དཀར་ཆེན་བྱམས་པ་གླིང་ནི་མཚན་སྒྲོགས་མཁན་པོ་ཡོན་ཏན་གྲགས་པས་ཕྱག་འདེབས་མཛད། དགོན་འདིའི་ལོ་རྒྱུས་བསྡུས་པ་ཞིག་ལ། སྤྱི་ལོ་༡༣༥༠ ལོར་གསར་འདེབས་བྱས་ཞེས་བྲིས་ཀྱང་། མཁན་ཆེན་འདི་བ་༡༦༨༤ ལོར་འཁྲུངས་པར་གསུངས་པ་དང་། སྤྲོ་ཚིགས་དགོན་ ༡༧༤༩ ལོར་བཏབ་པར་བཤད་པ་ལྟར་ན་འདིའི་ཡས་མས་ཞིག་ཏུ་བཏབ་པར་མངོན། དེ་ནས། ཨ་མཆོག་ངག་དབང་བརྩོན་འགྲུས། འཚམས་ཚ་ངག་དབང་ཤེས་རབ། ཨ་མཆོག་བླ་མ་བློ་བཟང་དཔལ་འབྱོར། སྔགས་རམས་པ་བློ་བཟང་ཡོན་ཏན། དགེ་བཤེས་བསོད་ནམས་ཆོས་འཕེལ། འདི་གཉིས་གོ་བསྣོལ་སའང་ཡོད། ཆོས་འབྱུང་ལས་རབ་འབྱམས་པ་ཆོས་འབྱོར་རྒྱ་མཚོ། བསོད་ནམས་ལྷུན་འགྲུབ། དགེ་བཤེས་བསོད་ནམས་ཆོས་གྲགས་ཀྱིས་བསྐྱངས་ཞེས་དང་། ལོ་རྒྱུས་ལས་ཨ་མཆོག་རིན་པོ་ཆེ་དཀོན་མཆོག་བསྟན་པའི་རྒྱལ་མཚན། ཨ་མཆོག་རིན་པོོ་ཆེ་འཇམ་དབྱངས་མཁྱེན་རབ་རྒྱ་མཚོ། ཨ་མཆོག་རིན་པོ་ཆེ་བློ་བཟང་ཐུབ་བསྟན་འཕྲིན་ལས་མཁྱེན་རབ་མཚོ། སང་ཚང་རིན་པོ་ཆེའཇམ་དབྱངས་ཚོགས་གཉིས་རྒྱ་མཚོ། སྨན་པ་ཨ་ལགས་རྣམས་ཀྱིས་བསྐྱངས། སྔགས་རམས་པ་ནི། ཨ་མཆོག་ངག་དབང་བརྩོན་འགྲུས་ཀྱིས་སྤྲུལ་སྐུ། སེ་ར་དང་རྒྱུད་ལ་ཞུགས། བདེ་མཆོག་གི་རྣལ་འབྱོར་བ། ལྷ་མོ་བྲན་དུ་འཁོར། དོན་གསུམ་ལ་འདས། ད་སྐབས་གྲྭ་གྲངས་བཞི་བཅུ་བཞུགས། རྟེན་གཙོ་བྱམས་པ། མཁའ་སྤྱོད་མ། རྒྱལ་བ་སེངྒེའི་ང་རོ། ཐུགས་རྗེ་ཆེན་པོ།ཆོས་རྒྱལ་སྐུ་པར་བྱིན་ཅན། ལྷ་མོའི་བྲིས་སྐུ་བྱིན་ཅན། ཙནྟན་འཇིགས་བྱེད་རང་བྱོན། ཆོས་རྒྱལ་གྱི་གྱན་ཐང་ཤངས་ཁྲག་འབབ་པའི་བྱིན་ཅན། རྗེ་བཀྲ་ཤིས་དོ་ཁ་མ། གསེར་ཟངས་ལས་གྲུབ་པའི་སྐུ་བཅུ་ལྷག སྐྱེས་རཔ་བཅས་ཞལ་ཐང་བརྒྱ་ལྷག བཀའ་བསྟན། ཡུམ། གསུང་འབུམ་སོགས་པོ་ཏི་མང་པོ་བཞུགས། བདེ་གསང་འཇིགས་གསུམ། མི་འཁྲུགས་པ། མཁའ་སྤྱོད་མ། ཀུན་རིག་རྣམས་ཀྱི་སྒྲུབ་མཆོད། བསྐང་གསོ། དངུལ་ལས་གྲུབ་པའི་ཕྲ་བརྒྱན་དུ་མ་ལྡན་པ། ཨ་མཆོག་གདུང་རྟེན་སོགས་བཞུགས། །