༄། །གསེར་རྟ་གཞི་ཆེན་རགས་བཀྲམ་དགོན་པ་ནི་མདོ་སྨད་མགོ་ལོག་དབལ་ཤུལ་གསེར་རྟའི་ལྷོ་དགོན་བཅུ་གསུམ་ཟེར་བའི་ནང་ཚན་དང་། གཞི་ཆེན་དགོན་ཁག་གསུམ་གྱི་ཡ་གྱལ་གྱི་དགོན་སྡེ་ཞིག་ཡིན། དགོན་པ་དེ་ཐོག་མར་ཕྱག་འདེབས་མཛད་པ་པོ་ཆོས་བརྒྱུད་གཞན་ཞིག་ཡིན་པ་ཚུར་སྔ་འགྱུར་རྒྱལ་བ་ཀ་ཐོག་གཞི་ཆེན་གྱི་ཆོས་བརྒྱུད་དུ་གྱུར་པའི་ལོ་རྒྱུས་ངག་རྒྱུན་དུ་བཤད་ཚུལ་གཅིག་དང་། ཡང་དགོན་པ་དེ་ཕྱི་ལོ་ ༡༦༨༨ ལོར་ཐོག་མར་ཕྱག་བཏབ་པ་དང་། ཐོག་མར་ཕྱག་འདེབས་མཁན་ནི་སྦྲ་མགོའི་བླ་མ་ཀུན་བཟང་ངེས་དོན་དབང་པོ་ཡིན་ཞེས་འབྲི་མཁན་དང་། མངའ་བདག་ཉིང་གི་གདུང་རྒྱུད་རྒྱལ་བ་གཞི་ཆེན་པའི་གྲུབ་བརྙེས་ཀྱི་རིག་འཛིན་ཆེན་པོ་གླིང་བཞག་ཨོ་རྒྱན་ལྷུན་འགྲུབ་ཀྱིས་ཕྱག་བཏབ་ཅེས་།བྲི་མཁན་ཡང་བྱུང་།
དགོན་པའི་ས་གནས་ནི། དེང་དུས་དཀར་མཛེས་རྫོང་དང་གསེར་རྟ་རྫོང་གཉིས་ཀྱི་ས་མཚམས་ཧོར་སྟོང་སྐོར་དང་། སྟོང་སྐོར་རྡོ་རྗེ་ལུག་གུ་དགོན་སོགས་དང་ཐག་ཉེ་བའི་ས་ན་ཡོད། དེ་ཡང་བཙན་པོ་ནོ་མོན་ཧན་གྱིས་ཕྱི་ལོ་ ༡༨༣༠ ལོར་བྲིས་པའི་འཛམ་གླིང་རྒྱས་བཤད་དང་། མདོ་ཁམས་གནས་ཡིག་ཕྱོགས་བསྒྲིགས་ལྷ་དབང་རྔ་སྒྲ་སོགས་ལོ་རྒྱུས་ཚད་ལྡན་དུ་མར་མགྲིན་གཅིག་ཏུ། རྫ་དགོན་གསར་དགོན་པ་སོགས་དགེ་ལུགས་པའི་གྲྭ་ཚང་ཆེན་པོ་ཡོད། དེ་དག་ནས་ཤར་དུ་སྟོང་སྐོར་ཟེར་བའི་སྡེ་ཡོད་དེ་འདས་པ་ན། མདོ་སྨད་ཨ་མདོའི་ས་ཆར་སླེབས་ཡོད་ཅེས་གསུངས་པ་བཞིན་མགོ་ལོག་རགས་བཀྲམ་དགོན་པ་དེ་མདོ་སྨད་ཀྱི་ས་མཐའི་མཚོན་རྟགས་ལྟ་བུ་ཞིག་ཡིན།
