༄༅།།དེ་ཡང་ཕྱི་ལོ་༡༤༠༢རྒྱལ་བ་གཉིས་པ་རྗེ་ཙོང་ཁ་པ་ཆེན་པོས་ཇོ་བོ་བཀའ་གདམས་པའི་གདན་ས་རྭ་སྒྲེང་དུ་བྱང་ཆུབ་ལམ་གྱི་རིམ་པ་ཞེས་པའི་འཛམ་གླིང་གི་སྤྱི་ནོར་ལྟ་བུའི་ལེགས་པར་བཤད་པ་ཆེས་ཤིན་ཏུ་ངོ་མཚར་བ་ཞིག་མཛད་ཅིང་། དེ་ནས་རིམ་གྱིས་ལམ་རིམ་འབྲིང་པོ་དང་། ལམ་རིམ་ཉམས་མགུར། ཡོན་ཏན་གཞི་གྱུར་མ། ལམ་གཙོ་རྣམ་གསུམ་ཞུ་བ་ལ་སོགས་པའི་རྒྱས་བསྡུས་ཇི་སྙེད་ཅིག་མཛད། རྗེས་སུ་རི་བོ་དགེ་ལྡན་པའི་ཕྱོགས་སུ་༸རྒྱལ་མཆོག་ལྔ་པ་ཆེན་པོའི་འཇམ་དཔལ་ཞལ་ལུང་དང་། པཎ་ཆེན་སྐུ་ཕྲེང་རིམ་བྱོན་གྱི་བདེ་ལམ་དང་མྱུར་ལམ་སོགས་ལམ་རིམ་གྱི་བཤད་པ་རྒྱས་བསྡུས་སྣ་ཚོགས་པ་འགྲན་པ་བཞིན་དུ་འཕེལ་བར་གྱུར། རི་བོ་དགེ་ལྡན་པའི་སྔོན་དུ་བཀའ་སྲོལ་འདིའི་རྒྱུན་ཆོས་བརྒྱུད་ཀྱི་དབང་དུ་བྱས་ན་བཀའ་གདམས་པ་དང་། ས་སྐྱ་བ། བཀའ་རྒྱུད་པ་སོགས་དང་། བཤད་སྒྲུབ་འཛིན་པའི་ཆོས་གྲྭའི་དབང་དུ་བྱས་ན་རྭ་སྒྲེང་། གསང་ཕུ། སྙེ་ཐང་། སྣར་ཐང་། ས་སྐྱ། ཞ་ལུ། ཚལ་གུང་ཐང་། སྐྱིད་ཤོད་དགའ་བ་གདོང་། སྐྱོར་མོ་ལུང༌། ཟུར་ཕུག རྩེད་ཐང་སོགས་སུ་བཞུགས་པའི་དགེ་བའི་བཤེས་གཉེན་རྣམས་དང་། རི་ཁྲོད་དུ་བཞུགས་པའི་བྱ་བཏང་རྣལ་འབྱོར་པའི་ཁྲོད་ན། བཀའ་བསྟན་གསུང་རབ་ཐམས་ཅད་གང་ཟག་གཅིག་ལ་གདམས་པར་འཆར་བའི་ཕྱག་སྲོལ་མ་ཉམས་པར་གནས་ཤིང༌།བསྟན་རིམ་ཞེས་པའི་ལམ་རིམ་སྐོར་མང་པོ་མཛད། རྗེ་རྒྱལ་བ་གཉིས་པ་ཙོང་ཁ་པ་ཆེན་པོས་བསྟན་རིམ་དེ་དག་གི་ཁྲོད་ནས་རྔོག་ལོ་ཙཱ་བ་བློ་ལྡན་ཤེས་རབ་དང༌། གྲོ་ལུང་པ་བློ་གྲོས་འབྱུང་གནས་རྣམ་གཉིས་ཀྱི་བསྟན་རིམ་གཉིས་པོ་གཙིགས་ཆེ་བར་བཟུང་། ཐོག་མར་སྤྱན་དྲངས་པ་ན་སྤོས་སྣེ་བྱས་ཏེ། གཟིམ་ཤག་ཏུ་མཆོད་པ་སྣ་ཚོགས་ཀྱིས་བཀུར་སྟི་བྱས་ཚུལ་སོགས། མཚོ་སྔོན་པར་མ་འབྲུག་རྒྱལ་དབང་ཆོས་རྗེའི་རྗེ་ཙོང་ཁ་པ་ཆེན་པོའི་རྣམ་ཐར་ཆེན་མོའི་ཤོག་གྲངས་ ༢༢༧ ཕྲེང༌ ༡༩གཉལ་ནས་ལོ་རོར་ཕེབས་ཏེ་ལོ་རོ་སྟོང་སྟག་ཏུ་ཟླ་བ་ལྔ་ཙམ་བཞུགས་ནས་ཐུགས་དམ་ལ་གཅིག་ཏུ་འགྲུས་པར་མཛད། དེར་དགེ་བའི་བཤེས་གཉེན་ཆེན་པོ་གྲོ་ལུང་པ་བློ་གྲོས་འབྱུང་གནས་ཀྱིས་མཛད་པའི་བསྟན་རིམ་ཆེན་མོ་གདན་དྲངས་བྱུང་བ་ལ་བསུ་བ་མཛད་ཅིང་། མཆོད་པ་ཕུལ་ནས་ཞིབ་ཏུ་གཟིགས་པས་རྒྱལ་བའི་གསུང་རབ་ཀྱི་དགོངས་དོན་མཐའ་དག་གང་ཟག་གཅིག་གིས་ཉམས་སུ་ལེན་ཚུལ་དང་། ལམ་གྱི་ངོ་བོ། གྲངས་ངེས་གོ་རིམ་སོགས་ཤིང་རྟ་ཆེན་པོ་གཉིས་ཀྱི་བཞེད་པ་དང་ལྷག་པར་མཐུན་པས་ཐུགས་ངེས་ཆེན་པོ་འཁྲུངས། ཞེས་དང་། ཡང་དེའི་ཤོག་གྲངས་ ༢༤༤ ཕྲེང་ ༨སེམས་འདུལ་བའི་རིམ་པ་འབའ་ཞིག་ལྷུར་མཛད་པའི་སྒོ་ནས་གདུལ་བྱ་མཆོག་དམན་ཐམས་ཅད་ཇི་ལྟར་བཀྲི་བའི་རིམ་པ་ལ་མངའ་བརྙེས་ཤིང་། གངས་རིའི་ཁྲོད་འདིར་སེམས་དཔའ་ཆེན་པོ་དཔལ་མར་མེ་མཛད་ཡེ་ཤེས་ཀྱི་གདམས་པ་བྱང་ཆུབ་ལམ་གྱི་རིམ་པའི་མཚན་ཉིད་དང་སྔགས་ཀྱི་ཐེག་པའི་ལམ་གྱི་རིམ་པ་ཕྱིན་ཅི་མ་ལོག་པར་གཏན་ལ་ཕབ་པའི་ཤིང་རྟའི་སྲོལ་འདི་ཉིད་ཡ་མཚན་པར་གཟིགས་ཤིང་། དེའི་སྲོལ་ལ་ཐུགས་ངེས་ཆེར་འཁྲུངས། དཔལ་ཨ་ཏི་ཤའི་སྲོལ་ལ་ཡང་དགེ་བའི་བཤེས་གཉེན་ཆེན་པོ་པོ་ཏོ་བ་སོགས་ཀྱི་གདམས་པ་ཡང་རྨད་དུ་བྱུང་བའི་ཐུགས་ངེས་ཡོད་མོད་ཀྱི།འོན་ཀྱང་ལྷག་པར་བླ་མ་ལོ་ཙཱ་བ་ཆེན་པོ་བློ་ལྡན་ཤེས་རབ་ཀྱིས་མཛད་པའི་བསྟན་རིམ་དང་། དེའི་སྲས་ཀྱི་ཐུ་བོ་དཔལ་ལྡན་གྲོ་ལུང་པས་མཛད་པའི་བསྟན་རིམ་ཆེན་མོ་སོགས་དང་རང་ཉིད་ཀྱིས་དགོངས་པའི་ལམ་གྱི་རིམ་པ་རྣམས་མཐུན་ཤས་ཆེ་ཞིང་སྲོལ་ཕུལ་དུ་བྱུང་བར་གཟིགས་སོ།།ཞེས་གསུངས་པ་ལྟར་ལགས་ཤིང་དེའི་ཐོག་ལ་བསམ་གཏན་བསྒྲུབ་ལུགས་དང་ལྟ་བའི་ཟབ་གནད་ལ་རྗེ་ཙོང་ཁ་པ་ཆེན་