༄། །གཅའ་སེར་སྡེ་མི་ཕམ་བྱམས་པ་གླིང་ནི་ལོ་ངོ་བརྒྱ་ཕྲག་གཉིས་ཡར་སྔོན་ནས་གྲོང་སེར་ཞེས་སྦྲ་གུར་ཕུབ་ནས་སྒྲུབ་མཆོད་དང་རུ་སེར་སྡེའི་སྐུ་རིམ་སོགས་སྒྲུབ་པའི་སྒྲུབ་སྡེ་ཞིག་ཡིན། རྗེས་སུ་ཕྱི་ལོ་གཅིག་སྟོང་དགུ་བརྒྱ་བརྒྱད་ཅུ་པའི་ནང་རིམ་གྱིས་རུང་ཁང་དང་འདུ་ཁང་གྲྭ་ཤག་སོགས་བཞེངས་ཏེ་དགོན་པ་ཞིག་གི་ངོ་བོར་གྱུར། ༡༩༨༤ ལོ་རོང་ཆེན་ཀིརྟི་རིན་པོ་ཆེའི་སྐུ་ཕྲེང་བཅུ་གཅིག་པ་མཆོག་གིས་འདུ་ཁང་གི་ས་ལ་ཐུགས་དམ་གནང་བ་དང། དབུས་བླ་དགའ་ལྡན་པ་བྱམས་པ་ཚང་གིས་འདུ་ཁང་གི་མདུན་རྒྱབ་སོགས་ལ་ལེགས་པར་བརྟགས་ཏེ་འདུ་ཁང་གསར་དུ་བཞེངས། ༡༩༨༨ ལོའི་བོད་ཟླ་གཉིས་པའི་ནང་ཆོས་ཚན་རིག་པའི་པཎ་ཆེན་འདུལ་བ་འཛིན་པ་ཨ་མཆོག་རིན་པོ་ཆེ་སྐུ་ཕྲེང་བཞི་པ་ཆེན་པོ་ཕེབས་ཏེ་རུ་དགོན་ལ་ཐུགས་རྗེ་ཆེན་པོའི་བཀའ་དབང་དང་། ཚེ་དབང་སྩལ་ཅིང་། དགོན་པ་འདི་དང་ཕྱོགས་མཐའ་ནས་ཕེབས་པའི་དགེ་འདུན་བརྒྱ་ཕྲག་གཉིས་མ་ལོངས་ཙམ་ལ་བསྙེན་རྫོགས་ཀྱི་སྡོམ་པ་གནང་། མ་ཟད་སྐབས་དེར་གཅའ་ཚང་གི་ཁྱིམ་ཚང་རེ་རེ་བཞིན་ཕེབས་ཏེ་འདོད་ཆོས་དང་ཐུགས་སྨོན་མཛད། སྐབས་དེ་དུས་ཀྱི་དགོན་པའི་བླ་མ་ལས་སྣེ་དང་དོ་དམ་མི་སྣས་ཞུས་ངོར་དགོན་པའི་མིང་ལ་མི་ཕམ་བྱམས་པ་གླིང་ཞེས་གསོལ་ཏེ་ཕྱག་བྲིས་ཀྱང་གནང་།
དབལ་ཤུལ་གཅའ་ཚང་ནི་ཁྲོ་ཁོ་ཁ་གསུམ་གྱི་ནང་ཚན་ཏེ་ཕྱི་ཁ་ནག་བཟའ་བུ་གསུམ་དང་ནང་རྡོར་བཟའ་བུ་གསུམ་དུ་གྱེས་པའི་གཅའ་ཚང་གི་དཔོན་རྒྱ་ཡས་ཀྱི་བརྒྱུད་པ་དབལ་ཤུལ་ཨུ་རྒྱན་སྐྱབས་དང་། དེའི་བུ་དཔོན་སྐལ་ངག་གཉིས་བྱུང་བའི་ངག་དབང་སྟོབས་རྒྱལ་དབུས་མཇལ་དུ་སོང་ནས་ཀུན་གཟིགས་པཎ་ཆེན་བསྟན་པའི་ཉི་མ་མཆོག་ལ་རང་ཡུལ་གྱི་བདེ་སྡུག་ཞུས་ཏེ། ཤི་བོའི་ལམ་སྟོན་དང་གསོན་པོའི་སྐྱབས་གནས་སུ་བླ་མ་ཁྱེད་དང་ཁྱད་པར་མེད་པའི་དབུས་བླ་ཞིག་ཅེས་ཀྱང་གཏོང་གནང་ཡོང་བའི་སྐྱབས་འཇུག་ཞུས་ངོར། གཙང་བླ་བླ་རབས་དང་པོ་བསྟན་པའི་འབྱུང་གནས་བཀྲ་ཤིས་ལྷུན་པོའི་སྟག་མོ་ཁང་ཚན་གྱི་མཁྱེན་བརྩེའི་བདག་ཉིད་༸རྗེ་མེར་གེན་སྔགས་རམས་པ་བློ་བཟང་བཀྲ་ཤིས་མཆོག་གཏོང་གནང་མཛད་པ་ནས་ད་ལྟ་བླ་རབས་ཉེར་བཞི་པ་རྗེ་བློ་བཟང་རྒྱལ་མཚན་གྱིས་སྐྱོང་བཞིན་པ་ཡིན།
