༄༅། །ཨོཾ་བདེ་ལེགས་སུ་གྱུར་ཅིག །བཀྲ་ཤིས་བདེ་ལེགས་ཕུན་སུམ་ཚོགས་བའི་སྒོ། །བརྒྱ་ཕྲག་དུས་གཅིག་འབྱེད་མཛད་བླ་མ་དང༌། །སྐྱོབ་པ་མཚུངས་མེད་རིན་ཆེན་རྣམ་གསུམ་གྱིས། །དེང་འདིར་བཀྲ་ཤིས་དངོས་གྲུབ་ཆར་ལྟར་ཕོབ། །ཅེས་བསླུ་མེད་སྐྱབས་མཆོག་རིན་ཆེན་རྣམ་གསུམ་གྱི་ཡོན་ཏན་ལ་བསྟོད་ཅིང་ཤིས་པ་བརྗོད་པའི་སྙན་ཚིག་སྐྱེ་བ་ལྔ་པའི་སྒྲ་དབྱངས་མཐོན་པོར་བསྒྲགས་པའི་དབྱིངས་ཀྱིས་མདུན་བསུས་ཏེ་གང་ཞུ་ན། དེ་ཡང་རྣམ་འདྲེན་ཚེ་མཐའ་ཡས་བའི་ངོ་བོ་ལྷར་བཅས་འགྲོ་བའི་འདྲེན་མཆོག་ཐུབ་བསྟན་ཡོངས་རྫོགས་ཀྱི་བདག་པོ་ྋསྐྱབས་མགོན་མཆོག་གི་གསང་བ་གསུམ་གྱི་ཡོན་ཏན་སར་གནས་དཔའ་བོ་རྣམས་ཀྱིས་ཀྱང་ཇི་ལྟ་བ་བཞིན་བརྗོད་པའི་ཡུལ་ལས་འདས་ན་བདག་ལྟ་བུས་བརྗོད་པར་ག་ལ་ནུས། འོན་ཀྱང་དམ་པའི་ཡོན་ཏན་ཆ་ཙམ་བརྗོད་ཅིང་བསྔགས་པ་ནི་བདེ་དགེ་ལེགས་ཚོགས་མ་ལུས་པའི་འབྱུང་གནས་སུ་གསུངས་པ་ལྟར། ཡིད་ཆེས་ཀྱི་དད་མོས་དྲག་པོའི་སྒོ་ནས་ཅུང་ཟད་བརྗོད་ན། ྋསྐྱབས་མགོན་མཆོག་ཉིད་བསྐལ་བ་དཔག་ཏུ་མེད་པའི་སྔོན་རོལ་ཏུ་འཁོར་བསྒྱུར་རྩིབས་ཀྱི་མུ་ཁྱུད་ཅེས་བྱ་བར་གྱུར་སྐབས་དེ་བཞིན་གཤེགས་པ་རིན་ཆེན་སྙིང་བོའི་སྤྱན་སྔར་ཐུགས་བསྐྱེད། རྫོགས་སྨིན་སྦྱངས་གསུམ་མཐར་ཕྱིན་ནས། རབ་འབྱམས་རྒྱལ་བའི་གསུང་གི་རང་མདངས་པདྨ་རིགས་ཀྱི་བདག་པོ་རྣམ་འདྲེན་ཚེ་མཐའ་ཡས་པའི་ངོ་བོར་སངས་རྒྱས་ཟིན་ནའང༌། ཇི་སྐད་དུ། མདོ་ལས། ཇི་ལྟར་ཟླ་བ་ཤར་བའི་ཚེ། །ཚད་མེད་པ་ཡི་གཟུགས་བརྙན་རྣམས། །ཆུ་སྣོད་སོ་སོར་སྣང་གྱུར་ཀྱང༌། །ཟླ་བ་གཉིས་སུ་འཕོ་བ་མེད། །ཅེས་གསུངས་བ་ལྟར། འབད་རྩོལ་ཀྱི་རྣམ་རྟོག་ཉེ་བར་ཞི