༄༅།། ཧཱུཾ་གཏུམ་དྲག་རྔམས་པའི་ཤུགས་ཀྱིས་དགྲ་སྡེ་དཔུང༌།། གཞོམ་མཛད་གནོད་སྦྱིན་བཙན་རྒོད་བསྭེ་ཁྲབ་ཅན།། གླུ་བཙན་མཐིང་ནག་ལ་སོགས་འཁོར་བཅས་ཀྱིས།། ནག་ཕྱོགས་དགྲ་དཔུང་འཇོམས་པའི་དུས་ལ་བབས།། གདུག་ཅིང་སྡང་པའི་དགྲ་པོ་སྡིག་ཅན་འདིས།། བསྟན་པ་གཉན་པོ་བཤིག་ཅིང་དབུ་འཕང་སྨད།། བླ་མ་ལ་བསྔོས་དཀོན་མཆོག་རྟེན་རྣམས་བཤིག།།དགེ་འདུན་སྡེ་དཀྲུགས་ཆོས་འཁོར་འཇོམས་པར་བྱེད་།། མནར་མེད་དམྱལ་བའི་བུད་ཤིང་མི་བཟད་པ།། འདི་ཉིད་སྙིང་རྗེ་ཆེན་པོའི་གཏུམ་དྲག་གིས།། ལུས་ངན་རྟེན་དང་རྣམ་པར་ཤེས་ཕྲལ་ནས།། དག་བའི་ཞིང་ཁམས་དག་ཏུ་དྲངས་པར་མཛོད།། ཀླད་པ་ཁྲག་བཅས་ཞོ་ལྟར་དཀྲུགས་ལ་ཤོག། །སྙིང་དམར་གློ་རྗེན་རྒྱབ་ནས་ཕྱུང་སྟེ་ཟོ།། མཆིན་མཁྲིས་རྒྱུ་མ་ག་བཱ་ལར་ཕྱུང་ནས།། ཤ་རུས་གཽ་རོ་ཙ་ནར་བཅས་ཏེ་ཟོ།། གནས་བའི་གྲོང་ཁྱེར་ས་ཡི་ཁུང་བུར་ཆུག།།གནམ་ལྕགས་འབར་བས་སྟེང་ནས་ཕྱེ་མར་ཆོམས།། གདུག་པའི་རིམས་ཀྱིས་པར་ནས་རླུང་ལྟར་གཡས།།བདུན་རྒྱུད་ཚུན་ཆད་རྩར་ནས་ཆོད་ལ་ཤོག།།རྣལ་འབྱོར་བདག་གིས་ཇི་ལྟར་བཅོལ་བ་ཡི།། ཞི་རྒྱས་དབང་དྲག་འཕྲིན་ལས་མ་ལུས་པ།། མྱུར་དུ་འགྲུབ་པར་མཛོད་ཅིག་གནོད་སྦྱིན་ཆེ།། ཐུགས་དམ་གཉན་པོ་དུས་ལས་མ་གཡེལ་ཅིག།།ཅེས་གནོད་སྦྱིན་བཙན་རྒོད་ཆེན་པོའི་དྲག་བསྐུལ་འདི་ནི་ནག་ཕྱོགས་དགྲ་སྡེའི་བླ་མ་གྲྭ་ཚང་ལ་བཙན་བཙུག་མཐོ་བརྩམས་པའི་སྐབས། དགེ་སློང་དཔལ་ལྡན་རྒྱ་མཚོས་ཆོས་སྡེ་ཆེན་པོའི་བསྟན་སྲིད་ཀྱི་ཆེད་དུ་ནན་ཆེར་བསྐུལ་བའི་ཚེ། ༧ དབྱངས་ཅན་བཞད་པས།༧པཎ་ཆེན་དཔལ་ལྡན་ཡེ་ཤེས་ཀྱིས་མཛད་པའི་ཞལ་བཞི་བའི་དྲག་བསྐུལ་བྱིན་རླབས་ཆེ་པས་ཚིག་ཕལ་ཆེར་རང་སོར་བཞག །ཚིག་བསྒྱུར་ཕྲན་ཙམ་བྱས་ཏེ་འཕྲལ་དུ་བྲིས་པའོ།། །། པར་འདི་ཆོས་སྡེ་ཆེན་པོ་དཔལ་ལྡན་སྨྲ་བའི་སེངྒེའི་གླིང་དུ་བཞུགས།།