༄། །དཔལ་ལྡན་བཀྲ་ཤིས་སྒོ་མང་དགའ་ལྡན་བཤད་སྒྲུབ་འཕེལ་རྒྱས་གླིང་ནི། ཕྱི་ལོ་ ༡༧༩༠ ལོར་མདོ་སྨད་རྔ་གཡང་ཕྱུག་མོར་སྟོད་སྨད་བར་གསུམ་དུ་ཕྱེ་བའི་སྟོད་ཀྱི་ས་ཆ་རུ་གནས་པའི་བཀྲ་ཤིས་ཆོས་ཐང་དུ་གྲགས་པའི་གནས་དེར། ཀུན་མཁྱེན་འཇམ་དབྱངས་བཞད་པ་སྐུ་ཕྲེང་གཉིས་པ་རྗེ་བཙུན་དཀོན་མཆོག་འཇིགས་མེད་དབང་པོ་མཆོག་གིས་ཕྱག་བཏབ། ཀུན་མཁྱེན་མཆོག་གིས་ཕྱག་བཏབ་ནས་འཕྲོ་སྐྱོང་ཞིང་དར་རྒྱས་སུ་མཛད་པ་པོ་ནི་གཞུང་ལུགས་རྒྱ་མཚོའི་མངའ་བདག་རྗེ་གུང་ཐང་སྐུ་ཕྲེང་གཉིས་པ་བསྟན་པའི་སྒྲོན་མེ་ཁོང་ཉིད་ཡིན་ལ། ཁོང་གིས་ཀུན་མཁྱེན་གཉིས་པའི་བཀའ་བཞིན་དགོན་སྡེ་འདི་གསར་དུ་འཛུགས་སྐབས། འགན་གཙོ་བོ་བཞེས་པས་བཀའ་དྲིན་ཤིན་ཏུ་ཆེ་བ་ཡིན་ནོ།།
དེ་ལྟར་དགོན་འདི་ཉིད་ཕྱག་བཏབ་ནས་ཕྱི་ལོ་ ༡༩༠༧ ལོར་ཞྭ་སེར་བསྟན་པའི་མངའ་བདག་ཀུན་མཁྱེན་སྐུ་ཕྲེང་བཞི་པ་རྗེ་བཙུན་སྐལ་བཟང་ཐུབ་བསྟན་དབང་ཕྱུག་མཆོག་གིས་རྨད་བྱུང་ཐོས་བསམ་གླིང་གསར་དུ་ཕྱག་བཏབ་པ་ཡིན་ལ། སྐབས་དེ་ནས་མཚན་ཉིད་གྲྭ་ཚང་ལ་བཤད་སྒྲུབ་འདུས་སྡེ་གླིང་དང་། རྒྱུད་པ་གྲྭ་ཚང་ལ་དགའ་ལྡན་བསླབ་གསུམ་ཟུང་འཇུག་བདེ་ཆེན་གླིང་དང་། ཚོགས་ཆེན་ལ་བཤད་སྒྲུབ་འཕེལ་རྒྱས་གླིང་ཞེས་མཚན་རིམ་གྱིས་གསོལ་བ་ཡིན་ནོ། །དེ་ནས་ཕྱི་ལོ་ ༡༩༥༥ ལོར་དཔལ་དུས་ཀྱི་འཁོར་ལོའི་མངའ་བདག་རྗེ་བཙུན་ཡེ་ཤེས་རྒྱ་མཚོ་དཔལ་བཟང་པོས་དུས་འཁོར་གྲྭ་ཚང་ཨེ་ཝཾ་ཆོས་འཁོར་གླིང་ཕྱག་འདེབས་མཛད་ནས་བླ་མེད་གསང་ཆེན་ཟབ་མོའི་བཤད་སྒྲུབ་འཕེལ་ཞིང་རྒྱས་པར་མཛད།