་བའི་དབང་གིས་ཆོས་ཀྱི་སྐུ་ལས་ནམ་ཡང་གཡོ་བ་མེད་བཞིན་དུ། སྐལ་ལྡན་གྱི་གདུལ་བྱ་སོ་སོའི་མོས་པའི་རྫིང་བུར་གསང་བ་གསུམ་གྱི་སྒྱུ་འཕྲུལ་གྱི་ཟླ་གཟུགས་འགོག་མེད་དུ་སྟོན་པར་མཛད་པ་ཡིན་ཏེ།ཇི་སྐད་དུ།ཁྱད་པར་ཞིང་འདིར་དགྲ་བཅོམ་རབ་འབྱོར་དང༌། །གཞོན་ནུ་འོད་དང་དཔལ་ལྡན་མར་མེ་མཛད། །སྙན་བརྒྱུད་གདམས་པའི་གཏེར་གྱུར་དབེན་ས་བ། །ཆོས་ཀྱི་རྒྱལ་མཚན་བསྟན་པའི་དབང་ཕྱུག་སོགས། །སྐུ་ཡི་རྣམ་རོལ་རིམ་དང་ཅིག་ཆར་དུ། །རྒྱུན་མི་འཆད་བ་དེ་དག་རེ་རེས་ཀྱང༌། །ཁྱད་འཕགས་ཡོན་ཏན་དང་ནི་མཛད་པའི་མཐའ། །ལྕེ་བརྒྱར་སྤྲུལ་ཀྱང་བརྗོད་ནུས་སུ་ཞིག་མཆིས། །ཞེས་གསུངས་པ་ལྟར།མཉམ་མེད་བུ་རམ་ཤིང་པ་དབུས་འགྱུར་རྡོ་རྗེའི་གདན་དུ་བྱོན།ལེགས་བཤད་གདོང་ལྔའི་དབྱངས་ཀྱིས་སྨྲ་ངན་རི་དྭགས་ཚོགས་རྣམས་ཟིལ་གྱིས་མནན་ནས་ཕན་བདེའི་འབྱུང་གནས་ཐུབ་བསྟན་ཉིན་མོ་ལྟར་གསལ་པར་མཛད་པའི་ཚེ།རྒྱལ་བ་རང་ཉིད་ཀྱིས་ཆོས་ཉིད་སྨྲ་བའི་ཁྱུ་མཆོག་ཏུ་བསྔགས་ཤིང༌།ཉོན་མོངས་པའི་གཡུལ་ངོ་བཅོམ་པའི་འཕགས་པ་རབ་འབྱོར་དང༌།ཟླ་འོད་གཞོན་ནུ་སོགས་དང༌།འདབ་བརྒྱད་པདྨའི་དབྱིབས་ཅན་ཤམྦྷ་ལའི་གྲོང་ཁྱེར་བྱེ་བ་རེ་ལ་དབང་བསྒྱུར་པའི་རྒྱལ་ཕྲན་དགུ་བཅུ་རྩ་དྲུག་གི་རལ་བའི་ཟུར་ཕུད་ཀྱི་རྩེ་མོར་ཞབས་སེན་དབང་བསྒྱུར་བའི་རིགས་ལྡན་འཇམ་དཔལ་གྲགས་པར་གྱུར་ནས་གདུལ་བྱ་ཐམས་ཅད་རྡོ་རྗེའི་རིགས་གཅིག་ཏུ་ངེས་པར་མཛད་དེ། དཔལ་དུས་ཀྱི་འཁོར་ལོའི་བསྡུས་རྒྱུད་གྱི་བཤད་སྲོལ་དར་རྒྱས་སུ་མཛད། གཞན་ཡང་དཔལ་མགོན་འཕགས་པ་ཀླུ་སྒྲུབ་ཀྱི་ཐུགས་སྲས་རིགས་པའི་ཁུ་བྱུགས་དང༌། སློབ་དཔོན་ལེགས་ལྡན་འབྱེད་དུ་གྱུར་