༄། །ཁང་དམར་དགོན་ཨེ་ཝཾ་བདེ་ལྡན་གླིང་གི་གདན་རབས་མདོ་ཙམ་བརྗོད་པ། རྗེ་མཁན་ཆེན་ཚ་ཁོ་བ་ངག་དབང་གྲགས་པ་མཆོག་དབུས་འགྱུར་ཞིང་ནས་ཕྱིར་མདོ་སྨད་ཕྱོགས་སུ་བསྟན་འགྲོའི་བྱ་བ་རྒྱ་ཆེན་པོ་མཛད་ཕྱིར་ཕེབས་ནས་རྒྱལ་མོ་ཚ་བ་རོང་གི་ཡུལ་ཕྱོགས་སུ་ཞབས་སོར་འཁོད་སྐབས། ས་སྐྱོང་མི་ཡི་དབང་པོ་ཀུན་དགའ་རིན་ཆེན་བློན་ཚོགས་འཁོར་དང་བཅས་པས་རང་ཡུལ་ལ་དགོན་པ་ཚུགས་དགོས་ཞེས་གསོལ་འདེབས་ཞུས་པ་དང་། མཁན་ཆེན་ངག་དབང་གྲགས་པ་ཁོང་གི་ཐུགས་བསྐྱེད་ཟབ་མོ་དུས་སུ་སྨིན་ཏེ། གནས་ཕུན་སུམ་ཚོགས་པ་འབྲུག་བཞིའི་གདོང་ཞེས་པར་ཕེབས་ཏེ་དགོན་གནས་གཟིགས་གནང་མཛད་པས། ས་དེར་རྒྱལ་དེའུ་ཞེས་མིང་ཐོག་པའི་བྲག་རི་ཆུང་ཆུང་དབྱིབས་ཟླུམ་པོ་ཞིག་ཡོད་པ་དེའི་ཕྱོགས་བཞིར་གདོང་བཞི་ཡོད་པ་དབུས་རི་ལ་འདུད་པའི་ཚུལ་དུ་ཆགས་ཤིང་། ཐང་ཤིང་དང་ཤུག་པ་སོགས་རྩི་ཤིང་སྣ་ཚོགས་ཀྱིས་མཛེས་པར་བརྒྱན་ཞིང་ལྷུན་ཆགས་པའི་གནས་དེར་རབ་བྱུང་བདུན་པའི་ས་སྟག་སྟེ་ཕྱི་ལོ་ ༡༣༩༨ ལོར་ཚེ་བརྟན་གླིང་ཞེས་བྱ་བའི་ཞྭ་སེར་གྱི་དགོན་སྡེ་འདི་ཕྱག་བཏབ།
གནས་དེ་རྒྱལ་པོས་སྤྲོ་སངས་བྱེད་ཡུལ་ཡིན་པས། རྒྱལ་ཁང་ཉིས་ཐོག་མ་ཞིག་དང་། ཇ་ཁང་སོགས་ཡོད་པས། རྒྱལ་ཁང་ཚོགས་ཁང་དང་། ཇ་ཁང་དེ་དགེ་འདུན་བཞུགས་ཤག་ཏུ་ཕུལ་བར་མ་ཟད། རྒྱལ་པོའི་ཆབ་འོག་གི་འབྲོག་སྡེ་ཟངས་དཀར་ཁག་གསུམ་དང་། རོང་སྡེ་མཁར་སྒོ་མཁར་ནག །སོ་མང་སོགས་ནས་ཕེབས་པའི་དགེ་ཚུལ་སློང་ཉུང་ཤས་ཤིག་གིས་གཞི་བྱས་ཏེ་སྡེ་འདི་ཐོག་མར་ཚུགས་ཤིང་། ས་སྐྱོང་མི་ཡི་དབང་པོ་ཀུན་དགའ་རིན་ཆེན་གྱིས་སྦྱིན་བདག་མཛད། རྗེ་ཙོང་ཁ་པའི་ཕྱག་ཕྲེང་དང་། སློབ་དཔོན་སྨྲི་ཏིའི་བཅུ་ཚད་དང་། དུར་ཁྲོད་བསིལ་བའི་ཚལ་གྱི་ཙན་དན་རྐང་གཅིག་གི་ཡལ་ག །གཞན་རང་བསྲེལ་སྣ་ཚོགས་བཅས་གཟུངས་གཞུག་ཏུ་ཕུལ་བའི་མགོན་པོ་ཕྱག་དྲུག་པའི་སྐུ་ལ་རྗེ་ངག་དབང་གྲགས་པ་མཆོག་དང་། རོང་པོ་ལྗགས་ནག་པ་རྣམ་གཉིས་ཀྱིས་རབ་གནས་མཛད་པ། རིམ་གྱིས་སོ་མང་རྒྱལ་པོའི་མངའ་འབངས་སུ་གཏོགས་པའི་དབུས་གཙང་ཕྱོགས་ནས་སློབ་གཉེར་མཛད་པའི་དགེ་འདུན་པ་དང་བླ་སྤྲུལ་མང་པོ་ཕྱིར་སྡེ་འདིར་ཕེབས་ནས་སྒྲུབ་པ་ཉམས་ལེན་དང་བསྟན་འགྲོའི་དོན་ཆེན་མཛད་པས་དགོན་འདིའི་མཚན་ལ་བཤད་སྒྲུབ་ཚེ་བརྟན་གླིང་ཞེས་རིམ་གྱིས་གྲགས།
དེ་ནས་མི་རབས་འགའ་བྱིན་རྗེས་ཧོར་སོག་གི་དམག་ཐོན་ནས་ཡུལ་འཁྲུག་བསླངས་ཏེ་རྒྱལ་འབངས་ཡོངས་ལ་ཉམས་ཉེས་ཆེན་པོ་བྱུང་བ་དང་། དགོན་པ་འདི་ཡང་མེར་བསྲེགས་བཏང་ནས་གནས་གཞི་རྨེག་མེད་དུ་བཏང་ཞིང་། དགེ་འདུན་པ་ཉུང་ཤས་ཤིག་ལས་ལྷག་མེད་རྐྱེན་གནས་སྐབས་ལྷ་རྒྱལ་གླིང་དུ་རྒྱལ་པོའི་ཞབས་བརྟན་གསོལ་ཁ་བ་བྱས་ནས་མཁར་དྲུང་འདབས་ཀྱི་ལྷ་ཁང་དམར་པོའི་ནང་དུ་ཚོགས་དགོས་བྱུང་བས་ཡུལ་མི་ཚོས་ཁང་དམར་བ་ཟེར། དེ་ལྟར་དགོན་པའི་གནས་མེད་པར་དགེ་འདུན་པ་རྣམས་སོ་མང་རྒྱལ་པོའི་ཞབས་བརྟན་པ་དང་། རྒྱལ་པོའི་ཆོས་དཔར་ཁང་བདག་གཉེར་མཛད་ནས་ལོ་མང་རིང་བཞུགས་དགོས་བྱུང་།
རིམ་གྱིས་དགེ་འདུན་པ་ཞལ་གྲངས་ཇེ་མང་དུ་སོང་བ་དང་། བཙན་ན་དཔོན་དཀོན་མཆོག་རྣམ་རྒྱལ་གྱིས་སྒྲུབ་མཆོད་སོགས་ཀྱི་དུས་ཚུགས་གཏན་ཁེལ་དང་། དགེ་འདུན་པའི་བསླབ་ཁྲིམས་སྣ་རལ་དུ་མི་འགྲོ་བའི་དགོས་དམིགས་དུ་མ་ལ་གཟིགས་ཏེ་དབུས་འགྱུར་ལྷ་ལྡན་ཞིང་ནས་ཕྱིར་རང་ཡུལ་རྒྱལ་རོང་ཕྱོགས་སུ་ཕེབས་པའི་མཁས་པའི་དབང་པོ་དཀོན་མཆོག་ཡེ་ཤེས་དཔལ་འབྱོར་ལ་སྡེ་འདིར་བཅའ་ཡིག་དགོས་ཞེས་ནན་གྱིས་བསྐུལ་ངོར་ཁོང་གིས་བཅའ་ཡིག་མཛད་པ་དང་། དགོན་མིང་ཡང་ཁང་དམར་བཀྲ་ཤིས་ཕུན་ཚོགས་གླིང་ཞེས་གསོལ་ནས་རྒྱལ་པོའི་བཀའ་ཤོག་གི་ཚུལ་དུ་ཐམ་ཀ་དང་བཅས་ཏེ་གནང་།