པོས་ཐུན་མོང་མིན་པའི་ཟབ་གནད་ཀྱི་ཁྱད་པར་རྩལ་དུ་བཏོན་ཡོད་པ་ལས་བཤད་སྲོལ་གྱི་ཁོག་སོར་བཞག་དང་མཚན་ལ་ཡང་བྱང་ཆུབ་ལམ་གྱི་རིམ་པ་ཞེས་ཚིག་ཅུང་ཟད་བསྒྱུར་བ་མ་གཏོགས་ངོ་བོའི་ཆ་ནས་བཀའ་གདམས་པའི་བཤད་སྲོལ་དེ་རང་ཡིན། དེའང་མཚོ་སྔོན་པར་མ་བྱང་ཆུབ་ལམ་གྱི་རིམ་པའི་དེབ་གཟུགས་ཤོག་གྲངས་༣ཕྲེང་༡༥དང་པོ་མཛད་པ་པོ་ནི།གདམས་ངག་འདི་སྤྱིར་རྗེ་བཙུན་བྱམས་པས་མཛད་པའི་མངོན་པར་རྟོགས་པའི་རྒྱན་གྱི་གདམས་ངག་ཡིན་ལ། ཁྱད་པར་དུ་འདིའི་གཞུང་ནི་བྱང་ཆུབ་ལམ་གྱི་སྒྲོན་མ་ཡིན་པས་དེ་མཛད་པ་པོ་ཉིད་འདིའི་ཡང་མཛད་པ་པོའོ།།
ཞེས་གསུངས་པ་ལྟར། མཉམ་མེད་ཇོ་བོ་ཆེན་པོ་དི་པཾ་ཀ་ར་ཤྲཱི་ཛྙཱ་ནས།སངས་རྒྱས་སོགས་དམིགས་དད་པ་དང་། །སྦྱིན་སོགས་སྤྱོད་ཡུལ་བརྩོན་འགྲུས་དང༌། ། ཞེས་སོགས་ཁུངས་སུ་མཛད་པའི་བྱང་ཆུབ་ལམ་གྱི་སྒྲོན་མའི་བཤད་པ་ཉིད་ཐར་འདོད་རྣལ་འབྱོར་པའི་ལམ་གྱི་སྲོག་ཏུ་བཟུང་།དེ་ཁོ་ན་གཞི་ལ་བཞག་སྟེ་སོ་སོས་མདོ་སྔགས་ཀྱི་ལམ་ཉམས་སུ་བསྟར་བ་དང་། གཞན་སློབ་མ་ལམ་དུ་བཀྲི་བར་མཛད་པས་རི་བོ་དགེ་ལྡན་པ་ལ་བཀའ་གདམས་གསར་མ་པ་ཞེས་པའི་མཚན་དང་དོནམཐུན་པ་འདི་བྱུང་ངོ༌།། གཞན་ཡང་རྗེ་ཙོང་ཁ་པ་ཆེན་པོས་བླ་མ་དབུ་མ་པར་འཕྲིན་ཕུལ་བའི་ནང་། མཚོ་སྔོན་པར་མ་དེབ་གཟུགས་རྗེའི་གསུང་ཐོར་བུའི་ཤོག་གྲངས་༡༢༨ ཕྲེང༌ ༢ བསག་སྦྱང ་གི་སྒོ་དུ་མ་ནས་འབད་པས་ད་ལྟ་གསུང་རབ་སྤྱི་དང་དགོངས་འགྲེལ་གྱི་བསྟན་བཅོས་ཆེན་པོ་རྣམས་ལ་ཁོལ་བཏོན་རེ་ཙམ་མིན་པའི་ལུས་ཡོངས་སུ་རྫོགས་པ་ཉམས་ལེན་དུ་འགྲོ་བའི་ཕྱོགས་སུ་ཤེས་པ་ཡོད། ཚུལ་དེ་ལ་ངེས་པ་བདེ་བླག་ཏུ་སྟེར་བར་བྱེད་པ་ནི་བདག་དང་གཞན་གྱི་གྲུབ་པའི་མཐའ་རྒྱ་མཚོ་ལྟ་བུའི་ཕ་རོལ་ཏུ་སོན་ཅིང་། ནང་རིག་པའི་སྡེ་སྣོད་གསུམ་གྱི་སྙིང་པོ་བསླབ་པ་གསུམ་གྱི་གནད་རྣམས་ཕྱིན་ཅི་མ་ལོག་པར་ཤེས་ནས་ཁས་བླངས་པ་ཙམ་ལ་མ་བཞག་པར་ཉམས་འོག་ཏུ་ཚུད་པར་མཛད་པ་མཁས་ལ་གྲུབ་པ་བརྙེས་པའི་དགེ་བའི་བཤེས་གཉེན་དུ་མས་རྗེས་སུ་བཟུང་བ། ལྷག་པའི་ལྷ་དཔག་ཏུ་མེད་པས་བྱིན་གྱིས་བརླབས་པའི་སེམས་དཔའ་ཆེན་པོ་དཔལ་མར་མེ་མཛད་ཡེ་ཤེས་ཀྱི་གདམས་པ་བྱང་ཆུབ་ལམ་གྱི་རིམ་པའི་མཚན་ཉིད་དང་། སྔགས་ཀྱི་ཐེག་པའི་ལམ་གྱི་རིམ་པ་ཕྱིན་ཅི་མ་ལོག་པར་གཏན་ལ་ཕབ་པ་ཉིད་ཡ་མཚན་པར་མཐོང་ནས་སློབ་མ་བཀྲི་བའི་རིམ་པ་རྣམས་དེ་ཁོ་ནའི་སྟེང་ནས་བྱེད་ཀྱིན་ཡོད། གདམས་ངག་དེ་ཡང་གསུང་རབ་དགོངས་འགྲེལ་གྱི་བསྟེན་བཅོས་མན་ངག་མཐའ་དག་ལམ་གྱི་རིམ་པ་གཅིག་ཏུ་དྲིལ་ནས་སྟེན་པར་སྣང་བས་འཆད་ཤེས་པ་དང་ཉན་ཤེས་པ་གཉིས་ཀྱིས་བཤད་ཅིང་ཉམས་སུ་བླངས་ན། མན་ངག་ཆུང་ངུ་མ་ཟད་གསུང་རབ་མཐའ་དག་གི་གུང་བསྒྲིགས་ནས་འོང་བར་སྣང་བས་ཁྲིད་ཀྱི་རྣམ་གྲངས་མང་པོ་སྟོན་པ་མ་བྱས། ཞེས་དང༌། ཡང་གསུང་ཐོར་བུ་དེར་ཚ་ཁོ་དབོན་པོ་ངག་དབང་གྲགས་པ་ལ་གདམས་པ་ལས། ཤོག་གྲངས་༣༤༦ ཕྲེང་ ༡༧ཆོས་ཀྱི་རྗེ་ཉིད་ཀྱིས་བརྙེས་པའི་གོ་འཕང་ལ་ གདུལ་བྱ་རྣམས་དངོས་དང་བརྒྱུད་པས་བཀྲི་བར་བཞེད་ནས་མདོ་སྡེ་དང་རྒྱུད་སྡེའི་རིམ་པ་གསུངས་པའི་མདོ་ནས་འབྱུང་བའི་ཐར་པ་དང་ཐམས་ཅད་མཁྱེན་པར་བགྲོད་པའི་ལམ་གྱི་རྣམ་པར་བཞག་པ་འདིས། རྒྱལ་བའི་བསྟན་པ་སྤྱིའི་རྐང་བཟུང་ནས་གདུལ་བྱ་མཆོག་དམན་འགའ་ཞིག་ལ་རྒྱུད་སྡེའི་ལམ་གྱི་སྣོན་པ་བཏབ་ནས་རྒྱལ་བའི་བསྟན་པ་ཡོངས་སུ་རྫོགས་པར་འཛིན་པ་འདི། གསུང་རབ་ཐམས་ཅད་གདམས་ངག་ཏུ་ཤར་བའི་རྒྱ་བོད་ཀྱི་མཁས་པ་ཐམས་ཅད་ཀྱི་བཞེད་པ་ཡིན། ཁོ་བོས་ཀྱང་དེ་རྟོགས་པའི་དོན་དུ་ལོ་མང་པོར་བས་མཐའ་བསྟེན་ནས་ཁས་བླངས་པའི་ཚུལ་ཁྲིམས་སྲུང་བ་གཞིར་བཞག།བསག་སྦྱང་གི་ལྷན་ཅིག་བྱེད་རྐྱེན་མང་པོ་དང་ལམ་གྱི་ལུས་ཚང་བའི་དམིགས་རྣམ་སྐྱོང་བའི་ཉམས་ལེན་གྱི་རྒྱུ་ལ་འབད་པས། མཁས་པ་དགྱེས་པའི་མདོ་སྔགས་ཀྱི་ལམ་ཕྱོགས་རགས་པ་ཙམ་མཐོང་ནས། །བསྟན་པ་ལ་དམིགས་པ་འབའ་ཞིག་གིས་ཀུན་ནས་བསླངས་ནས། སྔོན་ལ་ཐེག་པ་ཐུན་མོང་བའི་ལམ་གྱི་རིམ་པ་ཡི་གེར་བཀོད་པ་ཡིན། ཞེས་གསུངས་པ་ལྟར་ལགས་སོ།།དེ་ཡང་ཕྱི་ལོ་ ༡༠༣༦ ཡས་མས་སུ་མངའ་བདག་བྱང་ཆུབ་འོད་ཀྱིས་ཞུས་ངོར་མཉམ་མེད་ཇོ་བོ་ཆེན་པོས་བདེ་བར་གཤེགས་པའི་གསུང་ རབ་དགོངས་འགྲེལ་དང་བཅས་པ་ཉམས་ལེན་དུ་དྲིལ་ཤིང་། གདུལ་བྱ་དབང་པོ་རབ་འབྲིང་ཐ་གསུམ་གྱི་བློ་དང་འཚམ་པའི་བྱང་ཆུབ་ལམ་གྱི་སྒྲོན་མ་སྟོད་མངའ་རིས་སུ་མཛད་པ་ནས་བཟུང༌། གངས་ཅན་ཀྱི་ལྗོངས་སུ་མཁས་པ་དང་བླུན་པོ། བྱ་བཏང་རྣལ་འབྱོར་པ་དང་ཆབ་སྲིད་པ། འབྱོར་ལྡན་དང་འབྱོར་མེད། རྒྱལ་པོ་དང་འབངས། སེར་མོ་བ་དང་སྐྱ་བོ་སོགས་རིས་སུ་མེད་པའི་ཁ་བ་གངས་ཅན་པའི་སྤྱི་ཚོགས་ཀྱི་འདོད་བློ་ཡོངས་སུ་བསྐངས་པ་དང༌། དེ་ནས་བཟུང་ཁྱིམ་མཚེས་རྒྱ་ནག་དང༌། སོག་ཡུལ་བཅས་ལའང་ཁྱབ་གདལ་བྱུང་བ་མ་ཟད། རྒྱ་གར་དུ་ནི་སྟོད་མངའ་རིས་སུ་ཇོ་བོས་ལྗགས་རྩོམ་གནང་ནས་ཆེར་མ་སོང་བར་བིཀྲམཤཱི། ལའི་མཁན་པོ་དང་པཎྜི་ཏ་སོགས་ལ་སྐྱེས་སུ་བསྲིངས་པས་བསྔགས་པ་ཐོབ་ཚུལ་ལ་གཞིག་ན་སྐབས་དེ་དུས་ནས་དར་བར་འདོད་དགོས་སོ།། ཕྱི་ལོ ༡༩༥༩ ལོར་༧སྤྱི་ནོར་ྋགོང་ས་སྐྱབས་མགོན་ཆེན་པོ་སྟོན་འཁོར་བྱེས་སུ་ཕེབས་རྗེས་བོད་མི་སེར་སྐྱ་ཁྲི་ཕྲག་མང་པོས་རང་ཡུལ་བཞག་ནས་རྒྱ་གར་འཕགས་པའི་ཡུལ་དུ་བཙན་བྱོལ་ལ་ཕེབས་རྗེས་གཟོད་ཇོ་བོ་རྗེ་དང་འཇམ་མགོན་བླ་མ་ཙོང་ཁ་པ་ཆེན་པོའི་བྱང་ཆུབ་ལམ་གྱི་རིམ་པའི་ཕྱག་སྲོལ་ཕྱི་གླིང་རྒྱལ་ཁམས་མང་པོའི་སྐད་ཡིག་བརྒྱུད་དར་སྤེལ་བྱུང་བ་དང་། དབང་བསྐུར་སོགས་སྔགས་ཀྱི་བསྟན་པའང་ཕྱི་གླིང་དེ་དག་ཏུ་དར་ཁྱབ་ཆེན་པོ་བྱུང་ཡོད་མོད་ཀྱང་དེ་དག་ཐམས་ཅད་ཀྱིས་སློབ་མ་བཀྲི་བའི་རིམ་པ་ནི་
དངོས་སམ་བརྒྱུད་ནས་བཤད་སྲོལ་འདི་ལ་མི་བརྟེན་ཐབས་མེད་བྱུང་། ཡོད་པ་འདས་པའི་མི་ལོ་ ༣༥ ལོ་རྒྱུས་དང་ཉམས་མྱོང་གིས་ཁུངས་སྐྱེལ་ར་སྤྲོད་བྱས་དང་བྱེད་བཞིན་པ་ཡིན། དེ་ལྟར་བྱང་ཆུབ་ལམ་གྱི་སྒྲོན་མའམ་བསྟན་རིམ་ཆེན་པོ། བྱང་ཆུབ་ལམ་གྱི་རིམ་པ། རྣམ་གྲོལ་ལག་བཅངས་ཞུ་བ་སོགས་དུས་སྐབས་སོ་སོར་མཚན་གྱི་ཟུར་ཅུང་ཟད་མི་འདྲ་བ་དང་།ས་བཅད་བཀྲམ་ཚུལ་རེ་གཉིས་མི་འདྲ་བ། དཀའ་གནད་ཀྱི་བཤད་པ་རེ་ཟུང་མི་འདྲ་བ་ཡོད་མོད་ཀྱང་། ངོ་བོའི་ཆ་ནས་མདོ་རྒྱུད་དགོངས་འགྲེལ་དང་བཅས་པ་གང་ཟག་གཅིག་འཚང་རྒྱ་བའི་ལམ་གྱི་རིམ་པར་འདྲིལ་བ་དང༌། གདུལ་བྱ་དབང་པོ་རབ་འབྲིང་ཐ་གསུམ་ལམ་འོག་མ་ནས་གོང་མར་རིམ་གྱིས་བཀྲི་བའི་ཚུལ་ལས་གཉིས་སུ་མེད། གཞན་ཡང་ལམ་རིམ་རྣམ་གྲོལ་ལག་བཅངས་སུ་གཏོད་པ་ཞེས་བློ་ལྡན་གཟུ་བོར་གནས་པ་ཀུན་གྱིས་ཡོངས་སུ་བསྔགས་པའི་ལེགས་བཤད་འདི་ནི་དུས་རབས་ཉི་ཤུ་པའི་སྟོད་དུ། བོད་གངས་ཅན་གྱི་ལྗོངས་སུ་རྒྱལ་བསྟན་སྤྱི་དང་ལྷག་པར་འཇམ་མགོན་ཆོས་ཀྱི་རྒྱལ་པོ་ཙོང་ཁ་པ་ཆེན་པོའི་བསྟན་པ་ལ་མཛད་རྗེས་རླབས་པོ་ཆེ་འཇོག་པར་མཛད་པའི་བདག་ཉིད་ཆེན་པོ་རྗེ་ཕ་བོང་ཁ་པའམ་༸སྐྱབས་རྗེ་བདེ་ཆེན་སྙིང་པོ་དཔལ་བཟང་པོའི་ཞལ་སྔ་ནས་རབ་བྱུང་བཅོ་ལྔ་པའི་ལྕགས་ལུག །ཕྱི་ལོ་༡༩༢༡ལོར་ལམ་རིམ་གསུང་
ཆོས་བཀའ་དྲིན་ཆེ་སྐབས༸རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོའི་ཡོངས་འཛིན་རིགས་དང་དཀྱིལ་འཁོར་ཀུན་གྱི་བདག་པོ་སྐྱབས་རྗེ་ཁྲི་བྱང་རྡོ་རྗེ་འཆང་ཆེན་པོ་དགུང་ན་གཞོན་པའི་སྐབས་སུ་ཟིན་བྲིས་བཏབ་སྟེ་ལྗགས་རྩོམས་མཛད་པའི་ཚུལ་ལམ་རིམ་འདིའི་དབུ་མཇུག་གཉིས་ཀར་གསལ་བ་མ་ཟད་རྗེ་ཉིད་ཀྱི་རང་རྣམ་མ་བཅོས་ལྷུག་པར་བཀོད་པ་འཁྲུལ་སྣང་སྒྱུ་མའི་ཟློས་གར་ཞེས་བྱ་བ་རྒྱ་གར་རྒྱལ་ས་ལྡི་ལིའི་པར་མའི་ཤོག་གྲངས་ ༤༧ ཉིན་ཕྲེང་ ༣ ནས་འདི་ལྟར། ཉང་བྲན་ཆུ་བཟང་རི་ཁྲོད་ཀྱི་ཆོས་རར་༸སྐྱབས་ཀུན་འདུས་ཞལ་བློ་བཟང་ཐུབ་དབང་རྡོ་རྗེ་འཆང་དངོས་རྗེ་ཕ་བོང་ཁ་པ་ཆེན་པོའི་ཞལ་སྔ་ནས་ཆོས་ཞུ་བ་བླ་སྤྲུལ་དགེ་འདུན་གཙོ་གྱུར་གྱིས་སེར་སྐྱ་ཆིག་སྟོང་བརྒལ་བར་ཟླ་བ་བརྒྱད་པའི་ཚེས་སུམ་ཅུ་ནས་བཟུང་ཉིན་ཉེར་བཞིའི་རིང་ལམ་རིམ་འཇམ་དཔལ་ཞལ་ལུང་དབུས་བརྒྱུད་དང༌། ལྷོ་བརྒྱུད། མྱུར་ལམ་དམར་ཁྲིད་བཅས་གསུམ་སྦྲགས་ཀྱི་སྟེང་ནས་བྱང་ཆུབ་ལམ་གྱི་རིམ་པའི་ཉམས་ཁྲིད་ཞིབ་རྒྱས་སྩལ་བའི་མཇུག་སྨོན་འཇུག་ཅིག་ཅར་འཛིན་པའི་སེམས་བསྐྱེད་ཆོ་ག་དང་བཅས་མཛད་སོང་བའི་ཆོས་གྲལ་དུ་ཞུགས་རྒྱུའི་སྐལ་བཟང་ཐོབ་ཅིང་། བླ་མ་རྡོ་རྗེ་འཆང་འདི་ཉིད་ནས་གསུང་ཆོས་གནང་སྐབས། ཇི་སྐད་དུ། བློ་གྲོས་ལྡན་ལ་ཟབ་རྒྱ་ཆེ། །བློ་ཆུང་གོ་སླ་བཟུང་བདེ་བ། །ཞེས་པ་ལྟར་འཆད་ཚུལ་མཁས་པའི་དབང་གིས་བློ་མཐོ་དམན་ཀུན་གྱིས་གོ་བདེ་ཞིང༌། ཚིག་གི་ན་ཡམ་ཙམ་མིན་པར་མྱོང་སྟེང་དུ་བསྐོར་ཏེ་གནང་བས་ཐམས་ཅད་བློ་སྣ་བསྒྱུར་ཐུབ་པ་ཞིག་མཆིས་སྟབས། འདི་སྐབས་རིང་སེམས་རྟ་རྒོད་རི་ལ་ཡར་འདྲའི་དྲེད་པོ་ལང་ཤོར་འདི་ཆོས་ལམ་དྲང་པོར་འཛུད་པར་མཛད་པའི་བཀའ་དྲིན་བྱང་ཆུབ་སྙིང་པོའི་བར་མགོ་ལ་ཐོད་བཞིན་བཀུར་ཀྱང་གཞལ་ནུས་བྲལ་བར་གྱུར། སྐབས་དེར་བྲག་གཡབ་གདོང་གོང་སྤྲུལ་སྐུས་གསུང་བཤད་ཟིན་བྲིས་ལམ་རོབ་བཀོད་འདུག་པ་སྦྱོར་ཆོས་ཚོགས་ཞིང་སྤྱན་འདྲེན་མཚམས་བར་༧སྐྱབས་མཆོག་རྡོ་རྗེ་འཆང་ཉིད་ནས་གཟིགས་ཞིབ་བསྣོན་འཕྲི་བསྐྱར་ཆོས་མཛད་ཟིན་པའི་འཕྲོ་སྐྱོང་རྣམས་རྗེས་སོར་དོན་གཉེར་ཅན་མང་པོས་སྐུལ་མ་གནང་བ་བཞིན་ལམ་རིམ་གསུང་ཆོས་སྔ་རྗེས་སུ་བསྩལ་བའི་ཟིན་བྲིས་ཁག་ནས་ལེགས་ཆ་ཁུ་བསྡུ་དང༌། དེ་དག་ཏུ་མི་གསལ་བའི་གསུང་བཤད་རང་བློར་ཕྲན་བུ་ངེས་རིགས་གསར་སྣོན་བྱ་འོས་སོགས་བགྱིས་ཏེ་ད་ལྟ་པར་དུ་བཀོད་པ་རྣམ་གྲོལ་ལག་བཅངས་ཞེས་པ་དེ་ཡིན།ཞེས་གསུངས་པ་ལྟར་སྐབས་དེར་ན་ཚོད་ཕྲ་ཡང་མཁྱེན་རྩལ་རྫོགས་པས་བསྟན་འགྲོར་སྨན་པའི་ལག་རྗེས་འདི་ལྟ་བུ་འཇོག་པར་མཛད། དེ་ལྟར་བསྟན་བཅོས་འདི་ནི་བདེ་བར་གཤེགས་པའི་གསུང་རབ་ཀྱི་སྙིང་པོ་ལམ་རིམ་དང་བློ་སྦྱོང་གི་གནད་རྣམས་དཔྱིས་ཕྱིན་པ་སྟོན་པའི་གཞུང་ཞལ་གསལ་ཤོས་དང་། དུས་སྐབས་འདིར་གྲགས་པའི་ཐ་སྙད་དང་སྡེབ་སྦྱོར་དཔེ་དང་ལོ་རྒྱུས་སྣ་ཚོགས་པས་བརྒྱན་པས་དུས་རབས་ཉི་ཤུ་པའི་སྤྱི་ཚོགས་ལ་འཚམ་ཞིང་ཡིད་ལ་སྤྲོ་བ་དབང་མེད་དུ་འཕེལ་བ།ཉམས་ལེན་གྱི་གནད་རྣམས་སེམས་རྒྱུད་འདུལ་བའི་གོ་རིམ་དང་ཇི་ལྟ་བ་བཞིན་དུ་སྦྱར་བས་ཐར་འདོད་རྣལ་འབྱོར་པ་རྣམས་ཀྱི་ལག་ཏུ་ལེན་བདེ་བ་བློ་མཆོག་དམན་སུས་ཉན་ཀྱང་གོ་བདེ་ཞིང་ཡིད་འགུལ་ཐེབས་པ་སོགས་སྐྱབས་རྗེ་བདེ་ཆེན་སྙིང་པོའི་གསུང་རྗེན་པ་དྲོད་མ་ཡལ་བ་དངོས་སུ་ཐོས་ནའང་སེམས་རྒྱུད་ལ་ཕན་ལུགས་འདི་ལྟ་བུ་ཞིག་ལས་ཨེ་ཡོད་སྙམ་ཆོག་པ། མདོར་ན་མཚན་དང་དོན་མཐུན་པའི་མན་ངག་འགྲན་པའི་ཟླ་ཐམས་ཅད་དང་བྲལ་བ། དབེན་པའི་རི་ལ་སྒྲུབ་པ་སྙིང་པོ་མཛད་པའི་བྱ་བཏང་རི་ཁྲོད་པ་རྣམས་ཀྱི་ལམ་ཡིག་ལྟ་བུ། ཆོས་ཁྲི་མཐོན་པོའི་སྟེང་ནས་འཁོར་ཚོགས་རྒྱ་མཚོ་ལྟ་བུར་ཆོས་འཆད་མཛད་པོ་རྣམས་ཀྱི་ལྗགས་ཀྱི་དབང་པོར་གྱུར་པས།དུས་ཕྱིས་མཆོག་དམན་ཀུན་གྱིས་རྒྱུན་བཅངས་གནང་བས་འགྲོ་དོན་ཤིན་ཏུ་ཆེན་པོ་བྱུང་བ་ཡིན། དུས་འགྱུར་མ་བྱུང་གོང་ལྷ་སར་པར་བརྐོས་དཔར་སྐྲུན་ཁྱབ་གདལ་སོང་བ་མ་ཟད། བྱེས་སུ་འབྱོར་ནས་ཀྱང་ཕྱི་ལོ་ ༡༩༦༥ལོར་ཝཱ་རཱ་ཎ་སཱིར་གུ་རུ་དེ་བ་མཆོག་ནས་བསྟན་རྒྱུན་ལ་སྨན་པའི་ཁུར་བཞེས་ཀྱིས་ལྕགས་པར་ཐོག་དཔར་སྐྲུན་བྱས་ཏེ་སྦག་ས་ཆོས་སྒར་ཐོས་བསམ་ཐར་འདོད་གླིང་དུ་འབྱོར། དེ་རྗེས་ཁྲི་བྱང་བླ་བྲང་གི་ཞབས་འབྲང་བ་བློ་བཟང་ཡེ་ཤེས་ཞུ་བས་རྒྱུ་སྦྱོར་ཡོན་བདག་མཛད་དེ་ཕྱི་ལོ་ ༡༩༧༡ཙམ་ལ་ཤིང་པར་ལ་བརྐོ་བར་མཛད་པའི་ཚུལ་
ཤིང་པར་དེའི་ཤོག་གྲངས་༣༩༠ ཉིན་ཕྲེང་ ༣ མཇུག་བྱང་ལས་ལམ་རིམ་ཁྲིད་ཡིག་འདི་ཉིད་འགྲོ་དོན་ཆེ་ཡང་ཕྱོགས་འདིར་དཔེ་རྒྱུན་དཀོན་སྟབས་
དོན་གཉེར་ཅན་རྣམས་ལ་སྨན་ཕྱིར་ཁྲི་བྱང་བླ་བྲང་ཞབས་ཁོངས་ཆ་ཕྲེང་དགེ་སློང་བློ་བཟང་ཡེ་ཤེས་ནས་ལྷག་བསམ་ཆེ་བསྐྱེད་དཔར་སྐྲུན་རྒྱུ་སྦྱོར་གྱིས་ཞེས་པ་ནས། ཡི་གེའི་འདུ་བྱེད་ལ་ལག་སོར་གྱི་ཟློས་གར་བསྒྱུར་མཁས་འབྲས་ལྗོངས་ཕ་ཏམ་ཙན་པ་སྤེན་པ་ནོར་བུ་ལགས་ནས་ལོ་ངོ་བཞིའི་རིང་འཚོ་བ་ངན་ངོན་ཙམ་གྱིས་ཆོག་ཤེས་དང་འབྲེལ་པར་བརྐོའི་ཁུར་འགན་གཙོ་བོར་བླངས་ཤིང་། སློབ་ཕྲུག་དགའ་ཤར་རྡོ་ཁང་ཡང་སྟེང་བློ་བཟང་ལྷུན་འགྲུབ་དང་།
རྡོ་ཁང་བསམ་གླིང་བཟོད་པ་ཐོགས་མེད་གཉིས་ནས་དཔར་བརྐོའི་ལག་རྩལ་སློབ་སྦྱོང་དང་སྦྲགས་ལས་རོགས་རྒྱུན་འཁྱོངས་བགྱིས་པ་བཅས་ཀྱི་རྣམ་པར་དཀར་བ་ཇི་སྙེད་ཅིག་མཆིས་པ་དེ་དག་བདག་གཞན་ཞེས་སོགས་ཀྱིས་བསྔོ་སྨོན་མཛད་པ་ལྟར་ཕྱག་དཔེ་སྟོང་ཕྲག་བརྒལ་བ་དཔར་སྐྲུན་གནང་ཟིན་པ་གོར་མ་ཆག།
གཞན་ཕྱི་ལོ་༡༩༨༠ཙམ་ལ་རྒྱ་ནག་གཞུང་གིས་ཆོས་དད་རང་མོས་ཞེས་པའི་སྲིད་བྱུས་ཁྱབ་བསྒྲགས་བྱས་མཚམས་ནས་ལྷ་སར་གཏན་བཞུགས་དཔར་པ་དཔལ་ལྡན་ཞེས་པས་སྐྱབས་རྗེ་ཕ་བོང་ཁ་པའི་གསུང་འབུམ་དང་། སྐྱབས་རྗེ་ཁྲི་བྱང་རྡོ་རྗེ་འཆང་རྣམ་གཉིས་ཀྱི་གསུང་འབུམ་ཁ་སྐོང་དང་བཅས་པ་དཔར་སྐྲུན་གནང་བ་ལྟར་ལམ་རིམ་རྣམ་གྲོལ་ལག་བཅངས་བཅས་བོད་ནང་ཁུལ་དུ་སླར་ཡང་ཁྱབ་སྤེལ་ཆེན་པོ་བྱུང་ཡོད་གཤིས། རྒྱ་གར་ལའང་ལྷ་སའི་སྤར་མ་རིམ་པར་འབྱོར་སོང་། གཞན་ཡང་དཔར་སྐྲུན་བོད་སྐད་ཙམ་མ་ཡིན་པར་དབྱིན་སྐད་ཐོག་ཏུ་ཕབ་བསྒྱུར་བྱས་ཡོད་པ་སྟེ། ཨོ་སི་ཀྲི་ལི་ཡའི་སྐུ་ཞབས་མལ་ཁལ་རི་ཆི་ཌི་ཞུ་བ་ཕྱི་ལོ་ ༡༩༧༨སྐོར་བཞུགས་སྒར་རྡ་རམ་ས་ལར་བོད་ཀྱི་དཔེ་མཛོད་ཁང་དུ་ཆོས་རིག་སློབ་གཉེར་མཛད་སྐབས་ལམ་རིམ་རྣལ་གྲོལ་ལག་བཅངས་སུ་གཏོད་པ་དབུ་ནས་མཇུག་བར་དབྱིན་སྐད་དུ་བསྒྱུར་བའི་ཤོག་ལྡེབས་རེ་ཟུང་མ་གཏོགས་དབུ་ནས་མཇུག་བར་བྱིངས་ཕབ་བསྒྱུར་གྱི་ཞབས་འདེགས་ངེད་རང་ནས་ཞུས་པ་དང་། ཚོགས་གསོག་སྒྲིབ་སྦྱོང་ལ་བསམ་སྟེ་གླ་ཕོགས་སྒོར་གཅིག་ཀྱང་མེད་པར་དང་བླངས་ཁོ་ནས་ཞུས་པ་ཡིན། ཕྱིས་སུ་ཨ་རིའི་གྲོང་ཁྱེར་སྦོ་སི་ཊོན་ནང་དུ་ཡོད་པའི་ཝི་ཟི་ཌམ་དཔར་སྐྲུན་ཁང་ནས་དཔར་སྐྲུན་བྱས་པ་དེ་ཡིན། དེ་དང་ཕྱོགས་མཚུངས་ཨ་རིའི་མངའ་སྡེ ་ནེའུ་ཇི ར་ཟི་ལ་བཅའ་བཞུགས་སེར་སྨད་རྒྱལ་རོང་མཁན་ཟུར་བློ་བཟང་མཐར་ཕྱིན་གྱི་ཆོས་ཚོགས་ནས་རྣམ་གྲོལ་ལག་བཅངས་དབྱིན་སྐད་དུ་ཕབ་བསྒྱུར་དཔར་སྐྲུན་གནང་འདུག་ཅེས་ཐོས་པས་དབྱིན་སྐད་གཅིག་པུའི་ནང་འགྱུར་གཉིས་བྱུང་འདུག།དེ་མིན་འཇར་མན་དང༌། ཕ་རན་སིའི་སྐད་སོགས་གཞན་དང་གཞན་དུ་བསྒྱུར་ཡོད་མེད་ཆ་མ་འཚལ། རྒྱ་ནག་སྐད་དུ་སྔར་བསྒྱུར་ཟིན་མེད་ཀྱང་རིམ་གྱིས་བསྒྱུར་བར་འགྱུར་བའི་ཡིད་ཆེས་བྱེད་ཐུབ། དེ་ལྟར་གཞིས་བྱེས་གཉིས་སུ་སྐད་རིགས་མི་འདྲ་བའི་ཐོག་དཔར་སྐྲུན་ཟིན་ཀྱང་བོད་སྐད་ཐོག་དེབ་གཟུགས་སུ་ད་ཕན་དཔར་སྐྲུན་ཞུས་མེད་ཚོད། དེང་སང་དུས་རབས་གསར་པའི་ནང་ལག་ཏུ་བཅངས་བདེ་ཁྱད་ཀྱིས་དེབ་གཟུགས་བྱས་པ་དང་། གཟིགས་བདེའི་སླད་རྩ་བའི་ས་བཅད་དང་སྦྱར་བའི་ལེ་ཚན་རྣམས་དཀར་ཆག་རེའུ་མིག་ཤོག་གྲངས་མཐུན་པར་བཀོད་ཡོད། འདིའི་མ་ཕྱི་ནི། མོན་གྷོ་ཊར་དགའ་ལྡན་རྣམ་པར་རྒྱལ་བའི་གླིང་ཤར་རྩེ་གྲྭ་ཚང་དུ་ཕྱི་ལོ་༡༩༧༡ ནས་ཕྱི་ལོ་༡༩༧༤ བར་ལོ་ངོ་བཞིའི་རིང་ཤིང་དཔར་དུ་