ཕྱི་ལོ་ ༡༩༥༨ ལོའི་ཟིང་འཁྲུག་གི་སྐབས་དང་བསྟུན་ཏེ་དགོན་པ་འདི་ཉིད་ལའང་གཏོར་བཤིག་ཚད་མེད་པ་བཏང་མཐར་ཕྱི་ལོ་ ༡༩༨༠ ལོ་ནས་རིམ་གྱིས་ཉམས་གསོ་བྱས་ཏེ་སྟོད་རྒྱུད་གྲྭ་ཚང་དང་ཐོས་བསམ་གླིང་གྲྭ་ཚང་གཉིས་སོར་ཆུད་པར་བྱས་ཡོད། ལོ་རབས་བརྒྱད་ཅུ་པ་ནས་ཆོས་སྡེ་ཆེན་མོ་འདི་ཉིད་བླ་མ་སྤྲུལ་བའི་སྐུ་དང་དགེ་བའི་བཤེས་གཉེན་སོགས་ཀྱི་བཀའ་དྲིན་ལས་ད་བར་དུ་ཆོས་སྡེ་འདི་ཉིད་ཡར་རྒྱས་སུ་སོང་བའི་རིམ་པ་གསུམ་ལས། དགེ་འདུན་པའི་སྡེ་འཕེལ་བ་དང་། ནང་འཆད་ཉན་གྱི་རིམ་པ། ཕྱིའི་རྟེན་བཞེངས་ཀྱི་རིམ་པ་སྟེ་གསུམ། ཁྲི་རབས་དང་པོ་གུང་ཐང་བསྟན་པའི་སྒྲོན་མེ་ནས་ཁྲི་རབས་ང་གཅིག་པ་ད་ལྟའི་ཁྲི་རིན་པོ་ཆེ་སྤྲུལ་བའི་སྐུ་ཨ་ལགས་ངག་དབང་སང་གི་བར་དུ་དགེ་འདུན་པའི་སྡེ་གོང་དུ་འཕེལ་ཏེ་ད་བར་སྟོང་ཕྲག་གཅིག་དང་ཉིས་བརྒྱ་ལ་ཉེ་བ་ཞིག་མཆིས་ལ། དེ་ཡང་གྲྭ་ཚང་གཉིས་ཀྱིས་བསྡུས་ཤིང་སྟོད་རྒྱུད་གྲྭ་ཚང་ལ་བཞི་བརྒྱ་ལྷག་དང་ཐོས་བསམ་གླིང་ལ་བདུན་བརྒྱ་ལྷག་བཞུགས་ལ་སྟོད་རྒྱུད་དུ་འཛིན་གྲྭ་གསུམ་དང་མཚན་ཉིད་ལ་འཛིན་གྲྭ་བཅུ་གསུམ་བྱས་ནས་བཞུགས་ཡོད།
གཉིས་པ་འཆད་ཉན་གྱི་རིམ་པ་ནི། སྟོད་རྒྱུད་གྲྭ་ཚང་གིས་རྒྱུད་སྡེ་བཞི་དང་གསང་བདེ་འཇིགས་གསུམ་གྱི་ཆོ་ག་བདག་འཇུག་དང་བཅས་པ། གར་ཐིག་དབྱངས་གསུམ་གཞལ་ཡས་ཁང་བློས་བསླངས་འདོན་རྟ་དབྱངས་དང་བཅས་པ་ལ་ཅི་ནུས་ཀྱིས་འབད་བཞིན་བཞུགས་ཤིང་། ཐོས་བསམ་གླིང་གིས་གཞུང་ཆེན་བཀའ་པོད་ལྔ་དང་གསང་བ་སྔགས་དང་བཅས་པ་ལ་ཐོས་བསམ་སྒོམ་གསུམ་གྱི་སྒོ་ནས་དུས་འདའ་བར་བྱས་ནས་བཞུགས་ཡོད།
