ན་མོ་གུ་རུ་ལོ་ཀེ་ཤཱ་ར་ཡ། འདིར་རྒྱལ་བ་ཀུན་གྱི་བརྩེ་ཆེན་སྙིང་རྗེའི་རང་གཟུགས་སྤྱན་རས་གཟིགས༌ལ་བརྟེན་པའི་བླ་མའི་རྣལ་འབྱོར་སྒོམ་པར་འདོད་པས། ཐོག་མར༌སྐྱབས་སེམས་ཚད་མེད༌བསྒོམ་པ་སྔོན་དུ་བཏང་སྟེ། མདུན་གྱི་ནམ་མཁར་པད་སྡོང་ཟླ་དཀྱིལ་སྟེང༌། སྐྱབས་གནས་ཀུན་འདུས་བླ་མ་རིན་པོ་ཆེ། །རྣམ་པ་སྤྱན་རས་གཟིགས་དབང་སྐུ་མདོག་དཀར། །ཞལ་གཅིག་ཕྱག་བཞིའི་དང་བོ་ཐལ་སྦྱར་དང༌། །ཐ་མའི་ཕྱག་གཉིས་ཤེལ་ཕྲེང་པད་དཀར་བསྣམས། །རིན༌ཆེན་རྒྱན་དང་དར་གྱི་ན་བཟས་ཀླུབས། །གནས་གསུམ་རྡོ་རྗེ་གསུམ་མཚན་འོད་ཟེར་གྱིས། །ཡེ་ཤེས་སྤྱན་དྲངས་དབྱེར་མེད་རོ་གཅིག་གྱུར། །ཕྱག་འཚལ་མཆོད་འབུལ་སྡིག་ལྟུང་མ་ལུས་བཤགས། །དགེ་ལ་ཡི་རང་ཆོས་འཁོར་བསྐོར་བར་བསྐུལ། །བསྐལ་བརྒྱར་མྱ་ངན་མི་འདའ་བཞུགས་གསོལ་འདེབས། །དགེ་ཚོགས་བླ་མེད་བྱང་ཆུབ་ཐོབ་ཕྱིར་བསྔོ། །མཎྜལ་ཕུལ། སྐྱབས་གནས་ཀུན་འདུས་ཀྱི་ངོ་བོ་བླ་མ་སྤྱན་རས་གཟིགས་ལ་གསོལ་བ་འདེབས་སོ། །བདག་གི་རྒྱུད་བྱིན་གྱིས་བརླབ་ཏུ་གསོལ། ཞེས་གསོལ་བ་ཤུགས་དྲག་ཏུ་བཏབ་བའི་རྐྱེན་གྱིས། མདུན་གྱི་བླ་མ་ལྷག་བའི་ལྷ་རང་ལ་ཐིམ། རང་ཉིད་བླ་མ་སྤྱན་རས་གཟིགས་སུ་གསལ་བའི་ཐུགས་ཀར་ཟླ་དཀྱིལ་གྱི་སྟེང་དུ་ཧྲཱིཿ ཡིག་གི་མཐར་སྔགས་ཕྲེང་གིས་བསྐོར་བ་ལ་དམིགས་ཏེ་གཟུངས་རིང་དང་ཡིག་དྲུག་ཅི་འགྲུབ་བཟླ། དེ་ནས། དགེ་བ་འདི་ཡིས་སོགས་བརྗོད། བླ་མའི་རྣལ་འབྱོར་མདོར་བསྡུས་འདི་ནི་དད་ལྡན་འགའ་ཞིག་གིས་བསྐུལ་བའི་ངོར། ྋ འདུ་གསུམ་པ་དབྱངས་ཅན་བཞད་པས་བྲིས།། །།