གསལ་བསྒྲགས།
༄༅། །སྤྱིར་སངས་རྒྱས་ལ་ཐུགས་ཉེ་རིང་དང༌། བྱིན་རླབས་ལ་རྒྱང་རིང་ཐུང་། ནུས་པ་ལ་མཆོག་དམན་ཁྱད་པར་མི་མངའ་ཡང་སྔོན་སློབ་པ་ལམ་ཀྱི་གནས་སྐབས་སུ་སྨོན་ལམ་ཀྱི་མཐུ་དང་བྱང་ཆུབ་ཏུ་ཐུགས་བསྐྱེད་ཚུལ་སོགས་ཀྱིས་སངས་རྒྱས་པའི་སྐབས་སུ་གདུལ་བྱའི་ཁམས་དང་མོས་པ་སྣ་ཚོགས་ཀྱི་སྒོ་ནས་དོན་བྱེད་ཚུལ་ཡང་སྣ་ཚོགས་སུ་ཡོད་ལྟར།
ཀུན་རིག་རྣམ་པར་སྣང་མཛད་ནི། ངན་སོང་གསུམ་གྱི་གནས་ལས་སྡུག་བསྔལ་གསུམ་ཅི་རིགས་པས་མནར་བའི་སེམས་ཅན་རྣམས་ཡོངས་སུ་སྒྲོལ་བ་ལ་མཆོག་ཏུ་སེམས་བསྐྱེད་པའམ་མཆོག་ཏུ་བསྔགས་པ་ཡིན་པས་མཚན་ལ་ངན་སོང་ཐམས་ཅད་ཡོངས་སུ་སྦྱོང་བའི་རྒྱལ་པོ་ཀུན་རིག་རྣམ་སྣང་མཛད་ཞེས་མཚན་དོན་དང་ལྡན་ནོ་ཞེས་པ་ནི་གླེང་གཞིའོ། །
འདིར་དགའ་ལྡན་ཤར་རྩེ་སོག་པ་འཇམ་དབྱངས་ཁང་ཚན་དང་དད་དམ་གསེར་གྱི་ཕྲེང་ཐག་ཆད་མ་མྱོང་བའི་འཛམ་གླིང་ཡུལ་ཕྱོགས་གང་སར་བཞུགས་པའི་དད་གཏོང་སྦྱིན་བདག་རྣམས་དང་འབྲེལ་ཡོད་ཡོངས་ལ་ཆེད་ཞུ།
ནམ་རྒྱུན་ཁང་ཚན་གྱི་ངོས་ནས་སྦྱིན་བདག་དང་འབྲེལ་ཡོད་སོགས་ཀྱི་ཐུགས་འདོད་ལྟར་ད་བར་ཞབས་བརྟན་དང་གཤིན་ཆོས་ཀྱི་རིགས་མང་པོ་ཞིག་སྒྲུབ་བཞིན་པ་དང་། ད་དུང་ལོ་འཁོར་རིང་ཉིན་རེ་བཞིན་དགེ་བཤེས་ཚོས་ཀུན་རིག་གི་བདག་བསྐྱེད་དང༌། ཚྭ་གསུར་སོགས་ཆད་མེད་དང༌། བདུན་རེའི་མཚམས་སུ་ཀུན་རིག་གི་གཤིན་ཆོག་གམ་ཁྲུས་ཆོག་ཚར་རེ་མ་ཆད་པར་ལོ་འཁོར་བར་གསུང་གི་ཡོད།
ལྷག་ཏུ་གཤིན་པོ་ཚོའི་ཆེད་དུ་ཀུན་རིག་རྣམ་པར་སྣང་མཛད་ཀྱི་སྒོ་ནས་ཞེ་དགུའི་ཁྲུས་ཆོག་འདོན་དགོས་མཁན་བྱུང་ཚེ་ཞེ་དགུའི་ཁྲུས་ཆོག་ཡང་འདོན་བཞིན་ཡོད། གཞན་སྐུ་ཉིད་ལ་འཕྲལ་ཕུགས་སོགས་ལས་དོན་ཅི་རིགས་ཀྱི་ཆེད་དུ་ཀུན་རིག་གི་ཆོ་ག་སོགས་ཀྱི་མཚོན་པའི་གཤིན་ཆོས་དང་རིམ་གྲོའི་རིགས་ཅི་མཆིས་ན་སོག་པ་ཁང་ཚན་དང་འབྲེལ་བ་བྱོས་དང་ང་ཚོས་ངོས་ནས་གང་འབྱོན་གང་ལྕོགས་ཀྱིས་ཁྱེད་ཀྱི་ཐུགས་འདོད་སྒྲུབ་ངེས་པ་ལགས།
ཞེས་དགའ་ཤར་སོག་པ་སློབ་གཉེར་རོགས་རམ་ཚོགས་ཆུང་གིས་ཟླ་ཚེས་བཟང་པོར་སྤེལ།