༄༅། །ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེའི་འཁྲུངས་རབས་གསོལ་འདེབས་ཡིད་བཞིན་ནོར་བུའི་ཕྲེང་བ་ཞེས་བྱ་བ་བཞུགས་སོ།།
ཨོཾ་སྭ་སྟི། གང་གི་ཐུགས་རྗེའི་གྲུ་ཆར་འབུམ་འཇོ་བས། །སྲིད་ཞིའི་རྒུད་པའི་ཚ་གདུང་ཀུན་བཅིལ་ཏེ། །ཕན་དང་བདེ་བའི་པད་ཚལ་རྒྱས་མཛད་པ། །བསླུ་མེད་རིན་ཆེན་གསུམ་གྱིས་ཤིས་པ་སྩོལ། །བློ་གྲོས་བཟང་པོས་འཇམ་དབྱངས་བླ་མ་ཡི། །རིང་ལུགས་སྤེལ་སླད་བླ་མེད་ཡེ་ཤེས་མཆོག །མངོན་དུ་མཛད་ནས་བསྟན་པའི་ཡང་སྙིང་གི །རྒྱལ་མཚན་བསྒྲེངས་མཛད་སྐྱབས་གཅིག་གཙུག་ན་རྒྱལ། །མགོན་ཁྱོད་འོད་གསལ་དབྱིངས་ལས་གཡོ་མེད་ཀྱང༌། །གཞན་ཕན་ཐུགས་རྗེས་གདུལ་བྱའི་ཁམས་བཞིན་དུ། །གངྒའི་རྡུལ་སྙེད་ལས་འདས་སྤྲུལ་པའི་གར། །བསྒྱུར་བའི་ཕ་མཐའ་ཀུན་མཁྱེན་ཡུལ་ལས་བརྒལ། །འོན་ཀྱང་དད་མོས་གསེར་གྱི་ལྡེ་མིག་གིས། །གང་གི་ཡོན་ཏན་མཛོད་གྱི་སྒོ་ཕྱེས་ནས། །འཁྲུངས་རབས་རགས་བསྡུས་ཡིད་བཞིན་ནོར་བུའི་ཕྲེང༌། །སྐལ་བཟང་གཞོན་ནུའི་རྒྱན་དུ་བསྐྲུན་པར་བྱ། །རྣམ་དཀར་ཚོགས་གཉིས་ཆུ་གཏེར་ལས་འཁྲུངས་ཤིང༌། །རྣམ་དག་སྐུ་བཞིའི་ཆ་ཤས་ཡོངས་སུ་རྫོགས། །རྣམ་མང་འཕྲིན་ལས་འོད་དཀར་འབུམ་སྤྲོ་བ། །རྣམ་འདྲེན་ཉི་མའི་གཉེན་ལ་གསོལ་བ་འདེབས། །སར་གནས་རྒྱལ་སྲས་བྱེ་བའི་ནགས་ཀློང་དུ། །སྤངས་རྟོགས་ཡོན་ཏན་ཡན་ལག་བདུན་མཛེས་ཤིང༌། །དོན་གཉེར་ལྷུན་གྲུབ་རིན་ཆེན་རྒྱན་འཆང་བ། །བདེ་གཤེགས་སྤོས་ཀྱི་གླང་བོར་གསོལ་བ་འདེབས། །མངོན་དགའི་ཞིང་མགོན་བཅོམ་ལྡན་མི་འཁྲུགས་པའི། །སྲས་ཀྱི་ཐུ་བོ་ཀུན་གྱི་གཙོར་གྱུར་བ། །གཟུངས་སྤོབས་མངོན་ཤེས་ཏིང་འཛིན་བྱེ་བ་ལ། །དབང་འབྱོར་སྦོས་ཀྱི་གླིང་བོར་གསོལ་བ་འདེབས།།རྒྱལ་ཀུན་ཡབ་དང་རྒྱལ་སྲས་ཚུལ་བཟུང་ནས། །ལུས་ཅན་རྨོངས་པའི་སྨག་རུམ་སེལ་སླད་དུ། །དྲི་མེད་བློ་གྲོས་འོད་ཟེར་སྟོང་འབར་བ། །རྗེ་བཙུན་འཇམ་པའི་དབྱངས་ལ་གསོལ་བ་འདེབས། །རིན་ཆེན་བྱང་ཆུབ་སེམས་ཀྱི་ཆུ་གཏེར་དུ། །རྒྱལ་སྲས་སྤྱོད་པའི་ནོར་བུས་ཡོངས་གང་སྟེ། །རང་གཞན་དོན་གཉིས་ལྷུན་གྱིས་གྲུབ་མཛད་པ། །དྲི་མེད་གྲགས་པའི་ཞབས་ལ་གསོལ་བ་འདེབས། །མ་འོང་དུས་མཐར་མི་བསྲུན་གླ་གློའི་དཔུང༌། །འཇོམས་མཛད་དམག་དཔོན་ཧ་ནུ་མནྠ་དང༌། །དགྲ་བཅོམ་གསེར་རིའི་ཕྲེང་པས་ཡོངས་བསྐོར་བ། །གནས་བསྟན་ཡན་ལག་འབྱུང་ལ་གསོལ་བ་འདེབས། །ཌཱ་ཀིའི་གཙོ་མོ་གསང་བ་ཡེ་ཤེས་ཀྱིས། །རྗེས་བཟུང་ལུང་བསྟན་མཛད་པ་དཀོན་མཆོག་འབངས། །གཞན་ཕན་སྙིང་རྗེའི་དཔལ་ལ་དབང་འབྱོར་བ། །ཆོས་རྒྱལ་དད་པ་བརྟན་ལ་གསོལ་བ་འདེབས། །གྲུབ་མཐའི་ཡང་རྩེ་དཔལ་ལྡན་ཐལ་འགྱུར་བའི། །ལུགས་བཟང་གསལ་མཛད་སློབ་དཔོན་སངས་རྒྱས་བསྐྱངས། །དངོས་སྟོབས་རིགས་པའི་ལུས་སྟོབས་རབ་རྒྱས་པ། །ཕྱོགས་ཀྱི་གླིང་པོའི་ཞབས་ལ་གསོལ་བ་འདེབས། །གསལ་བ་གཉིས་སོགས་ལེགས་བཤད་འོད་དཀར་འབུམ། །སྤྲོ་མཛད་དཔལ་ལྡན་ཟླ་བ་གྲགས་པ་དང༌། །ཡབ་གཅིག་བརྟན་པའི་འཁོར་ལོས་མངོན་སུམ་དུ། །རྗེས་བཟུང་ཛེ་ཏཱ་རི་ལ་གསོལ་བ་འདེབས། །གྲུབ་པའི་དབང་ཕྱུག་པད་མ་ཀཱ་ར་ཡི། །སྒྱུ་འཕྲུལ་དགེ་སློང་ནམ་མཁའི་སྙིང་བོ་དང༌། །སྐད་གཉིས་སྨྲ་བ་ཡོངས་ཀྱི་གཙུག་གི་རྒྱན། །ལོ་ཆེན་རྡོ་རྗེ་རྒྱལ་མཚན་གསོལ་བ་འདེབས། །སྙིང་སྟོབས་ཆེན་པོས་བླ་མའི་བཀའ་བསྒྲུབས་པས། །ཟུང་འཇུག་མཆོག་བརྙེས་མི་ལ་རས་པ་དང༌། །རྒྱ་བོད་འགྲོ་བའི་འདྲེན་པ་ཟླ་བྲལ་བ། །དམ་པ་རྒྱ་གར་ཞབས་ལ་གསོལ་བ་འདེབས། །རྒྱལ་བའི་ཡུམ་ཆེན་ལབ་ཀྱི་སྒྲོལ་མ་ཡི། །རིང་ལུགས་འཛིན་མཛད་སྟོང་སྡེ་ངག་གི་དབང༌། །གྲུབ་བའི་གོ་འཕང་མཐོར་གཤེགས་རྒོད་ཚང་བ། །མགོན་པོ་རྡོ་རྗེའི་ཞབས་ལ་གསོལ་བ་འདེབས། །ལྷ་ཆོས་བདུན་ལྡན་བཀའ་གདམས་གཙང་མའི་སྲོལ། །འཛིན་སྐྱོང་སྤེལ་ལ་ཟླ་བྲལ་པོ་ཏོ་བ། །གནས་ལུགས་རྗེན་པར་གཟིགས་པའི་སྒོམ་པ་བ། །ཚུལ་ཁྲིམས་སྙིང་པོའི་ཞབས་ལ་གསོལ་བ་འདེབས། །སྒྲུབ་པ་སྙིང་པོར་མཛད་ནས་ཉམས་རྟོགས་ཀུན། །ཆེར་རྒྱས་དཔོན་སྟོན་ཆོས་ཀྱི་སེང་གེ་དང༌། །གསང་ཆེན་ཆོས་ཀྱི་སྨིན་གྲོལ་བདུད་རྩིའི་རྒྱུན། །འཛིན་མཛད་དར་པཎ་ཞབས་ལ་གསོལ་བ་འདེབས། །ཏིང་འཛིན་མེ་ལོང་དངོས་ལ་ཆོས་ཀུན་གྱི། །སྣང་བརྙན་འགོག་མེད་འཆར་བའི་ལོ་རས་བ། །དུས་གསུམ་ཤེས་བྱའི་སྣང་བ་མ་ལུས་པ། །མངོན་གཟིགས་ཀརྨ་བ་ལ་གསོལ་བ་