༄༅། །བློ་གཏེར་འཇ༷མ་དཔལ་དབྱངས་དངོས་ཙོང་ཁ་བའི། །མདོ་སྔགས་ལུགས་བཟང་པད་དཀར་བཞད་པའི་གཉེན། །མཁྱེ໅ན་རབ༷་གཟི་འབར་བཤེས་གཉེན་ཉིན་མོའི་མགོན། །དད་ལྡན༌རྒྱ་མཚོའི༌མགོན་ལ་གསོལ་བ་འདེབས། །མགོན་ཁྱོད་སྐྱབས་གསུམ་ངོ་བོར་གསོལ་འདེབས་ན། །ཟབ་རྒྱས་གདམས་པས་བདག་རྒྱུད་ལེགས་སྨིན་ཅིང༌། །མཐར་འཛིན་སྒྲིབ་པའི་དཔུང་ཚོགས་ཉེར་བཅོམ་སྟེ། །བླ་མེད་སྐུ་གསུམ་གོ་འཕང་ཐོབ་པར་ཤོག །ཁྱད་པར་ནམ་ཞིག་འདི་སྣང་འགགས་བའི་ཚེ། །འདྲེན་པ་མཆོག་དང་དབྱེར་མེད་འོད་དཔག་མེད། །མངོན་སུམ་མཐོང་ནས་གསུང་གིས་དབུགས་དབྱུང་སྟེ། །བདེ་ལྡན་དག་པའི་ཞིང་དུ་འཁྲིད་པར་ཤོག ། ཅེས་པ་འདི་ནི་དད་བརྩོན་ནམ་དཔྱོད་ལྡན་པ་སོག་དགེ་བློ་བཟང་ཤེས་རབ་ཀྱིས་བསྐུལ་བའོ་ྋདབྱངས་ཅན་བཞད་པས་སྦྱར་བའོ།།  །
ཨོཾ་སྭ་སྟི།རིགས་ཀུན་ཁྱབ་བདག་རྩ་བའི་བླ་མ་དང༌། །དུས་གསུམ་བདེ་གཤེགས་ཡི་དམ་མཁའ་འགྲོའི་ཚོགས། །མཐུ་ལྡན༌སྲུང་མའི་བྱིན་རླབས་བདེན་པའི་མཐུས། །སྨོན་དོན་ལྷུན་གྱིས་འགྲུབ་པའི་དགེ་ལེགས་སྩོལ། །སྨྲ་བ་ཟླ་མེད་ངག༷་ལ་དབ༷ང་བསྒྱུར་ཞིང༌། །བློ໅་གསལ་ཡོངས་ལ་ཟབ་རྒྱས་གདམས་བའི་གནད། །སྟོན་མཁས་འཕྲིན་ལས་བཟང་བོས་ནོར་འཛིན་ཁྱོན། །གསལ་བྱེད་མཚུངས་བྲལ་ཐུ༷བ་བསྟ༷ན་རྒྱ༷་མཚོ໅་ཡི། །གཟུགས་སྐུའི་སྣང་བརྙན་བསྐལ་བརྒྱར་རབ་བརྟན་ཅིང༌། །གཞན་ཕན་མཛད་བཟང་འོད་ཟེར་འབུམ་ཕྲག་གིས། །རྒུད་མུན་སྤྲོས་བྲལ་དབྱིངས་སུ་ཉེར་བཅོམ་སྟེ། །བསྟན་འགྲོའི་ལེགས་ཚོགས་འདབ་སྟོང་བཞད་པར་མཛོད། །ལྗོངས་འདིར་ནད་རིམས་ཁ་སྨྲས་དགྲ་རྐུན་སོགས། །མི་འདོད་རྐྱེན་ངན་སྦྱིན་མའི་བུ་ཡི་སྲོག །མཐུ་སྟོབས་རྩེ་བརྒྱའི་མཚོན་གྱིས་ཉེར་བཅད་དེ། །ཚེ་བསོད་སྟོབས་འབྱོར་མཚོ་ལྟར་རྒྱས་པར་མཛོད། །མདོར་ན་གསང་གསུམ་བྱ་བ་ཅི་མཛད་ཀུན། །བསྟན་པ་རིན་ཆེན་ཕྱོགས་བཅུར་རྒྱས་བ་དང༌། །ལུས་ཅན་གཏན་བདེའི་རྒྱུ་རུ་འགྱུར་བ་སོགས། །ཐུགས་ཀྱི་དགོངས་བཞེད་གེགས་མེད་ལྷུན་གྲུབ་མཛོད། །ཅེས་འཇམ་མགོན་བསྟན་བའི་གསལ་བྱེད་དམ་པ་སྟག་ཚ་སྤྲུལ་བའི་སྐུ་ངག་དབང་བློ་བཟང་ཐུབ་བསྟན་རྒྱ་མཚོའི་ཐུགས་བཞེད་འགྲུབ་བའི་སྨོན་ཚིག་འདི་ལྟ་བུ་དགོས་ཞེས་དཔོན་པོ་དཀོན་མཆོག་རྒྱལ་མཚན༌གྱིས་ལྷ་རས་དང་དངུལ་སྲང་བཅས་བསྐུལ༌བའི་ངོ་མ་ལྡོག་པར། ྋདབྱངས་ཅན་བཞད་པས་བཅད་རྒྱའི་ཐུན་མཚམས་སུ་སྦྱར་བ་ཛ་ཡནྟུ།།  །།