ནས་ཐེག་པ་ཆེན་པོའི་ལམ་བཟང་གསལ་བར་མཛད་ལ། བསིལ་ལྡན་གངས་ཀྱི་རི་བོའི་དོ་ཤལ་ཚར་དུ་དངར་བའི་ཡུལ་ལྗོངས་འདིར་ཡང༌། ལྷ་གཅིག་དཱི་པཾ་ཀཱ་རའི་སྐུར་བསྟན་ནས། ལྷ་ཆོས་བདུན་ལྡན་གྱི་བསྟན་པ་ཉིན་མོ་ལྟར་གསལ་བར་མཛད་པ་དང༌། མཁས་གྲུབ་ཆོས་ཀྱི་རྒྱལ་པོའི་སྐུའི་སྐྱེ་བ་བཞེས་ཏེ། འཁྲུལ་བྲལ་ཚང་ལ་མ་ནོར་བ་ཡབ་རྗེ་རྒྱལ་བ་གཉིས་པའི་རིང་ལུགས་སྲིད་མཐའི་བར་དུ་དར་རྒྱས་སུ་མཛད་པ་སོགས་མདོར་ན་འཕགས་པའི་གནས་བརྟན་རབ་འབྱོར་ནས་བཟུང་ྋསྐྱབས་མགོན་དམ་པ་རྗེ་བཙུན་བློ་བཟང་དཔལ་ལྡན་ཆོས་ཀྱི་གྲགས་པ་བསྟན་པའི་དབང་ཕྱུག་དཔལ་བཟང་པོའི་བར་དུ་ངེས་པ་དོན་གྱི་བསྟན་འཛིན་གྱི་སྐྱེས་བུ་དམ་པ་གསེར་རིའི་ཕྲེང་བ་ཚར་དུ་བསྒྲིགས་པ་ལྟ་བུའི་སྐྱེ་རབས་སྤྱི་དང༌། ལྷག་པར་བཀའ་གདམས་གླེགས་བམ་ལས། ཆོས་དགེ་བ་བཅུ་ཡིས་ཁྱད་འཕགས་པ། །གླིང་ཕུན་སུམ་ཚོགས་པ་འཛམ་བུའི་གླིང༌། །དགོས་ཉང་ཞམ་ས་ཡི་ལྟེ་བ་སྟེ། །ས་དེ་ཡི་ནང་ནས་ཁྱད་འཕགས་པ། །མཐོ་བཀྲ་ཤིས་བརྟན་པ་ལྷུན་པོའི་འདབས། །ནོར་པདྨ་རཱ་ག་ལྟ་བུའི་མདུན། །ཞེས་པའི་ལུང་གིས་གསལ་བར་ཟིན་པའི་ཆོས་སྡེ་ཆེན་པོ་བཤད་སྒྲུབ་བསྟན་བའི་འབྱུང་གནས་བཀྲ་ཤིས་ལྷུན་གྱིས་གྲུབ་པའི་སྡེ་འདི་ཉིད་རྗེ་དགེ་འདུན་གྲུབ་ཀྱིས་ཕྱག་འདེབས་གནང་སྐབས་གཙུག་ལག་ཁང་གི་སྟེང་དུ་གསེར་གྱི་རྒྱལ་མཚན་བཅུ་གསུམ་འཛུག་པའི་མཚན་ལམ་བྱུང་བ་ལྟར། གདན་རབས་བཅུ་གསུམ་གྱི་བར་བསྟན་པ་ཉིན་མོ་བཞིན་དུ་གསལ་བར་མཛད་པ་ལུང་བསྟན་པ་བཞིན། འཁྲུལ་བྲལ་ཡབ་རྗེའི་རིང་ལུགས་མདོ་སྔགས་ཟུང་དུ་འབྲེལ་བའི་བསྟན་བའི་རྒྱལ་མཚན་སྲིད་རྩེར་བསྒྲེངས་པ་ལ་འགྲན་པའི་ཟླ་ཐམས་ཅད་དང་