འདེབས། །འཕྲིན་ལས་རླབས་ཕྲེང་འབུམ་ཀྱིས་མངོན་འཁྱུད་པ། །གྲུབ་པ་མཆོག་བརྙེས་རང་བྱུང་རྡོ་རྗེ་དང༌། །རྒྱལ་བསྟན་བ་དན་སྲིད་རྩེར་བགྲེང་མཛད་པ། །ཤོང་སྟོན་ངག་གི་དབང་ཕྱུག་གསོལ་བ་འདེབས། །མཉམ་མེད་ཐུབ་བའི་དབང་པོའི་ཞལ་སྐྱིད་མཆོག།།ཐམས་ཅད་མཁྱེན་པ་བུ་སྟོན་རིན་ཆེན་གྲུབ། །བདེན་གཉིས་གནས་ཚུལ་ཇི་བཞིན་ལེགས་གཟིགས་པའི། །དཔའ་བོ་རྡོ་རྗེའི་ཞབས་ལ་གསོལ་བ་འདེབས། །མཐུ་སྟོབས་རྡོ་རྗེའི་ཐོག་གིས་ནག་ཕྱོགས་ཀྱི། །བྲག་རི་བསྙིལ་མཛད་ལེགས་པ་རྒྱལ་མཚན་དང་། །ལྔ་རིག་ནོར་བུའི་གདེངས་ཀ་རབ་མཛེས་པ། །གྲུབ་དབང་སྒྲོལ་བའི་མགོན་པོར་གསོལ་བ་འདེབས། །རྡོ་རྗེའི་ཐེག་པའི་ཆོས་ཚུལ་གླིང་བཞི་ལ། །མཁྱེན་དཔྱོད་འཁོར་ལོས་བསྒྱུར་བ་བརྩོན་གྲུས་འཕགས། །རིམ་གཉིས་ཟབ་མོའི་ནོར་བུས་ཡོངས་གང་བ། །དཀོན་མཆོག་རྒྱ་མཚོའི་ཞབས་ལ་གསོ་བ་འདེབས། །ངག༷་དབང༷་བརྟན་པའི་འཁོར་ལོའི་ཞབས་སྐྱེས་ཟུང༌། །གུས་རྟག་བརྩོན་འགྲུས་དྲག་པོས་ཉེར་བསྟེན་མཐུས། །མདོ་སྔགས་རིག་གནས་རྒྱ་མཚོའི་ཀློང་རྡོལ་བ། །འཇམ་དབྱངས་བཞད་པའི་ཞབས་ལ་གསོལ་བ་འདེབས། །ཆེས་དཀོན་ཐེག་མཆོག་བསྟན་པའི་གངས་རིའི་སྤོར། །འཇིགས་བྲལ་འཆད་རྩོད་རྩོམ་བའི་གད་རྒྱངས་ཀྱིས། །སྨྲ་ངན་གཉིས་འཐུང་གླག་མེད༷་འཇོམས་མཛད་པ། །སྨྲ་བའི་དབང༷་པོ༷་མཆོག་ལ་གསོལ་བ་འདེབས། །བློ་གཏེར་རྒྱལ་བའི་མཛད་བཟང་ཇི་བཞིན་དུ། །གཞན་དོན་སྒྲུབ་ལ་ནམ་ཡང་མི་འཇིགས་པར། །ཟླ་མེད༷་ཡོན་ཏན་རྒྱ་མཚོའི་མཐར་སོན་པ། །བསྟན་པའི་སྲོག་ཤིང་ཆེན་པོར་གསོལ་བ་འདེབས། །རྣམ་མང་འགྲོ་བའི་སྐལ༷་བ་ཇི་བཞིན་དུ། །མཁས་བཙུན་བཟང༷་པོས་རྣམ་བདེན་ཐུབ༷་དབང་གི །བསྟན༷་པའི་སྙིང་བོ་གསལ་བར་སྟོན་མཛད་པ། །སྐུ་བཞིའི་དབང༷་ཕྱུག༷་དམ་པར་གསོལ་བ་འདེབས། །བློ་གྲོས་བཟང༷་བོས་ཆོས་ཀུན་མ་འདྲེས་གཟིགས། །འཇམ༷་མཉེན་དབྱང༷ས་ཀྱིས་མདོ་སྔགས་ཆོས་ཚུལ་འདོམས། །ཡེ༷་ཤེས༷་དཔུང་གིས་བདུད་བཞི་ལས་རྒྱལ་བའི། །བསྟན༷་པ༷འི་རྒྱལ༷་མཚན༷་འཛིན་ལ་གསོལ་བ་འདེབས། །ངོ་མཚར་བཀྲ་ཤིས་ར་བས་ཉེར་སྤུང་པའི། །འཆར་ཁའི་དམར་བའི་མདངས་འཕྲོག་ཞབས་སྐྱེས་ཟུང༌། །བསྟན་དང་འགྲོ་བའི་ཕན་བདེའི་ཉེར་འཚོ་རུ། །བགྲང་ལས་བསྐལ་བར་གཡོ་མེད་རྟག་བརྟན་ཤོག།།མཁྱེན་བརྩེའི་སྤྲིན་སྔོན་བརྩེགས་པའི་ལྡིང་ཁང་ནས། །མཛད་འཕྲིན་དབྱར་རྔ་དལ་གྱིས་རྒོད་པ་དང་། །ལྷན་ཅིག་འཆད་རྩོད་རྩོམ་པའི་ཆར་ཆེན་གྱིས། །ཐུབ་བསྟན་རྒྱ་མཚོ་ཆེས་ཆེར་འཕེལ་བར་ཤོག །བཀྲ་ཤིས༷་དཔལ་གྱི་ཀླུང་བརྒྱ་གཡས༷་ཕྱོགས་སུ༷། །འཁྱིལ༷་བ༷འི་ཆོས་ཀྱི་སྡེ་ཆེན་ནོར་བུའི་གླིང༷༌། །བློ་གསལ་རིན་ཆེན་བྱེ་བས་ཡོངས་གང་ཞིང༌། །བཤད་སྒྲུབ་རླབས་ཕྲེང་ཕྱོགས་བརྒྱར་གཡོ་བར་ཤོག།།དེང་བཟུང་ཚེ་རབས་པདྨ་དཀར་པོའི་ཕྲེང༌། །བཤེས་གཉེར་ཉིན་མོའི་མགོན་དང་ཉེར་འགྲོགས་ནས། །མི་མཐུན་རྒུད་པའི་རྡུལ་གྱིས་མི་རེག་པར། །རྣམ་གྲོལ་སྦྲང་རྩིའི་བཅུད་བཟང་རྒྱས་པར་ཤོག།།བླ་མ་མཆོག་གསུམ་རྒྱལ་བའི་བྱིན་རླབས་དང༌། །སྤྲོས་བྲལ་འགག་མེད་ཆོས་དབྱིངས་བདེན་པ་དང༌། །སྲུང་མའི་འཕྲིན་ལས་བདག་གི་ལྷག་བསམ་མཐུས། །གང་བསམ་རེ་བའི་འབྲས་བུ་ལྷུན་གྲུབ་ཤོག།།ཅེས་ཐུབ་བསྟན་ཡོངས་རྫོགས་གྱི་མངའ་བདག་ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེ། །བློ་བཟང་འཇམ་དབྱངས་ཡེ་ཤེས་བསྟན་པའི་རྒྱལ་མཚན་དཔལ་བཟང་པོའི་ཞལ་སྔ་ནས་ཀྱི་འཁྲུངས་རབས་གསོལ་འདེབས་བརྟན་བཞུགས་ཚང་བས་རྗེས་འཛིན་གྱི་སྨོན་ཚིག་དང་བཅས་པ་ཡིད་བཞིན་ནོར་བུའི་ཕྲེང་བ་ཞེས་བྱ་བ་འདི་ནི་རྔ་རྒོད་སྤྲུལ་བའི་སྐུ་རིན་པོ་ཆེ་སྐལ་བཟང་བསྟན་པ་རྒྱ་མཚོས་གསེར་ཟངས་ལས་གྲུབ་པའི་རྒྱལ་བ་ཚེ་དཔག་མེད་ཀྱི་སྐུ་བརྙན་བྱིན་ཅན་དང༌། བཀྲ་ཤིས་པའི་ལྷ་རྫས་བཅས་བཀའ་གནང་ནན་ཆེར་བྱུང་བའི་གསུང་ཟློག་མ་ནུས་པར། དབྱངས་ཅན་བཞད་པས། སྐྱབས་མགོན་གོང་མས་ཞལ་བཞེས་གནང་བའི་གསུང་རིས་དང༌། །དམ་བ་སྔ་ཕྱི་དུ་མའི་གསུངས་ལ་གཞིར་བྱས་ཏེ། །གོ་རིམ་མ་ངེས་པར་རགས་བསྡུས་ཀྱི་ཚུལ་དུ་རང་གི་སྤྱི་ལ་བུར་གང་དྲན་རྡོལ་བྱུང་དུ་སུག་བྲིས་བགྱིས་པ་འདི་ཡང༌། ཡབ་རྗེ་བླ་མ་མཆོག་གིས་འབྲལ་མེད་རྗེས་སུ་འཛིན་པའི་རྒྱུར་གྱུར་ཅིག ། པར་འདི་ཆོས་སྡེ་ཆེན་པོ་དཔལ་ལྡན་སྨྲ་བའི་སེང་གེའི་གླིང་དུ་བཞུགས།། །། མངྒ་ལཾ།།