༄༅། །ན་མོ་གུ་རུ་ཨཱ་རྱ་ཏཱ་རེ་ཡ། བླ་མ་ལྷ་ལ་གུས་བཏུད་རྫོགས་རིམ་གྱི། །གནད་དོན་ཐོ་ཙམ་འགོད་ལ་གནང་བ་སྩོལ། །དངོས་གྲུབ་གཞི་རྟེན་བླ་མའི་རྣལ་འབྱོར་ནས། །ཉེར་བསྡུ་འོད་གསལ་ངང་ལས་ལྷ་ཡི་སྐུར། །ཡོངས་བཞེངས་ཨུཏྤལ་ས་བོན་འོད་ཟེར་གྱིས། །སྲས་བཅས་རྒྱལ་རྣམས་སྤྱན་དྲངས་ཡང་ཡང་བསྟིམ། །དེ་ནས་དབུ་མ་ཁྱད་ཆོས་བཞི་ལྡན་དང༌། །རོ་རྐྱང་རྩ་འཁོར་བཞི་ལྡན་ལྟ་བའི་དབུས། །ཧཱུཾ་སྔོན་ཐིག་ལེར་པད་ཟླར་རྡོ་རྗེ་དཀར། །ལྟེ་བར་མི་གཡོ་སྔོན་པོ་རལ་གྲི་འཛིན། །རང་འདྲ་གྲངས་མེད་རོ་མ་ནས་སྤྲོས་ཏེ། །བགེགས་རྣམས་མེས་བསྲེག་རླང་གི་འགྲོ་འོང་དང༌། །འགྲོགས་ཏེ་རྐྱང་མའི་ལམ་བརྒྱུད་ལྷ་ལ་ཐིམ། །དབུགས་མནན་ཡང་ཡང་གསལ་བཏབ་མཐར་རང་འདྲ། །རྩ་གསུམ་འཁོར་ལོ་བཅས་གད་སྔགས་སྒྲ་སྒྲོགས། །དེ་བསྒོམ་གེགས་སེལ་བོག་ཐོན་དངོས་གཞི་ལ། །ལྟེ་བར་དཀར་དམར་མཉམ་འདྲེས་དགའ་བ་འཁྱིལ། །གཡོན་འཁོར་འོད་ཀྱི་རང་བཞིན་དེ་ཡི་སྟེང༌། །ཏཱཾ་ལྗང་ཟླ་ཚེས་ཐིག་ལེ་ནཱ་ད་བཅས། །རང་སྒྲ་སྒྲོགས་ལ་སེམས་འཇོག་དེ་བརྟན་ཚེ། །དེ་ལས་བོད་ནོན་རྒྱ་ཁབ་གཤིབས་ལྟ་བུ། །རེམ་བཞིན་སྟེང་འོག་འཕྲོས་པས་རླུང་བསྡུས་ཏེ། །ས་བོན་ལ་ཐིམ་ཁ་སྦྱོར་བུམ་ཅན་གྱི། །རྟགས་དང་འོད་གསལ་འཆར་ཞིང་བསྲེ་བའང་སྒོམ། །ཐུན་མཐར་ཉེར་བསྡུ་འོད་གསལ་ལ་སྐུར་ལྡང༌། །འབར་འཛག་བདེ་བ་སྒྲུབ་ཚེ་རྩ་འཁོར་ལྷ། །སྔར་བཞིན་ལྟེ་བར་རབ་དམར་ཐིག་ལེའི་དབུས། །ཨ་དམར་ཚ་རེག་མེ་སྟག་རབ་འཕྲོ་བ། །སྤྱི་བོར་ཐིག་ལེ་དཀར་པོ་མཐེབ་སོར་ཙམ། །དེ་དབུས་ཧཾ་ལས་བྱང་སེམས་འཛག་པར་བསྒོམ། །དེ་རྗེས་འོག་རླུང་བསྐུམས་དང་སྟེང་རླུང་མནན། །དེ་ཚེ་སྤོས་རིང་དུ་བའི་དབྱིབས་ཅན་རླུང༌། །ཐིམ་པས་མེ་སྦར་ཁ་སྦྱོར་མང་བཟུང་མཐར། །ཐུར་སེལ་དྲག་བསྐུལ་རབ་འབར་ཧཾ་ཡིག་མགོ །ཞུ་བའི་ཐིག་ལེ་མེ་དང་འཕྲད་པ་ལས། །ཚེག་སྒྲ་དང་བཅས་འཁྱུག་སྟེ་རྩ་གནས་ཁྱབ། །ཧཾ་ཡིག་ཞུ་བས་དགའ་བཞི་ཐོབ་ནས་སླར། །ལྟེ་བ་ནས་ལྡོག་བྱང་སེམས་ཀྱིས་གང་བས། །བདེ་སྟོང་རྣལ་འབྱོར་མཆོག་གིས་ཚེ་འདི་འམ། །ངེས་པར་བར་དོར་ཟུང་འཇུག་འགྲུབ་པར་གསུངས། །སླར་ཡང་འཇའ་ལུས་བསྒྲུབ་ཚུལ་བདུན་གྱི་མཁར། །གསེར་ཞུན་བཙོ་མའི་མདངས་འཕྲོ་རྗེ་བཙུན་མ། །དཀོན་མཆོག་གསུམ་མཚོན་ཕྱག་རྒྱས་རྡོ་རྗེ་གཡས། །གཡོན་པས་དྲིལ་བུ་དཀུར་བརྟེན་ཨུཏྤལ་བསྣམས། །སེམས་དཔའི་སྐྱིལ་ཀྲུང་དར་གྱི་ན་བཟས་ཀླུབས། །ཐུགས་ཀར་ཟླ་བའི་གདན་སྟེང་ཏཱཾ་ཡིག་སེར། །དེ་མཐར་ཡུམ་ལྔའི་ས་བོན་གྱིས་བསྐོར་བར། །མོས་གུས་གདུང་ཤུགས་དྲག་པོས་གསོལ་བཏབ་མཐུས། །ཐུགས་ཀ་ནས་འཕྲོས་འོད་ཀྱིས་རང་གི་ལུས། །འོད་ཀྱི་གོང་བུར་གྱུར་ནས་ཐུགས་ཀར་ཐིམ། །ཡང་ན་སྙིང་དབུས་དྷུ་ཏིར་ཟླ་གདན་ལ། །རང་རིགས་འཕགས་མ་མཉམ་གཞག་གཅེར་མོའི་ལུས། །འཇའ་ཚོན་ལྟར་གསལ་འོད་ཀྱིས་རང་ལུས་གནས། །ཕྱི་ནང་སྣོད་བཅུད་འཇའ་ཚོན་རང་བཞིན་དུ། །བསྒོམ་ཞིང་ཐུན་མཐར་སྒྱུ་མའི་སྐུར་ལྡང་སྟེ། །དུས་ཀུན་འཇའ་ཚོན་ཉིད་ལ་སེམས་འཛིན་ཅིང༌། །བླ་མ་ལྷ་ལ་རྩེ་གཅིག་གསོལ་བཏབ་མཐུས། །ངེས་པར་འཇའ་ལུས་འགྲུབ་གསུངས་འཕོ་བ་ནི། །སྙིང་གའི་དྷཱུ་ཏིར་ཟླ་བར་ཏཱཾ་ལྗང་ཁུ། །ཀླད་ཀོར་ནང་དུ་རྣམ་ཤེས་ཐིག་ལེ་དཀར། །འོད་ཀྱི་རང་བཞིན་དེ་འོག་ཡཾ་སྔོ་སྐྱ། །ཡང་ཞིང་གཡོ་བ་རླུང་གི་ངོ་བོར་བསྒོམ། །སྤྱི་པོའི་བླ་མ་ལྷ་ཡི་ཐུགས་ཀ་རུ། །འཕོ་འདུན་དྲག་པོས་གསོལ་འདེབས་འོག་རླུང་བསྐུམས། །རྣམ་ཤེས་ཡཾ་ཡིག་གིས་བཏེགས་སྤྱི་བོར་ཐོན། །དེ་ཚེ་དབུ་མ་ལུས་ཀུན་ཐིག་ལེ་རུ། །ཐིམ་ནས་བླ་མ་ལྷ་ཡི་ཐུགས་ཀར་འཕོ། །ཆེས་ཟབ་འཕགས་མའི་ཞལ་ལུང་གདམས་པའི་གཏེར། །སྙིང་ནོར་སྙིང་གི་གུད་དུ་སྤ་བར་རིགས། །ཚུལ་འདི་རྨོངས་རྟུལ་བཞད་བའི་མིང་ཅན་གྱིས། །ཉམས་ལེན་འཁྱེར་བདེའི་ཚུལ་དུ་མདོ་ཙམ་བཀོད།། །།རང་གི་སྤྱི་བོར་རྩ་བའི་བླ་མ་དང༌། །དབྱེར་མེད་རྗེ་བཙུན་ཨཱརྱ་ཏཱ་རེ་མ། །ཕྱག་གཡས་མཆོད་སྦྱིན་གཡོན་པས་ཨུཏྤལ་བསྣམས། །རིན་ཆེན་རྒྱན་སྤྲས་གཡས་བསྐྱངས་གཡོན་བསྐུམས་བཞུགས། །སྤྲོ་ན་ཡན་ལག་བདུན་པ་བྱ།རང་ལུས་དབུས་སུ་ལུས་ཀྱི་གཞུང་ཤིང་ཚུལ། །ཁྱད་ཆོས་བཞི་ལྡན་དབུ་མ་མདའ་སྙུག་ཙམ། །ཡར་སྣ་སྤྱི་གཙུག་མར་སྣ་ལྟེ་འོག་ཐོན། །སྙིང་གའི་དྷཱུ་ཏིར་ཟླ་གདན་ཏཱཾ་ཡིག་གི །ཐིག་ལེར་རྣམ་ཤེས་དཀར་འཚེར་འཕུར་ལ་ཁད། །དེ་འོག་རླུང་དཀྱིལ་མཚོན་བྱེད་ཡཾ་ཡིག་གསལ། །བསླུ་མེད་མཆོག་གསུམ་འདུས་པའི་ངོ་བོ་ཉིད། །འདི་ཕྱི་བར་དོའི་འཇིགས་སྒྲོལ་སྐྱབས་ཀྱི་ཕུལ། །མཆོག་ཐུན་དངོས་གྲུབ་ཀུན་སྩོལ་ཡིད་བཞིན་ནོར། །བླ་མ་སྒྲོལ་མར་སྙིང་ནས་གསོལ་པ་འདེབས། །ལན་གང་མང་བརྗོད་མཐར། ཚེ་འདི་བློ་ཡིས་ཐོངས་པར་བྱིན་གྱིས་རློབས། །ཟབ་ལམ་འཕོ་བ་འབྱོངས་པར་བྱིན་གྱིས་རློབས། །འཕོ་བས་མཁའ་སྤྱོད་བསྒྲོད་བར་བྱིན་གྱིས་རློབས། །རེ་ས་གཞན་ན་མེད་དོ་ཐུགས་རྗེས་དྲོངས། །ཞེས་གདུངས་ཤུགས་དྲག་པོས་གསོལ་བ་བཏབ་སྟེ་འོག་རླུང་བསྐུམས་པས། རྣམ་ཤེས་ཡཾ་གྱིས་བཏེགས་ནས་སྤྱི་བོར་ཐོན། རྩ་དབུ་མ་རང་ལུས་དང་བཅས་པ་རྣམ་ཤེས་ཏཱཾ་ཡིག་སོགས་ལ་ཐིམ་ནས་བླ་མ་རྗེ་བཙུན་མའི་ཐུགས་དང་དབྱེར་མེད་དུ་གྱུར་པར་མོས། ཚུལ་འདི་ལམ་འདི་ལ་མོས་པ་་ ྋ དབྱངས་ཅན་བཞད་པས་བྲིས་པའོ།། །།ཨོཾ་ཏཱ་རེ་ཏུ་ཏྟཱ་རེ་ཏུ་རེ་རྗེ་བཙུན་བླ་མ་དམ་པ་རྣམས་ཀྱི་སྐུ་ཚེ་བརྟན་ཅིང༌། སྐུ་གསུང་ཐུགས་ཀྱི་མཛད་པ་འཕྲིན་ལས་ཐམས་ཅད་རྒྱས་བར་གྱུར་ཅིག་སྭཱཧཱ།། པར་འདི་ཆོས་སྡེ་ཆེན་པོ་དཔལ་ལྡན་སྨྲ་པའི་སེང་གེའི་གླིང་དུ་བཞུགས།།