བྲལ་བ་ྋསྐྱབས་མགོན་ཐཾད་མཁྱེན་ཅིང་གཟིགས་པ་ཆེན་པོ་མཚན་བརྗོད་པར་དཀའ་ནའང་དོན་གྱི་སླད་དུ་མཚན་ནས་སྨོས་ཏེ་རྗེ་བཙུན་བློ་བཟང་འཕྲིན་ལས་ཐུབ་བསྟན་ཆོས་ཀྱི་ཉི་མ་དགེ་ལེགས་རྣམ་རྒྱལ་དཔལ་བཟང་པོ་ཉིད་ནི་བདེ་ལྡན་ཞིང་གི་མགོན་པོ་སྣང་བ་མཐའ་ཡས་ལགས་ཀྱང༌། མཐུན་སྣང་གི་དབང་དུ་བྱས་ན། བཤད་རྒྱུད་རྡོ་རྗེའི་ཕྲེང་བ་ལས། ཕྱི་རུ་ཉན་ཐོས་སྤྱོད་སྐྱོང་བཞིན། །ནང་དུ་འདུས་པ་ལ་རབ་དགའ། །ཞེས་གསུངས་པ་བཞིན། སྐུའི་ན་ཚོད་ཕྲ་མོའི་དུས་ནས་བསྔགས་འོས་ཡོན་ཏན་གྱི་དམ་པའི་རང་རྟགས་མངོན་དུ་གྱུར་ནས་མཚན་ལྡན་དགེ་བའི་བཤེས་གཉེན་ཚུལ་བཞིན་དུ་བསྟེན་ཏེ་འདུལ་ཁྲིམས་གཙང་མའི་ཆུ་ལོན་བརྟན་པོས།བག་མེད་ཉེ་པའི་ཆུ་ཀླུང་འགོག་པའི་སོ་སོར་ཐར་པའི་ཚུལ་ཁྲིམས་ཟ་འོག་གོས་ཀྱིས་ཉེ་པར་ཀླུབས་ཤིང༌། ཐབས་ཤེས་ཁྱད་པར་ཅན་གྱི་ལུས་རྩལ་ཡོངས་སུ་རྫོགས་པའི་སྒྲིབ་བྲལ་བདེ་སྟོང་གི་ཡེ་ཤེས་དང༌། དག་པའི་སྒྱུ་ལུས་ཟུང་དུ་འཇུག་པའི་རྣམ་འབྱོར་གྱིས་སྣོད་བཅུད་དག་པ་རབ་འབྱམས་གྱི་དགའ་སྟོན་ལ་རོལ་བཞིན། ཚད་མེད་ཐུགས་རྗེའི་ཆུ་འཛིན་གྱི་གདེངས་ལས།སྡུག་བསྔལ་དང་ཀུན་འབྱུང་གི་ཚ་གདུངས་མ་ལུས་པ་སེལ་པའི་ཟབ་རྒྱས་ཆོས་ཀྱི་སྦྲང་ཆར་སྐལ་ལྡན་གདུལ་བྱའི་ཡིད་ཀྱི་ཞིང་སར་ཕབས་པས་ཐར་པའི་མྱུ་གུ་སྨིན་པར་མཛད་དེ། ཐུབ་བསྟན་སྤྱི་དང་བསྟན་པའི་ཡང་སྙིང་འཇམ་མགོན་རིང་ལུགས་ཐུབ་གསུང་བརྒྱད་ཁྲི་བཞི་སྟོང་ཡོངས་ཀྱི་ཟབ་གནད་བ་མཆོག་སྟོང་གི་འོ་མའི་ཉིང་ཁུ་ལྟ་བུ་མདོ་སྔགས་ཟུང་འབྲེལ་གྱི་བསྟན་པའི་པད་ཚལ་རྒྱས་པར་མཛད་པའི་རྣམ་པར་ཐར་པའི་འཕྲིན་ལས་ནུབ་ཕྱོགས་གུར་གུམ་གྱི་མེ་ཏོག་འཆར་བ་ནས། ཤར་ཆུ་གཏེར་ཀྱི་རླབས་ཕྲེང་གཡོ་བའི་བར་དུ་ཁྱབ་པར་མཛད་པའི་མཐུས། འཛམ་གླིང་དྲེགས་པས་མྱོས་པའི་ཆེ་དགུ་ཡོངས་ཀྱིས་མགོ་པོ་སྨད་དེ། སོར་བཅུའི་འདབ་མ་སྙིང་གར་སྦྱར་ནས། མགོན་དང་སྐྱབས་སུ་གསོལ་ཏེ་གཅེས་ནོར་ཡོད་དགུའི་མཆོད་པ་དང་བསྙེན་བཀུར་པའི་སྐྱེ་འགྲོ་ཡོངས་ལ༌རང་རང་གི་སྐལ་བ་དང་འཚམས་པར་ཟབ་གསུང་འཆི་བ་མེད་པའི་བདུད་རྩིས་བསམ་དགུའི་རེ་བ་བསྐངས་ཏེ་བདེ་ལེགས་ཤིས་པའི་དགེ་མཚན་གསར་དུ་ངོམས་པའི་དུས་སྐབས་བཟང་པོ་འདིར་གུས་ཕྲན་དགའ་ཆེན་བློ་བཟང་བཀྲ་ཤིས་པས་ྋསྐྱབས་མགོན་མཆོག་གི་བཀའ་དྲིན་ཆ་ཙམ་བསབ་ཕྱིར། ཇི་སྐད་དུ། མདོ་ལས་དངོས་པོ་དམན་ཡང་བསམ་པ་དམ་པ་ཡིས། །རྒྱལ་བ་མཆོག་པའི་བསོད་ནམས་གཞལ་དུ་མེད། །ཅེས་མེ་ཏོག་དང་ལྷ་རྫས་ཀྱི་དཔེ་ལྟར་དངོས་འབྱོར་གྱི་མཆོད་པ་བཀྲ་ཤིས་པའི་ལྷ་རྫས་ཀྱིས་ཐོག་དྲངས༌྾྾྾གཞན་ཡང་རང་གཞན་ཀུན་གྱི་ལུས་ལོངས་སྤྱོད་དུས་གསུམ་དགེ་ཚོགས་ཐམས་ཅད་ཀུན་ཏུ་བཟང་པོའི་མཆོད་སྤྲིན་ཆེན་པོར་མོས་ཏེ་འབུལ་བ་ལགས་ན། སླར་ཡང་གསོལ་བ་རྩེ་གཅིག་ཏུ་འདེབས་པའི་སྙིང་བོ་ནི། དཔལ་ཆོས་ཀྱི་གྲགས་པས། འདོད་ཆགས་བྲལ་བའི་གནས་པ་ནི། །བརྩེ་བའམ་ཡང་ན་ལས་ཀྱིས་ཡིན། །ཞེས་ཉན་རང་དགྲ་བཅོམ་རྣམས་ཀྱང་འཁོར་བར་སྙིང་རྗེའི་དབང་གིས་ཚེ་བྱིན་གྱིས་བརླབས་ཏེ་ཡུན་རིང་པོར་གནས་པར་གསུངས་མོད། དེས་ན་གཞིག་བྲལ་རྡོ་རྗེའི་སྐུ་ལ་མངའ་བརྙེས་པའི་ྋསྐྱབས་མགོན་མཆོག་གིས་གདུལ་བྱ་དང་ཡུལ་དུས་ཕྱོགས་རེ་བ་མ་ཡིན་པར། དེང་དུས་སྙིགས་མ་ལྔ་བདོ་བའི་ངང་ཚུལ་དང༌། བསྟན་པ་རིན་པོ་ཆེ་ཡང་པདྨའི་ཟེ་བ་ལྟར་ཉག་ཕྲ་བའི་ཚུལ་ཐུགས་ལ་དགོངས་ནས། སྔོན་གྱི་ཐུགས་བསྐྱེད་ཀྱི་ནུས་མཐུ་རྒྱ་ཆེར་བསྐྱེད་དེ། །ཞབས་ཟུང་འགྱུར་མེད་རྡོ་རྗེའི་ངོ་བོར་རྣམ་འདྲེན་ཚེ་མཐའ་ཡས་པ་བཞིན་དུ་བགྲང་ཡས་བསྐལ་བའི་བར་དུ་བརྟན་པར་བཞུགས་ནས། འགྲོ་བ་རྣམས་ཀྱི་སྡུག་བསྔལ་ཕྱག་གིས་སེལ་བ་དང༌། སྡིག་པ་ཆུས་འཁྲུ་བ་སོགས་བྱར་མེད་པར་མཛད་པ་ཐམས་ཅད་གྱི་མཆོག་གསུང་གི་མཛད་པའི་སྒོ་ནས་གདུལ་བྱ་སྨིན་གྲོལ་གྱི་ལམ་བཟང་པོ་ལ་འགོད་དགོས་པ་ནི། ཇི་སྐད་དུ། ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང༌། །འགྲོ་བའི་སྡུག་བསྔལ་ཕྱག་གིས་མི་སེལ་ལ། །ཉིད་ཀྱི་རྟོགས་པ་གཞན་ལ་འཕོ་མིན་ཏེ། །ཆོས་ཉིད་བདེན་པ་བསྟན་པས་གྲོལ་བར་འགྱུར། །ཞེས་གསུངས་པ་ལྟར། གདུལ་བྱ་སོ་སོའི་ཁམས་དང་བསམ་པ་དང་མཐུན་པར་ཟབ་པ་དང༌།རྒྱ་ཆེ་པའི་ཆོས་ཀྱི་འཁོར་ལོ་བསྐོར་བར་སྙིང་ནས་གསོལ་བ་འདེབས་པ་ལགས་པས། བདག་ཅག་གདུལ་བྱའི་དད་མོས་དང༌། རྗེ་རང་གི་ཐུགས་བསྐྱེད། ཆོས་ཉིད་འགྱུར་བ་མེད་པའི་མཐུ་སོགས་རྒྱུ་རྐྱེན་རྟེན་འབྲེལ་ཚོགས་པའི་སྟོབས་ཀྱི་ཇི་ལྟར་གསོལ་བའི་དོན་བཞིན་རེ་འབྲས་དོན་སྨིན་གྱི་ཞལ་བཞེས་ནོར་བུའི་རྒྱན་ཕྲེང་བདེ་ཆེན་འཁོར་ལོའི་མཛེས་རྒྱན་དུ་སྩོལ་པར་མཁྱེན་མཁྱེན་ཞུ་བ་དང༌། ཞར་བྱུང་བདག་ཅག་གྲྭ་འཁོར་གྱི་གཙོར་བྱས། ཕ་མ་ཉེ་འབྲེལ་བྲན་གཡོག་མཐོང་ཐོས་དྲན་རེག་ནོར་རྫས་ཀྱི་འབྲེལ་བ་སྤྱི་དང༌། ལྷག་པར་ཨ་མདོའི་ཡུལ་གྱི་འབྲེལ་ཐོག་ཚེ་འདས་རྣམས་ད་ནས་བཟུང་སྟེ་བྱང་ཆུབ་མ་ཐོབ་ཀྱི་བར་གྱི་ཚེ་རབས་ཀྱི་ཕྲེང་བ་འབྲལ་མེད་རྗེས་སུ་བཟུང་ནས། ཐེག་པ་མཆོག་གི་དགེ་བའི་བཤེས་གཉེན་མཛད་དེ། གསུང་གི་བདུད་རྩིས་རྒྱུད་སྨིན་པར་བྱས་ནས། འཁོར་བ་ལ་