༄༅།།གྲངས་རིང་ཚོགས་གཉིས་རོལ་མཚོ་བསྲུབས་ལས་སྐུ་བཞིའི་བང་རིམ་མཛེས་པ་བསྐལ་བའི་རྒྱན།།འགག་མེད་དྲུག་ཅུའི་དབྱངས་འདིས་སྟོང་དང་རྟེན་འབྱུང་དབང་པོ་རབ་ཀྱི་རྣ་བར་འཇེབས།།མ་འདྲེས་ཇི་ལྟ་ཇི་སྙེད་ཆོས་ཀུན་མཁྱེན་པའི་ཡེ་ཤེས་འོད་སྣང་བྱེ་བ་འགྱེད།།སྟོབས་བཅུ་མངའ་བའི་ཞབས་ཀྱི་པད་མོ་དུས་འདིར་རིགས་པ་སྨྲ་བས་གཙུག་གིས་བསྟེན།།སྟོང་པར་གྲུབ་པས་རྟེན་འབྱུང་དང་།།རྟེན་འབྱུང་རིགས་པས་སྟོང་པ་སྟེ།།རོ་གཅིག་གཟིགས་པའི་ཞབས་ཀྱི་མཐིལ།།མཁས་པའི་གཙུག་ཏུ་ངལ་གསོ་མཛད།།རྟེན་འབྱུང་སྟོང་བར་བསྲེས་པས་འཁོར་འདས་ཀུན།།འགལ་འདུ་མེད་པར་ཆོས་ཀུན་སྒྱུ་མ་རུ།།ལེགས་པར་འཆར་བའི་གསང་བའི་གནད་ཀྱི་འཕྲུལ།།འདི་ན་མི་འཇིགས་སེང་གེའི་ང་རོར་གྲུབ།།དབུས་གྱུར་བྱ་རྒོད་ཕུང་པོའི་རི་བོརསྟོབས་བཅུ་མངའ་བ་གང་དེའི་སྤྱན་སྔ་རུ།།རྒྱལ་སྲས་རྒྱ་མཚོའི་དབུས་སུ་རབ་དང་ཕུལ་ཕྱུང་ཤེས་རབ་ཕ་རོལ་ཕྱིན་པ་སྟེ།། །བདུད་རྩིས་མྱོས་བའི་སྤྱན་རས་གཟིགས་དབང་གསུམ་ལྡན་ཟོལ་གྱི་གངས་ལྗོངས་འདིར།།ཉག་ཅིག་ཁྱོད་ཀྱིས་ལུགས་གཉིས་འཁོར་ལོ་སྲིད་མཐའི་བར་དུ་ཕྱག་གིས་གཟུང་།།རྒྱ་མཚོའི་ངོས་ནས་དཔག་ཚད་བརྒྱར་འཕགས་ཤིང་།།རྣམ་མང་ཆུ་བོ་འབབས་པའི་གངས་ཅན་ལྗོངས།།རྐྱང་འབྲོང་བྱི་ལ་དོམ་སོགས་བག་ཕེབས་པའི།།རང་བྱུང་ཁམས་འདི་བདག་གིར་བཟུང་བ་ནས།།བརྒྱ་ཕྲག་གཅིག་དང་ཉག་མ་བདུན་ལྷག་པའི།།བཅུ་ཕྲག་གཉིས་དང་ཉིས་སྟོང་ལོ་འདིར་ཡང་།།ལུགས་གཉིས་སྲིད་ཀྱིས་བསྒྱུར་མཁས་དགེ་སློང་སྟེ།།བསྟན་འཛིན་རྒྱ་མཚོའི་ཞབས་པད་གཙུག་ན་རྒྱལ།།འགྲོ་ཀུན་མ་མར་གཟིགས་པའི་སྙིང་རྗེ་ཡིས།།ལན་བརྒྱར་འབད་པས་རྒོལ་བའི་དགྲ་བོ་ཡང་།། ཕ་མས་བུ་ཚར་གཟིགས་པའི་བྱམས་པ་ཡིས།།ཆགས་སྡང་དུ་ཁའི་གདུང་བ་བཅིལ་འདི་མཚར། དཔྱད་གསུམ་དག་པའི་ཐུབ་པའི་བསྟན།།རང་མཐོང་ཆེ་བའི་སྙིང་ཁམས་འགས།།མ་བཟོད་རྒོལ་ཡང་ཚན་རིག་པའི།།མཁས་པས་བཀུར་ཚེ་ཁྱོད་ལྕེ་རྟུལ།།ཨེ་མ་བྱེ་བ་ཕྲག་བརྒྱའི་དྲན་དབང་གིས།།རྣམ་དཔྱོད་གློག་ཞགས་འཁྱུག་པའི་གོ་ལ་འདིར།།རྟེན་འབྱུང་རིག་པ་ཚན་རིག་བསྲེས་པའི་སྲོལ།།མཐའ་དབུས་ཀུན་ཏུ་ཁྱབ་པའི་སྒོ་མོ་ཕྱེ།། །
ཞེས་པའི་མཆོད་བརྗོད་ཚིགས་སུ་བཅད་པ་བུ་གའི་གྲངས་ལྡན་འདི་ཉིད་དགའ་ལྡན་ཤར་རྩེ་སོག་པ་མཁན་ཟུར་བོད་ཀྱི་དཔེ་མཛོད་ཁང་གི་ལྡེའུ་མིག་དང་ཐམ་ག་འཛིན་པའི་འགན་འཛིན་ཨ་མཆོག་སྤྲུལ་སྐུ་བློ་བཟང་ཐུབ་བསྟན་འཕྲིན་ལས་མཁྱེན་རབ་ཡེ་ཤེས་རྒྱ་མཚོར་འབོད་པས་ཕྱི་ལོ་ ༢༠༠༠ ཕྱི་ཟླ་ ༧ ཚེས་ ༥ ཉིན་དཔེ་མཛོད་ཁང་གི་བོད་ཀྱི་ཚན་རིག་དུས་དེབ་གསར་དུ་འདོན་སྤེལ་གྱི་མཆོད་བརྗོད་དུ་འཕྲལ་མར་སྦྱར་བའོ།།