རིགས་བརྒྱའི་ཁྱབ་བདག་རྩ་བའི་བླ་མ་དང༌། ། དབྱེར་མེད་བཻ་ཌཱུརྱ་སྣང་ཞིང་གི་མགོན། །མཚན་ཙམ་གྱིས་ཀྱང་ནད་དང་བསྡུག་བསྔལ་ཀུན། །འཇོམས་མཛད་སྨན་པའི་རྒྱལ་བོར་གསོལ་བ་འདེབས། །བདེ་གཤེགས་བདུན་གྱི་ཐུགས་རྗེའི་བྱིན་རླབས་ཀྱིས། །སྔོན་ལས་འཕྲལ་རྐྱེན་ངན་པས་བསྐྱེད་པ་ཡི། །ནད་གདོན་སྡུག་བསྔལ་བར་ཆད་ཀུན་ཞི་ནས། །ཚེ་བསོད་བདེ་སྐྱིད་དབྱར་མཚོ་ལྟར་རྒྱས་ཤིང༌། །བཅོས་མིན་གཞན་ཕན་སྙིང་རྗེས་རྒྱུད་བསྐུལ་ཏེ། །རྒྱལ་སྲས་སྤྱོད་པའི་ཉམས་ལེན་མཐར་ཕྱིན་ནས། །སྲིད་ཞིའི་སྡུག་བསྔལ་རྒྱ་མཚོ་ལས་བསྒལ་ཏེ། །བླ་མེད་གཏན་བདེའི་དཔལ་ལ་རེག་གྱུར་ཅིག །ཅེས་པ་འདི་ཡང་འདི་ཀའི་ནང་འཁོར་དཀོན་མཆོག་ཕྱོགས་གླང་གིས་བསྐུར་ངོར། ྋ །དབྱངས་ཅན་བཞད་པས་བྲིས་པའོ།། །།
ཨོཾ་སྭ་སྟི། །བསླུ་མེད་བླ་མ་མཆོག་གསུམ་བྱིན་རླབས་དང༌། །དཔའ་བོ་མཁའ་འགྲོ་སྲུང་མའི་འཕྲིན་ལས་དང༌། །ཆོས་དབྱིངས་འགྱུར་བ་མེད་བའི་བདེན་པ་དང༌། །བདག་གི་ལྷག་བསམ་རྣམ་པར་དག་པའི་མཐུས། །རྣལ་འབྱོར་དཔོན་སློབ་སྡེ་འབངས་བཅས་པ་ལ། །གནོད་ཅིང་འཚེ་བའི་ཕ་རོལ་དགྲ་བོ་ཡིས། །ཚེ་རབས་སྔོན་ནས་ལན་ཆགས་ཤ་འཁོན་དང་། །ད་ལྟར་དམ་སྲི་འབྱུང་བོས་དཀྲུགས་པ་ལས། །དམག་འཁྲུག་གཡུལ་གཤོམ་དགྲ་ཇག་ཆོམ་རྐུན་གྱིས། །བཙན་བཙུག་རྩོད་གླེང་སྨྲ་མཆུ་ཟུག་པ་སོགས། །དཀར་མིན་བསམ་སྦྱོར་ངན་པ་མྱུར་ཞི་ནས། །དགྲ་མགོ་རྡོག་པས་མནན་ཏེ་གཡུལ་ལས་རྒྱལ། །སླད་ཆར་དགྲ་དང་ཁ་མཆུ་མི་ལྡང་བར། །དེ་དག་དབང་སྡུད་ཕན་ཚུན་ཡིད་མཐུན་ཏེ། །ལས་ངན་ཆགས་སྡང་རྨོངས་པའི་མི་དགེའི་སེམས། །མི་བཟད་སྡུག་བསྔལ་འབྱུང་བའི་སྒོར་མཐོང་ནས། །འཕྲལ་ཡུན་ལེགས་ཚོགས་ཡོན་ཏན་ཀུན་གྱི་གཞི། །གཞན་ཕན་སྙིང་རྗེས་སེམས་རྒྱུད་ཉེར་བསྐུལ་ཏེ། །སྒོ་གསུམ་དགེ་བཅུའི་ཆོས་ལ་འཇུག་པ་སོགས། །བདག་སོགས་རེ་འབྲས་ལྷུན་གྱིས་འགྲུབ་གྱུར་ཅིག །ཅེས་ཡུལ་འཁྲུག་དང་ཁ་མཆུ་སོགས་ཞི་པའི་འདོད་གསོལ་འདི་ཡང༌། ཡི་གེ་བ་གྲགས་པ་ཀླུ་སྒྲུབ་ཀྱིས་ལན་སྔ་ཕྱིར་ཡང་ཡང་བསྐུལ་བ་ལྟར།  ྋདབྱངས་ཅན་བཞད་པས་སྦྱར་བ་དགེ་ལེགས་འཕེལ།།    །།