སོ་མང་དང་ཁྲོ་ཆུའི་བར་འཁྲུགས་ཆེན་བྱུང་བས་ཁྲོ་ཆུའི་དམག་གིས་སོ་མང་རྒྱལ་པོའི་ཆོས་དཔར་སོགས་མེ་ལ་བསྲེགས་པས་དགོན་གཞི་གནས་ངེས་མེད་ཁོ་ན་ཡིན་པས་དགེ་འདུན་པ་རྣམས་འཚོགས་ཡུལ་ཙམ་ཡང་མེད་པར་རེ་ཞིག་རང་རང་སོ་སོའི་སྡེ་ནང་དུ་གནས་དགོས་བྱུང་། དུས་ཕྱིས་ཆོམ་ཚ་སྐུ་ཕྲེང་དང་པོ་རབ་འབྱམས་པ་རྗེ་དགེ་འདུན་གྲགས་པ་དཔལ་བཟང་པོ་དབུས་ནས་རང་ཡུལ་དུ་ཞབས་སོར་འཁོད་སྐབས་ཁོང་གིས་རང་ཡུལ་གྱི་དགེ་འདུན་བགྲེས་གཞོན་བར་གསུམ་ལ་ཐུགས་བགྲོས་གནང་སྟེ་རང་ཅག་རྣམས་ཀྱི་ཐུན་མིན་སྐྱབས་གཅིག་ཤར་རྒྱལ་བ་ཙོང་ཁ་པའི་གདུང་མཆོད་དགའ་ལྡན་ལྔ་མཆོད་ཆེན་མོ་འཚོགས་ན་བསོད་ནམས་རྒྱ་ཆེ་བའི་དགོངས་ཚུལ་གནང་བར་ཀུན་གྱིས་ཡིད་དང་བས་དྲངས་ཤིང་། ཐུགས་མོས་གནང་ནས་ལོ་དེར་དགའ་ལྡན་ལྔ་མཆོད་འཚོགས་འགོ་བརྩམས་ཤིང་། སྔར་ནས་གནས་གཞི་རྩ་མེད་བྱས་སྟབས་ལོ་ཤས་རིང་སྦྲ་གུར་ནང་འཚོགས་དགོས་བྱུང་།
དེ་ནས་དགེ་འདུན་པ་རྣམས་ཀྱིས་ལོ་ལྟར་སྦྲ་གུར་ནང་འཚོགས་དགོས་ན་སྟབས་བདེ་མིན་པ་སོགས་དཀའ་ཁག་མང་བས་འདུ་ཁང་ཞིག་ངེས་པར་དགོས་འདུག་ཅེས་ཆོམ་ཚ་རབ་འབྱམས་པ་རྗེ་དགེ་འདུན་གྲགས་པ་དཔལ་བཟང་པོར་ནན་གྱིས་བསྐུལ་ངོར་ཁོང་དང་དབལ་དགེ་སོགས་སོ་མང་རྒྱལ་པོའི་གམ་དུ་བྱོན་ནས་འདུ་ཁང་ཞིག་བཞེང་རྒྱུའི་བཀའ་གྲོས་བྱས་མཐར་རྒྱལ་པོས་ཐུགས་དགྱེས་སྤྲོའི་ངང་ཁྱེད་ཀྱི་འདོད་དོན་བཞིན་བསྒྲུབས་ན་ལེགས་ཞེས་གསུངས། འོན་ཀྱང་སྐབས་དེར་ཡུལ་འཁྲུག་གི་རྐྱེན་གྱིས་ཡུལ་མི་མང་པོ་ཞིག་སྡེ་པ་གཞན་དུ་ཉེན་ཡོལ་བྱས་ནས་ཕྱིར་རང་སྡེར་འཛོམས་མེད་པ་སོགས་ཀྱིས་ཅུང་ནར་འགྱངས་བྱེད་དགོས་བྱུང་བ་དང་། དུས་ཕྱིས་༸སྐྱབས་རྗེ་ཀུན་མཁྱེན་འཇམ་དབྱངས་ཞབས་པའི་རྡོ་རྗེ་མཆོག་དབུས་ནས་ཕེབས་ཏེ་བཀྲ་ཤིས་འཁྱིལ་གསར་འདེབས་མཛད་སྐབས་ཁོང་གིས་ཚ་བོ་བློ་བཟང་ཁྲིད་དེ་སྐྱབས་རྗེ་འཇམ་དབྱངས་ཞབས་པའི་དྲུང་དུ་ཕེབས་ནས་བཀྲ་ཤིས་འཁྱིལ་གྱི་ཚོགས་ཁང་གསར་བཞེངས་ཀྱི་རྡོ་བཟོ་བ་མི་སུམ་ཅུ་ཙམ་ཚ་ཁོའི་ཡུལ་ནས་འཚོལ་མངགས་མཛད་པ་སོགས་རང་ནུས་གང་ཡོད་ཀྱིས་ཕྱག་གཡོག་ཞུས།
