༄། །ལྷ་རྩེ་དགོན་སྔར་ཁྲོ་སྐྱབས་ཀྱི་ཁོངས་སུ་གཏོགས་ཤིང་། ད་ལྟའི་ཆར་གསེར་རྟ་རྫོང་གསེར་སྨད་ཀྱི་ཁོངས་སུ་ཆགས་ཡོད། ལྷ་རྩེ་ཞེས་པ་ནི་སྔོན་རྒྱལ་པོ་ཁྲི་སྲོང་ལྡེའུ་བཙན་སྐབས་མཐའ་མཚམས་སྲུང་བའི་དམག་དཔོན་ཆེན་པོ་བཻ་བཙན་ཏེ་ཆོས་རྒྱལ་མདོ་བཞེར་ནག་པོ་ཟེར་བའི་རུས་རྒྱུད་ལས་ཆད་པའི་ཚངས་དབང་ཡང་བཞེར་ནག་པོ་ལྷའི་མེ་ཏོག་གི་རིགས་རྒྱུད་དགུ་པ་རྒྱལ་པོ་མདུང་ནག་ཅན་དང་། དེ་ནས་རྒྱལ་རབས་བཅུ་བདུན་པ་གཡུང་དྲུང་ཁྲོ་རྒྱལ་གྱི་སྲས་གཡུང་དྲུང་མགོན་གྱི་ཡུམ་དབྱིངས་ཕྱུག་ལྷ་དང་། ནང་གི་གདུང་རབས་བཅུ་པ་རྒྱལ་པོ་སྟོབས་ལྡན་དབང་རྒྱལ་གཉིས་ལ་སྲས་མོ་འཕྲིན་ལས་དབང་མོ་ཟེར་བ་ཞིག་བྱུང་། དེ་བཞག་ར་ལྷ་རྩེ་དང་འཕྲད་པས་མངལ་ཆགས།
དེ་ནས་གདན་ཁྲི་དཀར་པོ་བཅུ་གསུམ་བརྩེགས་ཏེ་ལྷ་བསངས་སྔོན་པོ་དགུང་དང་མཉམ་པ་བཅས་བསངས་མཆོད་བྱེད་ཙ་ན་བཞག་ར་ལྷ་རྩེ་མངོན་སུམ་དུ་བྱོན་པ་ཀུན་གྱི་མངོན་སུམ་དུ་གྱུར། དེ་ནས་བཟུང་ལྷ་རྩེ་ཞེས་མཚན་ཐོགས་པ་ཡིན་འདུག །དེ་ནས་སྲས་ནམ་མཁའ་དཔའ་བརྟན་འཁྲུངས་ཤིང་དེ་རྒྱལ་སར་བཀོད་དེ་ལྷ་རྩེ་ཞེས་པ་ཡོངས་གྲགས་སུ་གྱུར། སྔོན་གནས་འདིར་བོན་གྱི་བླ་ཆེན་གཡུང་དྲུང་ཁྲོ་རྒྱལ་གྱིས་བཏབ་པའི་བོན་གྱི་དགོན་པ་ཞིག་ཡོད་པར་གྲགས་ཤིང་། དེའི་རྗེས་ཀྱི་རབ་བྱུང་ལྔ་པར་ས་ཆ་འདིར་ལྷ་རྩེ་ལོངས་སྐུ་དང་འཕྲིན་ལས་ཟེར་བའི་སྤུན་གཉིས་འཁྲུངས་ཤིང་རབ་ཏུ་བྱུང་ནས་དབུས་ཕྱོགས་སུ་བྱོན་ཏེ་བླ་མ་མང་པོ་བསྟེན་ཅིང་ལྷག་པར་ཀུན་མཁྱེན་ཀློང་ཆེན་རབ་འབྱམས་པ་ཁོང་བསྟེན་ནས་མདོ་སྔགས་རིག་གནས་སྤྱི་དང་གསང་བ་སྙིང་ཐིག་གི་གདམས་པ་ཡོངས་སུ་རྫོགས་པར་གསན་བཞེས་མཛད་ནས་རང་ཡུལ་དུ་ཕེབས། དེང་སང་གི་དགོན་པའི་རྒྱབ་རི་ལྷ་རྩེ་ཨ་དཀར་བྲག་ཏུ་བཞུགས་ནས་ཆོས་མང་དུ་གསུངས་ཤིང་གསེར་པའི་ཡུལ་གྲུ་ཐམས་ཅད་བན་ལུགས་སུ་བསྒྱུར། རབ་བྱུང་བཅུ་གཅིག་པར་གནས་འདིར་ལྷ་རྩེ་ཞེས་པའི་རིགས་སུ་པཎ་ཆེན་བི་མའི་རྣམ་སྤྲུལ་དུ་གྲགས་པའི་གཏེར་སྟོན་ཡེ་ཤེས་རྒྱལ་མཚན་ནམ་གསེར་པ་ཡེ་ཤེས་སེང་གེ་སྐུ་འཁྲུངས། ཁོང་གི་ཡབ་ནི་ཡུལ་འདིའི་རྒྱལ་པོ་ཡིན་པས་བུ་ལ་རྒྱལ་སྲིད་སྐྱོང་དགོས་པའི་བཀའ་སྩལ་ཀྱང་ཁོང་ནི་ཆུང་ངུའི་དུས་ནས་ཆོས་ལ་འཇུག་འདོད་ཀྱི་བསམ་པ་ཤུགས་དྲག་པོ་ཡོད་པས་ཐབས་སྣ་ཚོགས་ཀྱི་དབང་གིས་རབ་ཏུ་བྱུང་།