དགོན་འདིའི་ཆོས་བརྒྱུད་གཞི་ཆེན་ཀ་ཐོག་པ་ཡིན། གཞི་ཆེན་བཻ་རོ་ཙ་ན་སྐུ་ཕྲེང་རིམ་བྱོན། གཞི་ཆེན་དབོན་སྤྲུལ་སྐུ་ཕྲེང་། གཞི་ཆེན་དབོན་པོ་ཨོ་རྒྱན་ཆེ་མཆོག །བླ་མ་གང་ཤར་རང་གྲོལ་སོགས་ཚད་ལྡན་གྱི་གྲུབ་བརྙེས་དུ་མས་དགོན་དེར་གཟིགས་སྐྱོང་གནང་། ལྷག་པར་དུ་སྔོན་མ་དགོན་དེར་གཞི་ཆེན་བཻ་རོ་མ་འདས་སྤྲུལ་སྐུ་བློ་བཟང་དྲི་མེད་བསྟན་འཛིན་ཟེར་བའི་གྲུབ་བརྙེས་རིག་འཛིན་ཆེན་པོ་ཞིག་བྱུང་ཞིང་། ཁོང་ནི་ཨ་མཆོག་སྐུ་ཕྲེང་གསུམ་པ་འཇམ་དབྱངས་མཁྱེན་རབ་རྒྱ་མཚོ། སེ་རའི་སྤྲུལ་སྐུ་རིན་ཆེན་ཕྲེང་བ། ཁྲ་དགེ་སློང་ཚུལ་ཁྲིམས། རྡོ་གྲུབ་སྐུ་ཕྲེང་གསུམ་པ་སོགས་གསར་རྙིང་རིས་མེད་ཀྱི་སྐྱེས་ཆེན་མང་པོ་བསྟེན་ནས། དགོན་དེར་གྲུབ་མཐའ་ཆོས་བརྒྱུད་རིས་མེད་ཀྱི་ཆོས་གཞི་རྒྱ་ཆེན་པོ་བཙུགས་ཤིང་། རྡོར་སེམས་སྒྲུབ་གྲྭ། མ་ཎིའི་སྒྲུབ་གྲྭ། བཤད་སྒྲུབ་འཆད་ཉན་ཡང་གཞི་རྒྱ་ཆེ་བ་བཙུགས།
དགོན་དེར་བླ་བྲང་བཀྲ་ཤིས་འཁྱིལ་དང་། གདན་ས་ཆེན་པོ་འབྲས་སྤུངས་གཉིས་ཀར་ཐོས་བསམ་ཕྱོགས་མེད་གནང་བའི་འབྲས་ཧར་ལྡོང་རབ་འབྱམས་པ་མཁན་ལེགས་བཤད་རྒྱ་མཚོ་མཆོག་དང་། རྫ་སེར་ཤུལ་ནས་སློབ་གཉེར་གནང་བའི་རྔ་བཟའ་མཁན་པོ་སོགས་ཀྱིས་དགེ་ལྡན་པའི་ཕྱོགས་ཀྱི་དཔེ་ཆ་ཁྲིད་གནང་མཛད་པ་སོགས་བཤད་སྒྲུབ་འཆད་ཉན་དར་རྒྱས་ཕྱིན་མྱོང་བའི་དགོན་གནས་ཤིག་ཡིན། འོན་ཀྱང་ཕྱིས་སུ་བསྟན་པ་ལ་དར་རྒུད་སྣ་ཚོགས་ཤིག་བྱུང་ཡོད། དེང་སྐབས་མཁན་པོ་གྲགས་པ་ཚེ་བརྟན་གྱིས་གང་ཐུབ་ཀྱིས་བསྟན་པར་ཐུགས་ཁུར་མཛད་ནས་དགོན་དེར་བཞུགས་ཡོད་པ་སོགས་དགོན་དེའི་ལོ་རྒྱུས་མདོར་བསྡུས་པའོ།།
ལོ་རྒྱུས་འདི་དགོན་པ་འདིའི་དགེ་བཤེས་ལྷ་རམས་པ་འཇམ་དབྱངས་བློ་གྲོས་ཀྱིས་མཁོ་སྤྲོད་གནང་བྱུང་བ་བཞིན་བཀོད་པའོ། ། ༡༩༩༦ ནས་ ༢༠༡༧ བར་དུ་དགེ་བཤེས་འཇམ་དབྱངས་བློ་གྲོས་སོགས་སོག་པ་འཇམ་དབྱངས་ཁང་ཚན་དུ་སྒྲིག་ཞུགས་གནང་ཡོད།།