དེ་ནས་སྐྱབས་རྗེ་དམ་པ་ཀུན་མཁྱེན་རིན་པོ་ཆེ་མཆོག་གིས་ཁྱེད་ཞང་ཚ་གཉིས་འདིར་བསྡད་ན་ཁོང་འཐད་པ་ཡིན་གསུངས་ཀྱང་། ཆོམ་ཚ་རིན་པོ་ཆེས་ཞལ་བཞེས་མ་མཛད་པར་བདག་གིས་ཚ་ཁོའི་རྒྱལ་པོ་ལ་རང་ཡུལ་དུ་དགོན་པ་ཞིག་འདེབས་རྒྱུ་ཁས་བླངས་ཡོད་ཞུས་པར་ཁོང་ཐུགས་ཤིན་ཏུ་དགྱེས་ནས་འོ་ན་ཁྱེད་དེར་སོང་ལ་གཞི་གསུམ་གྱི་ཕྱག་ལེན་རྣམ་པར་དག་པའི་དགོན་པ་ཞིག་ཐོབས་དང་། ངས་ཀྱང་ཚེ་རབས་ཀུན་ཏུ་རྗེས་སུ་འཛིན་ཞེས་གསུངས།
ཆོམ་ཚ་རབ་འབྱམས་པ་རྗེ་དགེ་འདུན་གྲགས་པ་མཆོག་ཕྱིར་རང་ཡུལ་དུ་ཕེབས་སྐབས་ས་སྐྱོང་མི་ཡི་དབང་པོ་ཤཱཀྱ་རྒྱལ་མཚན་གྱིས་གདན་ཞུས་ལྟར་ཚེ་བརྟན་གླིང་དུ་ཕེབས་ཤིང་རྒྱལ་པོའི་ཞབས་ཏོག་ལེགས་པར་མཛད་ཅིང་། དགོན་གནས་ལ་བཀའ་གྲོས་བྱས་མཐར་རབ་བྱུང་བཅུ་གཉིས་པའི་ཁྱི་ཡོས་ཏེ་ཕྱི་ལོ་ ༡༧༢༣ ལོར་འབྲོག་ལུང་གཡུ་ཐང་དུ་དགོན་པའི་གནས་གཞི་གསར་འདེབས་མཛད་རྒྱུར་ཐུགས་གཏན་ཁེལ་ཞིང་། ལོ་དེའི་ཆུ་སྟོད་ཟླ་བའི་ཚེས་བཞི་ཉིན་གནས་དེར་བཀྲ་ཤིས་གསོ་སྦྱོང་འཚོགས་ཤིང་ཁོང་གིས་སོ་སོར་ཐར་པའི་མདོ་གསུངས།
དགོན་གནས་སུ་ས་བདག་ལྟོ་འཕྱེའི་ཐིག་གདབ་ཅིང་དགོན་མིང་ཡང་བཤད་སྒྲུབ་དར་རྒྱས་གླིང་ཞེས་གསོལ། ཁོང་དང་བཙན་ན་དཔོན་དཀོན་མཆོག་རྣམ་རྒྱལ་སོགས་རྒྱལ་བློན་རྣམས་གྲོས་བྱས་ནས་ཟངས་དཀར་ཕྱོགས་ནས་ཤིང་ཆ་དང་སོ་མང་ཕྱོགས་ནས་ཤིང་བཟོ་བ་ཁྲོ་ཆུའི་ཕྱོགས་ནས་རྡོ་བཟོ་བ་གྲ་སྒྲིག་བྱེད་རྒྱུ་ཐག་གཅོད་མཛད་ཅིང་། རིང་མིན་འདུ་ཁང་རྟེན་དང་བརྟེན་པར་བཅས་པ་ལེགས་པར་གྲུབ་ཅིང་གཞི་གསུམ་གྱི་ཕྱག་ལེན་ལེགས་པར་ཚུགས།