ཞེན་པ་ལོག་པའི་ངེས་འབྱུང་གིས་རྒྱུད་བསྐུལ། ལམ་བསླབ་པ་གསུམ་གྱི་ཉམས་ལེན་དང༌། བདག་པའི་གཞན་གཅེས་པའི་བྱང་ཆུབ་ཀྱི་སེམས་ཀྱིས་ཟིན་པའི་ལམ་ཕར་ཕྱིན་དྲུག་དང༌། བསྡུ་བཞིའི་ཉམས་ལེན་མཐར་ཕྱིན་ཏེ། སྐུ་བཞིའི་གོ་འཕང་མྱུར་དུ་ཐོབ་བའི་སྐྱབས་འཇུག་དང༌། ཚེ་ལྡན་རྣམས་ཀྱི་གནས་སྐབས་མི་འདོད་བའི་ནད་རིམས་གདོན་བགེགས་སོགས་མི་མཐུན་པའི་མཚན་མ་ཉེ་བར་ཞི་ནས། མཐུན་རྐྱེན་ཚེ་དང་བསོད་ནམས་དཔལ་འབྱོར་སྙན་གྲགས་ཀླུང་རྟ་སོགས་ཆོས་སྲིད་ཀྱི་ལེགས་ཚོགས་ཐམས་ཅད་གོང་དུ་འཕེལ་བ་དང༌། ནམ་ཞིག་མགོན་ཁྱོད་རིགས་ལྡན་དྲག་པོར་གྱུར་ཚེ་འཁོར་གྱི་ཐོག་མར་གྱུར་ནས་གསུང་གི་བདུད་རྩིལ་ངོམས་མེད་དུ་ལོངས་སྤྱོད་པའི་མཐུས། འགྱུར་མེད་བདེ་བ་མཆོག་གིས་ལས་རླུང་སྒྲིབ་པའི་དཔུང་ཚོགས་ཉེ་བར་བཅོམ་ནས། སྟོང་གཟུགས་ཕྱག་རྒྱ་ཆེན་པོའི་རང་ཞལ་མངོན་དུ་འགྱུར་པའི་སྐྱབས་འཇུག་དང༌། མདོར་ན་གོང་ཞུས་ལྟར་གྱི་རེ་འབྲས་ཡིད་བཞིན་འགྲུབ་པའི་ཞལ་བཞེས་ནོར་བུའི་ཅོད་པན་བདེ་ཆེན་འཁོར་ལོའི་མཛེས་རྒྱན་དུ་རྩོལ་བར་མཁྱེན་མཁྱེན་ལགས།ཞེས་པ་འདི་ནི་མདོ་སྨད་ཝ་ཤུལ་ཤོག་གི་ཁྲི་བ་མང་ཐོས་ཡོན་ཏན་བྱེ་བའི་གཏེར་མཛོད་འཛིན་པ་དཀའ་ཆེན་བློ་བཟང་བཀྲ་ཤིས་བས༌༸བདེ་ལྡན་ཞིང་གི་མགོན་པོ་པཎ་ཆེན་ཐམས་ཅད་མཁྱེན་ཅིང་གཟིགས་པ་ཆེན་པོའི་ྋཞབས་དྲུང་དུ་ཞུ་རྒྱུར་མཎྜལ་བཤད་པ་འདི་ལྟ་བུ་ཞིག་དགོས་ཞེས་ནན་ཆེར་བསྐུལ་བའི་བཀའ་ལྡོག་མ་ནུས་པར་ ྋདབྱངས་ཅན་བཞད་པས་སྦྱར་བ་འདི་ཡང་ཚེ་རབས་ཀུན་ཏུ་རྣམ་འདྲེན་སྣང་མཐས་རྗེས་སུ་འཛིན་པའི་རྒྱུར་གྱུར་ཅིག།   །།པར་འདི་དཔལ་ལྡན་སྨྲ་བའི་སེང་གེའི་གླིང་དུ་བཞུགས།།