མཚན་དཔེའི་དཔལ་མངའ་མ་རྒད་ལྷུན་པོའི་སྐུ། །སྙན་འཇེབས་དྲུག་ཅུ་རྩ་བཞིའི་དབྱངས་ལྡན་གསུང༌། །མཐའ་ཡས་འགྲོ་བའི་ཁམས་བཞིན་གཟིགས་པའི་ཐུགས། །འཕགས་མས་དགེ་ལེགས་ཤིས་པ་དེང་འདིར་སྩོལ། །འདིར་སེང་ལྡེང་ནགས་སྒྲོལ་བསྒོམ་པར་འདོད་པས། སྐྱབས་སེམས་སྔོན་དུ་བཏང་ནས། སྭ་བྷཱ་ཝྭས་སྟོང་པར་སྦྱངས། སྟོང་པའི་ངང་ལས་པཾ་ལས་པདྨ་དང༌། ཨ་ལས་ཟླ་བའི་དཀྱིལ་འཁོར་གྱི་སྟེང་དུ་རང་སེམས་ཏཱཾ་ཡིག་ལྗང་གུ། དེ་ལས་འོད་འཕྲོས། དོན་གཉིས་བྱས། འདུས་ཡོངས་སུ་གྱུར་པ་ལས། རང་ཉིད་རྗེ་བཙུན་སྒྲོལ་མ་སྐུ་མདོག་ལྗང་སྔོན་ཞལ་གཅིག་ཕྱག་གཉིས། གཡས་མཆོག་སྦྱིན་དང༌། གཡོན་དཀོན་མཆོག་གསུམ་གྱི་ཕྱག་རྒྱས་ཨུཏྤ་ལའི་ཡུ་བ་ཐུགས་ཀར་འཛིན་པའི་འདབ་མ་སྙན་དྲུང་དུ་ཁ་ཕྱེ་བ། དབུ་སྐྲ་རལ་བའི་ཕྱེད་ཐོར་ཚུགས་བྱས་ཤིང༌། ལྷག་མ་ཐུར་དུ་བཀྲོལ་བས་སྐུ་སྟོད་ཁེབས་པ། དར་གྱི་ན་བཟའ་དང༌། རིན་པོ་ཆེའི་རྒྱན་སྣ་ཚོགས་ཀྱིས་བརྒྱན་པ། ལང་ཚོ་དར་ལ་བབས་ཤིང༌། སྐུ་ལས་སྐྱེས་བའི་འོད་ཀྱི་ཕུང་བོའི་དབུས་ན་བཞུགས་པའི་སྤྱི་བོར་ཨོཾ། མགྲིན་པར་ཨཱཿ ཐུགས་ཀར་ཧཱུཾ། ཐུགས་ཀའི་ཧཱུཾ་ལས་འོད་ཟེར་འཕྲོས། རང་འདྲའི་ཡེ་ཤེས་པ་སྤྱན་དྲངས། །ཛཿ ཧཱུཾ་པཾ་ཧོཿ གཉིས་སུ་མེད་པར་གྱུར། དབང་གི་ལྷ་རྣམས་ཀྱིས་དབང་བསྐུར། འོད་དཔག་མེད་ཀྱིས་དབུ་བརྒྱན་པར་གྱུར། མཆོད་པ་བྱ་རྒྱུད་ལྟར་བྱིན་གྱིས་བརླབས། ཨོཾ་ཨྭརྱ་ཏཱ་རེ་ཨ຋ᨗ་སོགས་ཀྱིས་མཆོད། ལྷ་དང་ལྷ་མིན་སོགས་ཀྱིས་བསྟོད། རང་གི་སྙིང་གར་ཟླ་དཀྱིལ་གྱི་སྟེང་དུ་ཏཱཾ་ཡིག་གི་མཐར་སྔགས་ཕྲེང་གིས་བསྐོར་བ་ལས་འོད་ཟེར་འཕྲོས། རྒྱལ་བ་སྲས་བཅས་ཀྱི་བྱིན་རླབས་ཐམས་ཅད་བསྡུས་ཏེ་ཐིམ་པར་གྱུར་བར་མོས་ལ་ཏཱ་རེ་ཅི་འགྲུབ་བཟླ། ཡིག་བརྒྱས་ལྷག་ཆད་བསྐངས་ཤིང་མཆོད་བསྟོད་བྱ། དགེ་བ་འདི་ཡིས་མྱུར་དུ་བདག།།འཕགས་མ་སྒྲོལ་མ་འགྲུབ་གྱུར་ནས། །ཞེས་སོགས་བསྔོ་སྨོན་གྱིས་རྒྱས་གདབ་པོ། །ཞེས་པ་འདི་ཡང་དད་ལྡན་དཀོན་མཆོག་ཚུལ་ཁྲིམས་ཀྱིས་ཡང་ཡང་བསྐུལ་བའི་ངོར། དབྱངས་ཅན་བཞད་པས་བྲིས་བ་དགེ་ལེགས་འཕེལ། །པར་འདི་ཆོས་སྡེ་ཆེན་པོ་དཔལ་ལྡན་སྨྲ་བའི་སེང་གེའི་གླིང་དུ་བཞུགས།།