དེ་ནས་མི་ལོ་ཉིས་བརྒྱ་ཙམ་ལ་རྐྱེན་ངན་གྱི་མཚན་མ་ཅི་ཡང་མེད་པར་དགེ་འདུན་དབྱར་མཚོར་འགྲན་ཅིང་བཤད་སྒྲུབ་ཀྱི་བྱ་བས་དུས་འདའ་བར་བྱས་ནས་ཉམས་རྟོགས་འཁྲུངས་པའི་སྐྱེས་བུ་དམ་པ་བར་མ་ཆད་དུ་བྱུང་། ཕྱི་ལོ་ ༡༩༣༥ ལོར་སླར་ཡང་ཆག་འཇིག་གི་གནས་སྟངས་ཏེ་ནག་ཕྱོགས་དཔུང་མཐོ་ཞིང་དཀར་ཕྱོགས་ཉམ་དམའ་བས་དུས་ངན་སྙིགས་མའི་རང་མཚང་བརྡོལ་ནས་དམར་དམག་གིས་དཔུང་འཇུག་བྱས་ནས་ཁང་དམར་དགོན་གྱི་འདུ་ཁང་དང་ལྷ་ཁང་མེ་ལ་བསྲེགས་ཏེ་སླར་ཡང་གནས་གཞི་རྩ་མེད་དུ་སོང་བར་མ་ཟད་དགེ་འདུན་པ་རྣམས་བྲོས་བྱོལ་ངང་ཟངས་དཀར་སྟོད་ཕྱོགས་སུ་འགྲོ་དགོས་བྱུང་ཡོད་པ་དང་། ལོ་གཉིས་ཙམ་རིང་སྡེ་པའི་ནང་དུ་སྦྲ་གུར་ནང་ཚོགས་འཚོགས་དགོས་པའི་གནས་སྟངས་སྐྱོ་བོ་ཞིག་སླར་ཡང་མི་འདོད་བཞིན་མྱངས་དགོས་བྱུང་ཡོད།
དེ་ནས་ཚ་ཁོའི་དཔོན་འདམ་མཁན་ཚང་དང་དགེ་འདུན་ཡོངས་ཟངས་དཀར་ཁག་གསུམ་བཅས་ཀྱིས་བཙན་ན་སྐུ་ཕྲེང་བརྒྱད་པ་སྐྱབས་རྗེ་སྐལ་བཟང་བསྟན་འཛིན་རྒྱ་མཚོ་ཚང་ལ་ནན་གྱིས་ཞུས་པར། ཐུགས་བརྩེ་ཆེན་པོས་ཁོང་གི་རི་ཁྲོད་དུ་དགོན་པའི་གནས་གཞི་འདེབས་རྒྱུའི་ཞལ་བཞེས་གནང་ནས་རབ་བྱུང་བཅུ་དྲུག་པའི་མེ་གླང་སྟེ་ཕྱི་ལོ་ ༡༩༣༧ ལོར་དེང་གི་སྲིད་འཛིན་ས་ཁུལ་གྱི་དབང་དུ་བྱས་པའི་རྔ་བ་ཁུལ་ཐོག་ནས་ཡར་སྤྱི་ལེ་བརྒྱད་ཅུ་གྱ་ལྔའི་མཚམས་སུ། སྲམ་ལོང་གད་སྟེང་ཞེས་སའི་དགེ་བཅུ་ཚང་ཞིང་ཐང་ཤིང་དང་ཤུག་པ་འདྲེས་པའི་ནགས་ཚལ་གྱིས་ཕྱོགས་ཀུན་ནས་ཡོངས་སུ་བསྐོར་བའི་གནས་ཏེ་དབེན་ཞིང་ལྷང་འཇགས་པའི་གནས་དེར་ཁོང་གི་རི་ཁྲོད་ཀྱི་གཞི་བྱས་ནས་འདུ་ཁང་དང་གྲྭ་ཤག་སོགས་གསར་བཞེངས་གནང་ནས་ཁང་དམར་དགོན་འདིའི་གནས་གཞི་བཏབ།
འདུ་ཁང་གསར་བཞེངས་སྐབས་ཐོག་མར་ཁོང་གིས་ས་བདག་ལྟོ་ཕྱེའི་ཐིག་གདབས་ཤིང་ས་འདུལ་གནང་། གྲྭ་པ་རྣམས་ཀྱིས་ཤིང་ཆ་སོགས་འཚོལ་སྒྲུབ་གང་ལེགས་གནང་ནས་ཚོགས་ཁང་གསར་བཞེངས་ཀྱི་གདུང་མ་ཐོག་མར་ཁོང་གིས་ཕྱག་གིས་ཡར་བཏེགས་ནས་ངའི་སྐྱེ་བ་ནས་ཚེ་རབས་ཐམས་ཅད་དུ་དམ་པའི་ཆོས་ཀྱི་གདུང་མ་འདེགས་པར་གྱུར་ཅིག་ཅེས་ཐུགས་སྨོན་གནང་། རིམ་གྱིས་དགོན་སྡེའི་སྒྲིག་ཁྲིམས་དང་འདོན་རྟ་དབྱངས་སོགས་ཕྱོགས་ཡོངས་ལ་གཟིགས་རྟོག་བླ་མེད་མཛད། ལྷག་པར་དུ་ཁོང་གིས་༸རྗེ་བསང་ཁོག་འཇིགས་མེད་རྒྱ་མཚོ་དགོན་འདིར་གདན་དྲངས་ནས་དབང་ལུང་མན་ངག་གིས་སྡེ་འདི་ཚིམ་པར་མཛད། ཁོང་རྣམ་གཉིས་ཐུགས་གྲོས་མཛད་ནས་དུས་འཁོར་སྒྲུབ་མཆོད་གསར་འཛུགས་བྱ་རྒྱུའི་ཐུགས་ཐག་བཅད་པར་མ་ཟད་བློ་བཟང་དགེ་འདུན་སོགས་དགེ་འདུན་པ་སྐོར་ཞིག་བཀྲ་ཤིས་འཁྱིལ་དུ་མངགས་ནས་དུས་འཁོར་གྱི་འདོན་རྟ་དབྱངས་ཐིག་རྡུལ་ཚོན་བསླབས་ཏེ་ཕྱིར་ཡོང་ནས་སྒྲུབ་མཆོད་ལེགས་པར་ཚུགས།
དེའི་ཕྱིས་ལོ་བཅུ་ཕྲག་གཅིག་ལྷག་གི་རྗེས་ཏེ་ཕྱི་ལོ་ ༡༩༥༤ ལོར་སླར་ཡང་༸ཡོངས་འཛིན་འཇིགས་མེད་རྒྱ་མཚོ་དགོན་འདིར་ཕེབས་ནས་དུས་འཁོར་དབང་ཆེན་སོགས་དབང་ལུང་དང་མན་ངག་གི་ཆོས་ཀྱི་ཆར་ཆེན་ཕབས་ཤིང་། དགོན་མིང་ལ་སྔར་བཤད་སྒྲུབ་དར་རྒྱས་གླིང་འབོད་པ་དེ་བསྒྱུར་ནས་ཨེ་ཝཾ་བདེ་ལྡན་གླིང་ཞེས་གསོལ། དེ་ནས་ཕྱི་ལོ་ ༡༩༥༨ ལོར་བོད་ཀྱི་དགོན་སྡེ་སྤྱི་མཚུངས་ལྟར་ཆགས་འཇིག་བྱུང་ཡང་། བརྒྱད་ཅུ་གྱ་གྲངས་ནང་སླར་ཆོས་སྒོ་ཕྱེས་སྐབས་ཨ་ལགས་དབལ་ཤུལ་བློ་བཟང་བསྟན་འཛིན་རྒྱ་མཚོས་ཁུར་བཞེས་ཏེ་འདུ་ཁང་བསྐྱར་བཞེངས་གནང་ཞིང་། སྔར་གྱི་དགེ་འདུན་ལྷག་བཞུགས་རྣམས་ཀྱིས་གཞི་རྐང་བྱས་ནས་གསར་ཞུགས་གྲྭ་རྒྱུན་གང་མང་དང་བཅས་ཀྱིས་དགོན་འདིའི་སྔར་གྱི་ཆོས་སྤྱོད་ཀྱི་ཕྱག་བཞེས་གང་ཡོད་སོར་ཆུད་མཛད་ཅིང་། བསྟན་འགྲོར་སྨན་པའི་བྱ་གཞག་རྒྱ་ཆེན་པོར་གནང་བཞིན་པ་བཅས་གནས་སོ།།
ལོ་རྒྱུས་འདི་དགོན་པ་རང་དང་འབྲེལ་ཡོད་ནས་མཁོ་སྤྲོད་གནང་བྱུང་བ་བཞིན་བཀོད་ཡོད། ལོ་རབས་དགུ་བཅུ་པ་ནས་ ༢༠༡༧ བར་དུ་སྤྲུལ་འཇམ་དབྱངས་ཐུབ་བསྟན་སོགས་གྲྭ་རྒྱུན་བཅུ་ལྷག་སོག་པ་འཇམ་དབྱངས་ཁང་ཚན་དུ་སྒྲིག་ཞུགས་གནང་ཡོད།།