རྐོ་བར་མཛད་པའི་རྣམ་གྲོལ་ལག་བཅངས་ཀྱི་སྤར་མ་དེ་ལ་གཞི་བཅོལ་བ་ཡིན། དེའང་ཕྱི་ལོ་ ༡༩༥༩ སྔོན་ལྷ་སར་དཔར་རྐོ་མཛད་པའི་སྤར་མ་ཁག་གཉིས་ཙམ་
རྒྱ་གར་དུ་འབྱོར་བ་ལས་གཅིག་པར་ཤིང་ལ་སྦྱར་ཏེ་པར་རྩ་གནང་། གཅིག་ཤོས་སྟེང་རྩོམ་པ་པོ་སྐྱབས་རྗེ་ཁྲི་བྱང་རྡོ་རྗེ་འཆང་སྐུ་ངོ་མས་ཕྱག་བསྟར་ཐོག་ཞུས་དག་གནང་བས་ཁུངས་ལྡོན་ཡིད་ཆེས་འཕེལ་བར་ངོས་འཛིན་ཞུས་ཏེ་མ་ཕྱིར་བཅོལ་བ་ཡིན། མ་ཕྱི་འདིའི་སྟེང་ནས་ཞུ་དག་ལན་བརྒྱད་ཞུས་ཏེ་དཔར་སྐྲུན་བྱས་པ་ཡིན་པས་ནོར་འཁྲུལ་གང་ཉུང་བའི་ཡིད་ཆེས་ཡང་ཞུ་གི་ཡོད། མཛད་པ་པོའི་རྣམ་ཐར་ཞིབ་རྒྱས་མཁྱེན་པར་འདོད་པ་རྣམས་ཀྱིས་རང་རྣམ་འཁྲུལ་སྣང་སྒྱུ་མའི་ཟློས་གར་ལས་ཤེས་པར་བྱ་ཞིང་རྩོམ་པ་པོ་ངོ་སྤྲོད་ཀྱི་ཕྱིར་ཐུན་མོང་ཀློག་པ་པོའི་བློ་དང་། གཞན་ཡང་ཀླད་པ་གསར་པ་ཚོའི་ཁམས་དང་མཐུན་པའི་རྣམ་ཐར་གྱི་སྙིང་བསྡུས་འགའ་ཞིག་གླེང་བའི་སྒོ་ནས་ངོ་སྤྲོད་ཅིག་ཞུས་ན། རྗེ་འདི་ཉིད་དགའ་ལྡན་དང་ལྷ་སའི་ལམ་ཕྱེད་ཚལ་གུང་ཐང་ཞེས་པར་སྐུ་བལྟམས་ཤིང་༸རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོས་ངོས་འཛིན་དང་ཁྲིར་གསོལ་མཛད། འོན་ཀྱང་ཁམས་ཆ་ཕྲེང་དུའང་ཁྲི་བྱང་རིན་པོ་ཆེའི་སྤྲུལ་སྐུ་ཞིག་བླུས་ནས་ལྷ་སར་ངོས་འཛིན་ཞུས་པའི་དབུས་སྤྲུལ་དེ་ཁས་མི་ལེན་པའི་ཕྱོགས་ཤིག་ཡོད་པས་དབུས་སྤྲུལ་བླ་བྲང་དང་བཅས་པར་སྐུ་ངལ་ཕྲད་རྒྱུའི་གནས་ཚུལ་ཆགས་ཡོང་གི་ཡོད་འདུག དེའི་ཐོག་ལ་དགུང་ལོ་བདུན་པ་ན་ཚོད་ཤིན་ཏུ་ཕྲ་སྐབས་ཡབ་ཞི་བར་གཤེགས་པས་སྐུ་མཆེད་ཨ་ནེ་གཡང་འཛོམས་དང་ཟླ་བོ་ཨ་ཕོ་སོགས་ཀྱིས་གོང་རིམ་ལ་ཞུ་ཕྲ་སོང་རྐྱེན་རིན་པོ་ཆེའི་མ་ཡུམ་མ་མད་གསུམ་ཁྱིམ་ནས་བཏོན་ཏེ་སྒོ་ཐེལ་བརྒྱབ་པ་དང་། དེ་ནས་བཟུང་ཕ་ཕྱོགས་ཀྱི་སྐུ་ཉེ་ཚོས་སྐྱབས་རྗེ་རིན་པོ་ཆེར་ཡང་རྒྱལ་བའི་མཚན་ཞབས་མ་མཛད་བར་འབྲེལ་བ་ཙམ་ཡང་བྱས་མི་འདུག་ལ། རྗེ་མི་ལའི་མ་ཡུམ་ཉང་ཚ་དཀར་རྒྱན་དང་། སྲིང་མོ་བྲེ་ཏ་མགོན་སྐྱིད་གཉིས་ཀྱི་དཀའ་སྡུག་གི་གནས་ཚུལ་དང་འདྲ་བར་ཉེ་དུ་དགྲར་ལངས་བྱུང་བའི་གནས་ཚུལ་གསན་པས་ཐུགས་སྐྱོ་བ་ཚད་མེད་བྱུང་འདུག དགུང་གྲངས་བཅོ་བརྒྱད་པར་ཕྱག་མཛོད་སྐུ་གཤེགས་སྐབས་བླ་བྲང་ངམ་གཟིམ་ཤག་ནང་དངོས་ཡོད་མར་ལྟང་ཕྱེད་གཉིས་དང་། ཇ་སྦག་རེ་ཟུང་ཙམ་མ་གཏོགས་ཉེར་མཁོའི་བཟའ་བཏུང་གི་རིགས་ཀྱང་རྫོགས། ལག་སྣེ་གཏོང་བྱེད་དངུལ་སྲང་བརྒྱ་ཡང་མ་ལོངས། འོན་ཀྱང་བུ་ལོན་གང་འཚམ་ཚུར་བསྡུ་རྒྱུ་ཡོད་རེས་ཡིག་རིགས་འཚོལ་ཞིབ་སྐབས་བརྗེད་ཐོ་དེབ་ཆུང་ཞིག་རྙེད་པས་ཚུར་བསྡུ་རྒྱུ་ཕར་ཞོག་གཞུང་སྒེར་ཇི་རིགས་ལ་ཕར་བུ་ལོན་མ་སྐྱེད་གཉིས་ཀ་བསྡོམས་རྡོ་ཚད་ ༢༩༤ སྤྲོད་དགོས་པ་གསལ་ཞིང༌། དེའི་ཐོག་ཏུ་ཕྱག་མཛོད་དམ་པའི་དགོངས་རྫོགས་སྒྲུབ་བྱེད་རྡོ་ཚད་དྲུག་བུན་སྐྱེད་དུ་བླངས་ཏེ་བསྡོམས་རྡོ་ཚད་གྲངས་༣༠༠ཐམ་པའི་མ་སྐྱེད་གཉིས་དང་། རིན་པོ་ཆེའི་དགེ་བཤེས་གཏོང་སྒོ་སོགས་བླ་བྲང་གི་ལས་འགན་ཐམས་ཅད་གྲྭ་རྐྱང་དཀྱུས་མའི་ཚུལ་དུ་འཚར་ལོངས་གནང་བའི་རྒན་ཡོངས་འཛིན་དམ་པ་དང་དགུང་ན་ཕྲ་བའི་སྐྱབས་རྗེ་རིན་པོ་ཆེ་རྣམ་གཉིས་ཀྱི་ཕྲག་པར་ལྷུང་བ་དང༌། རྒྱུན་དུ་འཚོ་བའང་བཀྲེན་ནེ་བ་ཞིག་ལས་མེད་པས་སང་ཉིན་གསོལ་ཚིགས་ཀྱི་མགྲོན་བརྡ་ཕུལ་མཁན་བྱུང་བའི་ནུབ་མོ་ཐུགས་སྤྲོ་ལྷང་ངེའི་ངང་གཟིམ་ཆོག་པ་ཡོད་ཚུལ་དང་།
།སྐབས་ཤིག་རིན་པོ་ཆེའི་མལ་གཟན་ནས་ཤིག་བསྒྲགས་སྐབས་སྤུ་དང་ཤིག་འདྲེས་པ་དཀར་ཡོལ་གང་བྱུང་བ་དང་། རྒྱུན་དུ་ན་བཟའ་འང་ལྷན་པ་ཅན་རྙིང་སོང་ལས་བཞེས་རྒྱུ་མེད་པས་སྨོན་ལམ་ཚོགས་སྐབས་སེ་འབྲས་ཀྱི་འབྱོར་ལྡན་བླ་སྤྲུལ་ཚོས་ཕྱིའི་ན་བཟའ་རྒྱས་སྤྲོས་བཞེས་པར་སྨོན་པ་མཛད་དགོས་བྱུང་བ་སོགས། མདོར་ན་ཨ་མ་ལགས་མ་མད་བཅས་ལ་ཉེ་ཕྱོགས་དགྲར་ལངས་ཀྱིས་བརྙས་འཚོལ། བུ་ལོན་རྡོ་ཚད་༣༠༠མ་སྐྱེད་སྤྲོད་དགོས་པ་སོགས་ནང་གི་ཐུགས་ཁྲལ་དང་། རྒྱུན་དུ་བཟའ་བཏུང་ན་བཟའ་འང་ངན་ངོན་ཙམ་ལས་མེད་པས་སྐུ་ངལ་སོགས་ཕྱི་ནང་གཉིས་ནས་བསུན་གཙེར་ཆེ་བ་སྐྱེ་བོ་ཕལ་པས་ཐེག་པར་དཀའ་བའི་སྐུ་ངལ་འོག་སྙིང་སྟོབས་མ་ཞུམ་པར་དགེ་བའི་བཤེས་གཉེན་ཡོངས་འཛིན་དམ་པ་དང་ལྷན་འགྲོ་ལྷན་བཞུགས་ཐོག་བསམ་སྦྱོར་དག་པས་བསྟེན། དགུང་ལོ་བཅུ་གསུམ་པར་སུས་ཀྱང་མ་བསྐུལ་བར་རང་མོས་ཀྱིས་ཡོངས་འཛིན་དམ་པ་སྐུ་གཟིམ་གནང་བར་བྱོན་རྗེས་རྒྱུན་དུ་རྒན་གྱིས་མ་ཚོར་བར་ཐོག་མར་བཀའ་འགྱུར་ཁྲོད་ཀྱི་འདུལ་བ་ལུང་ནས་དབུ་བཙུགས་ཏེ་མར་མེའི་འོད་ལས་ཤོག་གྲངས་ལྔ་བཅུ་སྐོར་ལྗགས་ཀློག་གནང་བས་རིམ་བཞིན་བཀའ་འགྱུར་ཆ་ཚང་དང་། བསྟན་འགྱུར་ཕྱེད། རྗེ་ཡབ་སྲས་ཀྱི་གསུང་འབུམ་དང་བླ་མ་གོང་མ་དག་གི་གསུང་འབུམ། རྣམ་ཐར། མདོ་སྔགས་རིག་གནས་སོགས་ཐོར་བུའི་རིགས་འདི་མ་བཀླགས་བྱ་བ་མེད་པར་མཛད་པ་དང༌། ལྔ་རིག་སྨྲ་བ་འབྲས་སྒོ་ཀླུ་འབུམ་དགེ་བཤེས་ཤེས་རབ་རིན་པོ་ཆེའི་དྲུང་ནས་སྙན་སུམ་གསན། དེའང་རྗེ་ཙོང་ཁ་པ་ཆེན་པོས། དང་པོ་རྒྱ་ཆེན་ཐོས་པ་མང་དུ་བཙལ། །ཞེས་གསུངས་པ་ལྟར་གསན་བསམ་མཐའ་འཁྱོང་མཛད་དེ་དགུང་ལོ་བཅུ་དགུའི་ཐོག་ལྷ་རམས་གྲྭ་སྐོར་དམ་བཅའ་འཇོག་པར་མཛད་དེ་ཨང་གསུམ་པའི་མཚན་གནས་བཞེས། དེ་ནས་རྒྱུད་ལ་བྱོན་སྐབས་རྒྱུད་པའི་གྲྭ་རྐྱང་དཀྱུས་མའི་ཚུལ་དུ་ཚོགས་ཆོས་འགྲིམ་པ་མ་གཏོགས་དམིགས་བསལ་མ་བཞེས་པ་དང་། དགའ་ལྡན་ཤར་རྩེ་གྲྭ་ཚང་གི་འདོན་རྟ་དབྱངས་རྡུང་ཕྱག་ལེན་སྔར་ནས་བྱང་བར་མཁྱེན་ཐོག བློས་བསླངས་དང་རྡུལ་ཚོན་དཀྱིལ་འཁོར་གྱི་ཐིག་རྩ་ལག་ལེན་དང་བཅས་པ། ལྕགས་མཁར་ཟོར་བཅུ་དྲུག་སོགས་མཆོད་བཟོ་དང་བཅས་པ་དཔྱིས་ཕྱིན་པ་བྱང་བར་མཛད། གཞན་ཡང་རིགས་དང་དཀྱིལ་འཁོར་ཀུན་གྱི་ཁྱབ་བདག་༸སྐྱབས་རྗེ་ཕ་བོང་ཁ་བ་སོགས་མཚན་ལྡན་བླ་མ་དམ་པའི་ཞབས་པད་སངས་རྒྱས་དངོས་སུ་བལྟ་བའི་བསམ་སྦྱོར་དག་པས་བསྟེན་ཏེ་མདོ་སྔགས་ཀྱི་ཆོས་ཚུལ་མཐའ་དག་བུམ་པ་གང་བྱོའི་ཚུལ་དུ་གསན། གང་གསན་པ་རྣམས་ཐོས་ལོ་ཙམ་དུ་མ་སོང་བར་ཉམས་བཞེས་མཛད་པས་མཐར་༸སྐྱབས་རྗེ་ཕ་བོང་ཁ་བ་བདེ་ཆེན་སྙིང་པོས་རང་གི་དབུ་ཞྭ་པཎ་ཞྭ་སྣེ་རིང་སེར་པོ་དེ་ཉིད་རྗེ་འདི་ཉིད་ཀྱི་དབུ་ལ་གཡོག་སྟེ་སྤྱིར་ཡོངས་རྫོགས་བསྟན་པའི་བདག་པོ་དང་ལྷག་པར་བྱང་ཆུབ་ལམ་གྱི་རིམ་པའི་བཀའ་བབས་ཀྱི་བདག་པོར་དབང་བསྐུར། དགུང་གྲངས་ཉེར་བཞིའི་ཐོག་ཆ་ཕྲེང་དུ་བྱོན་སྐབས་ལོག་པར་འཁུ་བ་དུ་མས་རྗེ་འདི་ཉིད་ཀྱི་སྐུ་སྲོག་ལ་བསྡོ་བའི་སྦྱོར་བ་བརྩམས་པ་ན་ངན་གཤོམ་བྱེད་གཏེ་རྣམས་ལ་འཁོན་འཛིན་གནང་རྒྱུ་ལྟ་ཞོག བླ་མའི་སྐུ་དགྲ་དེ་དག་ལ་ལས་འབྲས་དང་ཆོས་སྐྱོང་སྲུང་མས་བཀའ་ཆད་ཕོག་པ་ན་སྲོག་ལས་སྐྱོབ་ཕྱིར་རང་གི་སྐུ་སྲོག་ལ་ཉེན་ཁ་དེ་ཙམ་ཡོད་པ་ཡལ་བར་དོར་ནས་ཕ་རོལ་པོའི་ཁྱིམ་དུ་བྱོན་ཏེ་འདོད་ཆོས་བསྩལ་བ་སོགས་རྒྱལ་སྲས་བདག་ཉིད་ཆེན་པོ་དག་གི་སྙིང་སྟོབས་བདག་གིར་བཞེས་པ་འདི་གཅིག་པུའི་མཛད་པ་ལ་ཡང་ལྷ་དང་བཅས་པའི་ཕྱག་གི་ཡུལ་དུ་གྱུར། རིམ་གྱིས་གཞུང་ནས་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོའི་མཚན་ཞབས་དང་ཡོངས་འཛིན་དུ་མངའ་གསོལ། མདོར་ན་ཨ་ནེ་གཡང་འཛོམས་ཀྱིས་བརྙས་བཅོས་ཚོད་མེད་མྱངས། དངུལ་རྡོ་ཚད་སུམ་བརྒྱའི་བུ་ལོན་འོག་ཏུ་ཚུད། ན་བཟའ་ཤིག་གིས་གང་བའི་གྲྭ་རྐྱང་དཀྱུས་མས་སློབ་གཉེར་མཛད། ཉེས་མེད་སྐྱེས་བུའི་སྲོག་དེ་རིང་སང་ཉིན་ལས་བརྟན་ཨེ་ཡོང་ཞེས་གནས་ཚུལ་ཛ་དྲག་པོའི་འོག་འཚར་ལོངས་བྱུང་བའི་སྐྱེས་བུ་ཆེན་པོ་འདི་ཉིད་མཐར་བོད་ཆོས་སྲིད་གཉིས་ལྡན་གྱི་རྒྱལ་ཁབ་ཆེན་པོའི་འཕྲིན་ལས་ཀྱི་ཁ་ལོ་བསྒྱུར་བ་པོ་དང་། བོད་བསྟན་སྲིད་གཉིས་ཀྱི་སྲོག་གི་ཀ་བ་༸གོང་ས་༸སྐྱབས་མགོན་ཆེན་པོའི་ཕྱག་རྟེན་འཁར་རྒྱུག་ལྟ་བུར་གྱུར་པ་བསྟན་དགྲ་རྒྱ་དམར་གྱིས་འགོ་ཁྲིད་ནས། སློབ་གྲྭའི་སྤྱི་ཁྱབ་དང་། རང་སྐྱོང་ལྗོངས་ཀྱི་ཚོགས་འཐུས། ཆོས་དོན་ལས་ཁུངས་ཞེས་པའི་གཙོ་འཛིན་སོགས་ཀྱི་མཚན་གནས་སྙན་སྙན་མང་པོ་ཕུལ་ཏེ་དབུ་སྐོར་ཞུ་རྩིས་བྱས་ཀྱང་ཞལ་བཞེས་གཏན་ནས་མ་གནང་བར་བརྟེན་དགྲ་བོས་བོད་ཀྱི་ཆེ་རྒུ་སུ་ལའང་མ་བྱས་པའི་སྡོངས་ཟུག་ཞུས་པ་དང་།སུ་ལའང་མ་བརྗོད་པའི་སྐུར་འདེབས་མཚན་སྨད་ཞུས་པ་མ་ཟད།
རྗེ་འདི་ཉིད་ཀྱི་དངོས་སློབ་བོད་དུ་ལུས་པ་ཇི་སྙེད་ལ་སྐུར་འདེབས་མཚན་སྨོད་བྱེད་དགོས་ཞེས་སྲོག་ལ་སྡིག་ར་བསྐུལ་ནའང་མ་ཉན་པས་མཐར་བརྡུང་བརྡེག་འོག་གྲོངས་འདུག བྱེས་སུ་ཕེབས་རྗེས་དབྱངས་ཅན་མགྲིན་པར་ཆགས་པའི་སྙན་ངག་པའི་མཇུག་སྡུད་ལྟ་བུར་འཚོ་བཞུགས་ཀྱིས་བོད་རྒྱལ་གླུ་སྲིད་ཞིའི་ཕན་བདེ་མ་དང་། བཙན་བྱོལ་ཟློས་གར་བའི་གླུ་གཞས་སྣ་ཚོགས་ལྗགས་རྩོམ་མཛད། གཞན་ཡང་སྔ་ཕྱིར་ཡི་དམ་སྒྲུབ་སྐོར། ཆོས་སྐྱོང་གི་ལས་ཚོགས། ལམ་རིམ་བློ་སྦྱོང་གི་སྐོར། ཞབས་བརྟན་གསོལ་འདེབས་སྐོར། སྙན་རྩོམ་ཆབ་ཤོག་སྐོར་སོགས་གསུང་འབུམ་པོད་བརྒྱད་ཙམ་བཞུགས། མཐར་དགུང་གྲངས་གྱ་གཅིག་པའི་ཐོག །གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་བའི་ཕྱིར་གཟུགས་སྐུའི་བཀོད་པ་ཆོས་ཀྱི་དབྱིངས་སུ་བསྡུས། སྐུ་གདུང་ཞུགས་ལ་ཕུལ་བས་རིང་བསྲེལ་ངོ་མཚར་བ་དང་། སྐུ་གདུང་རགས་པ་མེས་ཚིག་པའི་ཤུལ་ན་སྐུ་གདུང་གཉིས་པ་ཁྲུ་གང་བ་ཙམ་བཞུགས་པ་ད་ལྟ་མོན་གྷོ་ཊར་འབྲོག་རི་བོ་ཆེ་དགའ་ལྡན་རྣམ་པར་རྒྱལ་བའི་གླིང་དུ་ཁྲི་བྱང་བླ་བྲང་ཞབས་བརྟན་ལྷ་ཁང་གི་རྟེན་གཙོ་སྐུ་གདུང་མཆོད་རྟེན་གྱི་ནང་གཟུངས་སུ་བཞུགས། ལྷར་བཅས་འགྲོ་བའི་གཙུག་ནོར་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོས་སྒྲིབ་བྲལ་ཡེ་ཤེས་ཀྱི་གཟིགས་ངོར་མཆོག་སྤྲུལ་ཟླ་གཞོན་གསར་པ་ངོས་འཛིན་འཁྲུལ་པ་མེད་པ་གནང་བའི་ཡང་སྲིད་མཆོག་སྤྲུལ་རིན་པོ་ཆེ་གོང་མའི་བཞུགས་ཁྲིར་མངའ་གསོལ་གྲུབ་ནས་དགའ་ལྡན་རྣམ་པར་རྒྱལ་བའི་གླིང་དུ་གསན་བསམ་སློབ་གཉེར་སོགས་གོང་མའི་རྣམ་ཐར་བདག་གིར་མཛད་བཞིན་པ་འདིའོ།། རྗེ་ཡང་བདག་དང་བདག་འདྲའི་ཐ་མལ་བའི་སྣང་ངོར་ཡང་སྐྱབས་རྗེ་དམ་པ་དེ་ཉིད་ལ་ཇི་ཙམ་བློ་འགེལ་གྱིས་ཞབས་པད་བསྟེན་པ་དེ་ཙམ་གྱིས་ལྷག་པར་དུ་བརྩེ་བས་འགྲོ་འཆག་ཉལ་འདུག་གི་སྤྱོད་ལམ་གང་གི་ཐད་ལ་མི་སླུ་ཞིང་རྗེས་སུ་བརྩེ་བས་བཀའ་སློབ་བསྩལ་བ་སོགས་ཐུགས་རྗེ་ལྕགས་ཀྱུས་མི་འདོར་བ་ཉམས་མྱོང་གིས་གྲུབ། དེ་ལྟར་ཡབ་རྗེ་ཆོས་ཀྱི་རྒྱལ་པོའི་སྐུ་གསུང་ཐུགས་ལ་ཅུང་ཟད་བསྟོད་པའི་དགེ་བས་རང་གཞན་ཚེ་རབས་ཐམས་ཅད་དུ་ཡབ་རྗེ་ཆོས་ཀྱི་རྒྱལ་པོས་འབྲལ་མེད་རྗེས་སུ་འཛིན་པའི་རྒྱུར་གྱུར་ཅིག།ཅེས་ལམ་རིམ་རྣམ་གྲོལ་ལག་བཅངས་དེབ་གཟུགས་སུ་དཔར་དུ་བསྐྲུན་པའི་གླེང་བརྗོད་དུ་རིགས་ཀུན་ཁྱབ་བདག་༸སྐྱབས་རྗེ་རྡོ་རྗེ་འཆང་གི་སློབ་མའི་གྲལ་གཞུག་ཏུ་སྡོད་པ་ཨ་མཆོག་སྤྲུལ་མིང་བ་བློ་བཟང་ཐུབ་བསྟན་མཁྱེན་རབ་ཡེ་ཤེས་རྒྱ་མཚོས་ཕྱི་ལོ་ ༡༩༩༤ ཕྱི་ཟླ་ ༡༠ ཚེས་ ༡༥ཉིན་སྨྲས་སོ།། །།