ཁམས་ཕྱོགས་སུ་ཕེབས་པའི་དགའ་ལྡན་ཁྲི་ཐོག་སོ་དྲུག་པ་ཀོང་པོ་བསྟན་འཛིན་ལེགས་བཤད་བཤེས་གཉེན་དུ་བསྟེན་ནས་མདོ་སྔགས་རིག་གནས་ཀུན་ལ་སྦྱངས་པར་མ་ཟད། དཔལ་ཡུལ་བསྟན་པའི་བདག་པོ་རིག་འཛིན་ཀུན་བཟང་ཤེས་རབ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ནས་ཐོས་བསམ་སྒོམ་གསུམ་ཡ་མ་བྲལ་བ་མཛད། གྲུབ་པའི་གོ་འཕང་མཐོན་པོར་གཤེགས་ཏེ་ཐུགས་ཟིན་གྱི་སློབ་མའི་གཙོ་བོ་ཀ་བཞིའི་ཡ་གྱལ་གསེར་པ་ཡེ་ཤེས་སེང་གེ་ཞེས་སྙན་གྲགས་རྒྱས་ཤིང་ངེས་དོན་གྱི་བསྟན་པའི་བདག་པོར་གྱུར།
རང་ཡུལ་དུ་ཕེབས་ནས་ལྷ་རྩེ་འདིར་གཙུག་ལག་ཁང་དང་དགེ་འདུན་གྱི་སྡེ་བཙུགས། མདོ་སྔགས་ཀྱི་ཆོས་མང་དུ་གསུངས་ནས་འཕྲིན་ལས་ཀྱི་སྙན་པ་ཕྱོགས་ཀུན་ཏུ་རྒྱས་ནས་སྐལ་ལྡན་གྱི་སློབ་མ་པད་མཚོར་ངང་པ་བཞིན་དུ་འདུས། སྔར་གཡུང་དྲུང་ཁྲོ་རྒྱལ་གྱི་དུས་ནས་ ༡༩༥༩ བར་ཁྲི་རབས་བཞི་བཅུ་སོང་བའི་ནང་ནས་ཁོང་ནི་ཁྲི་རབས་བརྒྱད་པ་ཡིན། གསེར་པ་ཡེ་ཤེས་ཁོང་གི་མཛད་འཕྲིན་ཕྱོགས་མཐར་ཀུན་ཏུ་རྒྱས་པའི་མཐུས་ད་ལྟའི་ཆར་རྒྱལ་རོང་ཁག་ཏུ་དགོན་ལག་མང་པོ་ཡོད་པར་མ་ཟད། རྒྱ་ནག་རི་བོ་རྩེ་ལྔ་དང། གླང་ཆེན་འགྱིང་རི། ཉི་ཧོང་སོགས་སུ་ཁོང་གི་ཆོས་བརྒྱུད་འཛིན་པའི་དགོན་པ་ཆེ་ཆུང་མང་པོ་ཡོད། སོག་ཡུལ་དུའང་བྱམས་སྤྲིན་བདེ་ཆེན་གླིང་སོགས་དགོན་ལག་མང་པོ་ཡོད།
༡༩༨༢ ལོའི་རྗེས་སུ་ལྷ་རྩེ་བླ་མ་ཨ་ལགས་དོན་ཡོད་དང་། གླང་རི་བླ་མ་པདྨ། མཁན་ཆེན་བློ་བཟང་ཚུལ་ཁྲིམས་སོགས་ཀྱིས་དབུ་ཁྲིད་ནས་དགོན་པ་སླར་གསོ་མཛད། སྔོན་འགྲོའི་ཁྲིད་རྒྱུན་དང་། གཞི་གསུམ་ཉམས་བཞེས། ཕུར་པའི་སྒྲུབ་མཆོད་སོགས་གསར་འཛུགས་བྱས། ༡༩༨༧ ལོར་ལྷ་རྩེ་སྐྱབས་མགོན་གདན་རབས་གསུམ་པ་ངག་དབང་ཀུན་དགའ་བསོད་ནམས་རིན་ཆེན་དགོན་འདིར་གདན་འདྲེན་ཞུས་ཏེ་གསེར་ཁྲིར་འཁོད་ནས་བློ་སྦྱོང་གི་སྐོར་དང་། ཐུན་མོང་ལམ་སྦྱོང་སྐོར། དམ་ཆོས་འདུལ་བའི་ཉམས་བཞེས་གཙོར་བཟུང་ནས་དབང་ལུང་མན་ངག་དང་བསྐྱེད་རྫོགས་ཀྱི་ཟབ་ཁྲིད་བཤད་གྲྭ་དང་སྒྲུབ་གྲྭ་སོགས་ཀྱི་ཁྲིད་གཞི་ཁག་སྔར་ཡོད་ཉམས་པ་མེད་པ་སླར་གསོ་དང་སྔར་མེད་གསར་འཛུགས་སོགས་བདག་སྐྱོང་བླ་ན་མེད་པ་མཛད་བཞིན་པ་བཅས་སོ།།
ལོ་རྒྱུས་འདི་དགོན་པ་རང་ངོས་ནས་མཁོ་སྤྲོད་གནང་བྱུང་བ་བཞིན་བཀོད་ཡོད། ༢༠༠༠ ལོ་ནས་ ༢༠༡༧ བར་དུ་དཀོན་མཆོག་ཐུབ་བསྟན་དང་ཐུབ་བསྟན་སྦྱིན་པ་སོགས་སོག་པ་འཇམ་དབྱངས་ཁང་ཚན་དུ་སྒྲིག་ཞུགས་གནང་ཡོད།།