ལྡན་དུ་བྱེད། ཁོང་སྐུ་འདའ་ཁར་ངས་ཚེ་གང་བོར་དམན་ས་བཟུང་དྲག་འདུག་མ་གཏོགས་ཅུང་ཟད་སྤྱོད་པ་སྤྲོས་ནའང་གཞན་ལ་ཕན་ཆེ་བར་མཐོང་སྟེ་ཚེ་འདིར་ཁོང་ལ་སྤྲུལ་པ་གསུམ་ཡོད་པའི་གཅིག་བཤན་པའི་ལུས་བཟུང་བས་སྲོག་བཅད་ཚད་དག་པའི་ཞིང་དུ་འཁྲིད་པ་དང་། གཅིག་བུད་མེད་སྨད་བཙོང་མའི་ལུས་བཟུང་བ་ལ་འབྲེལ་ཚད་དག་པའི་ཞིང་དུ་འཁྲིད་པ་གཉིས་ད་ལྟ་ཁོང་ལ་འཐིམ་འདུག འོན་ཀྱང་འབྲེལ་ཚད་དང་སྐུ་ཁང་འདི་ལ་འབྲེལ་ཚད་འཁོར་བ་མཐའ་ཅན་དུ་འགྱུར་ངེས་ཡིན་གསུངས་ནས་སྐུ་འདས། ད་ལྟའི་དུས་སུའང་ཁོང་གི་མཚན་ཐོས་པ་སུ་ཡིན་གྱི་རྒྱུད་ལ་དད་པ་ངང་གིས་བསྐྱེད་ནུས་པ་ཞིག་གོ། ད་ལྟ་གཉན་རྩེའི་མཆོག་སྤྲུལ་འཇམས་དབྱངས་ཆོས་འཕེལ་དཔལ་བཟང་བོས་བརྩེ་བས་བསྐྱངས་བཞིན་གདན་ས་དེར་ལྷག་ལྷ་དུ་མའི་བསྙེན་སྒྲུབ་བྱེད་བཞིན་བཞུགས་སོ། །ཆོས་རྒྱལ་གྱི་བྲིས་སྐུ་སོགས་བྱིན་རྟེན་མང་དུ་མཆིས་སོ། །