གསུམ་པ་ཕྱིའི་རྟེན་བཞེངས་ཀྱི་རིམ་པ་ནི། འགྲོ་ཀུན་དད་པའི་ཞིང་སར་བཞེངས་པའི་རྟེན་མཆོག་ཏུ་གྱུར་པ་སྟེ་བྱང་ཆུབ་སེམས་དཔའ་ཆོས་འཕགས་ཀྱི་ཚེམས་གཙོ་བོར་གྱུར་པའི་རྟེན་འགངས་ཆེན་བགྲང་ལས་འདས་པ་བཞུགས་གནས་ཚོགས་ཆེན་འདུ་ཁང་ཆེན་མོ། ཀུན་མཁྱེན་སྐུ་ཕྲེང་གཉིས་པ་སྐྱབས་མཆོག་འཇིགས་མེད་དབང་པོའི་སྐུ་བརྙན་བདུད་རྩི་རང་འབབ་མ་སོགས་རྟེན་མཆོག་མང་པོ་བཞུགས་པའི་གནས་མཆོག་འདུ་ཁང་གོང་མ་དང་། འཇམ་མགོན་རྒྱལ་བ་གཉིས་པ་རྗེ་བླ་མ་ཙོང་ཁ་པ་ཆེན་པོའི་གདུང་རུས་འཁྲུལ་མེད་སོགས་བྱིན་རླབས་གཟི་འོད་འབར་བ་མང་པོ་བཞུགས་གནས་བྱང་ཆུབ་མཆོད་རྟེན་ཆེན་མོ་མཐོང་བ་དོན་ལྡན་དང་། དེ་མིན་ད་དུང་གསེར་གླིང་ངམ་སངྒ་ལ་ནས་གདན་དྲངས་པའི་རྟེན་མཆོག་སྟེ་བསྟན་པའི་བདག་པོ་ཐུབ་པ་སངས་རྒྱས་ཐུགས་རྗེ་ཅན་གྱི་རིང་སྲེལ་འཁྲུལ་མེད་དང་། ཇོ་བོ་རྗེ་དཔལ་ལྡན་ཨ་ཏི་ཤ་ཡི་ཆོས་སྣམ་ཆ་ཚང་སོགས་འཁྲུལ་བྲལ་རྟེན་གྱི་རིགས་ཁྱད་པར་འཕགས་པ་བགྲང་ལས་འདས་པ་བཞུགས་གནས་ཕོ་བྲང་ཡིད་དགའ་ཆོས་འཛིན་དང་། གཞན་ཡང་ངེས་དོན་རྒྱལ་བསྟན་སྤེལ་བའི་གནས་སམ་གཟུར་གནས་དྲན་དབང་མང་པོས་བསྟོད་བསྔགས་མེ་ཏོག་འཐོར་སའི་གནས་མཆོག་སྟེ་བློ་གསལ་རིག་སྨྲ་འབུམ་གྱི་བགོ་སྐལ་དུ་བཞེངས་པའི་མདོ་སྔགས་བཤད་སྒྲུབ་གླིང་དང་ནང་བསྟན་ཞིབ་འཇུག་ལྟེ་གནས་གླིང་དང་ཆོས་གྲྭ་གཉིས་སོགས་ལྷ་ཁང་འགའ་དང་བཅས་བཞུགས་སོ།།
ལོ་རྒྱུས་འདི་མདོ་ཁམས་འཇང་དགུན་ཆོས་གཙུག་ལག་སློབ་གཉེར་ཁང་གིས་དཔར་བསྐྲུན་བྱས་པའི་དགོན་པ་སོ་སོའི་ལོ་རྒྱུས་ལས་སྒོ་མང་དགོན་གྱི་ལོ་རྒྱུས་ཞེས་པ་ལས་ཚིག་སྣ་ཉུང་དུ་བཏང་ནས་ཟུར་འདོན་བྱས་ཏེ་བཀོད་པའོ། ། ༡༩༨༩ ནས་ ༢༠༡༧ བར་དུ་དགེ་བཤེས་བྱམས་པ་དཔལ་ལྡན་སོགས་གྲྭ་རྒྱུན་ལྔ་ལྷག་སོག་པ་འཇམ་དབྱངས་ཁང་ཚན་དུ་སྒྲིག་ཞུགས་གནང་ཡོད།།