ཕྱི་ལོ་ ༡༨༤༢ ལོར་དཔོན་རྣམ་རྒྱལ་རབ་བརྟན་དབུས་མཇལ་དུ་འགྲོ་སྐབས་དགའ་ལྡན་བྱང་རྩེའི་ཕྱག་མཛོད་ཁམས་པ་ཤེས་རབ་ཆོས་འཕེལ་ལ་དབལ་ཤུལ་གཅའ་ཚང་གི་རུ་དགོན་གཉིས་ཀྱི་མགོན་སྐྱབས་དཔུང་གཉེན་དུ་དགའ་ལྡན་ཁྲི་རིན་པོ་ཆེ་དང་ཁྱད་པར་མེད་པའི་བླ་མ་ཞིག་གཏོང་གནང་དགོས་ཞེས་ནན་གྱིས་ཞུས་པས་དབུ་ཆོས་རྣམ་གསུམ་སོགས་འཚོགས་འདུ་རྒྱས་འཛོམས་ཀྱིས་གྲོས་ཐེངས་གཉིས་བྱས་འབྲས། དགའ་ལྡན་བླ་རབས་དང་པོ་མཁས་བཙུན་བཟང་གསུམ་གྱི་ཡོན་ཏན་དུ་མས་ཐུགས་རྒྱུད་ལེགས་པར་ཕྱུག་ཅིང་སྔོན་གནས་རྗེས་དྲན་སོགས་མངའ་བའི་ཨ་ལགས་བློ་བཟང་བཀྲ་ཤིས་སམ་མཚན་གཞན་མཚལ་ཚང་གཏོང་གནང་མཛད་པ་ནས་ད་ལྟ་དགའ་ལྡན་བླ་རབས་བཅུ་བདུན་པ་རྗེ་བློ་བཟང་འཕྲིན་ལས་མཆོག་གིས་སྐྱོང་བཞིན་པའོ།།
དེ་ལྟར་དབུས་བླ་གཙང་སྒར་གཉིས་ཀྱིས་དབལ་ཤུལ་གཅའ་ཚང་གི་རུ་སེར་སྡེ་གཉིས་ཀ་ལེགས་པར་བསྐྱངས་དང་སྐྱོང་བཞིན་པའི་བཀའ་དྲིན་ནི་ཤིན་ཏུ་འཇལ་བར་དཀའ། མ་ཟད་མདོ་སྨད་བསྟན་པའི་བདག་པོ་ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེ་སྐུ་ཕྲེང་རིམ་བྱོན་དང་། གཅའ་ཚང་རང་དུ་འཁྲུངས་པའི་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་ལྔ་བཅུ་པ་ཁྲི་ཆེན་དགེ་འདུན་ཕུན་ཚོགས་ཀྱི་སྐྱེ་རབས་གུང་ཐང་སྐུ་ཕྲེང་རིམ་བྱོན། མཉམ་མེད་བུ་རམ་ཤིང་བའི་བསྙེན་གནས་ཐོས་པའི་མཛོད་འཛིན་ཉན་ཐོས་ཆེན་པོ་ཀུན་དགའ་བོའི་སྐྱེ་རབས་ཀྱི་ཕྲེང་བ་འཛིན་པ་ཨ་མཆོག་སྐུ་ཕྲེང་རིམ་བྱོན། རོང་ཆེན་བསྟན་པའི་སྒྲོན་མེ་ཀིརྟི་སྐུ་ཕྲེང་རིམ་བྱོན་སོགས་གདན་ཞུས་ལྟར་ཕེབས་ཏེ་གཟིགས་སྐྱོང་ལེགས་པར་གནང་དང་གནང་མུས་ལགས་ཤིང་། མདོ་སྨད་བསྟན་པའི་འབྱུང་གནས་བླ་བྲང་བཀྲ་ཤིས་གཡས་སུ་འཁྱིལ་བའི་མཁས་པའི་དབང་པོ་བླ་མ་མཁྱེན་ཚོགས་ཚང་དང་། སྨད་སོག་ནོར་བུ་ཚང་། དཔལ་རིའི་རབ་གསལ་ཚང་བཅས་གཏོང་གནང་ཀྱང་མཛད་སྐད།
དགོན་པ་འདི་གནའ་ནས་བཟུང་དཔོན་རབས་ཀྱིས་རེ་འདོན་ལྟར་རུ་ལྷ་སྡེའི་བདེ་སྡུག་གི་ཉམས་ལ་རེ་བའི་ཆེད་རྒྱུད་པ་བའི་སྡེ་ཞིག་ཡིན་པ་བཞིན་ད་ལྟའང་རྒྱུད་སྡེ་བཞིའི་སྒྲུབ་པ་མཛད་པའི་སྒྲུབ་སྡེ་ཞིག་ཡིན། དེ་ཡང་པཎ་ཆེན་བསྟན་པའི་ཉི་མའི་བཀའ་ལུང་ལྟར་རབ་བྱུང་བཅུ་བཞི་པའི་ཤིང་ཁྱི་ཕྱི་ལོ་ ༡༨༡༤ ཡས་མས་ཤིག་ལ་གཙང་བླ་བླ་རབས་གཉིས་པ་བཀའ་ཆེན་བློ་བཟང་བསྟན་དར་གྱིས་འཇིགས་བྱེད་ལྷ་བཅུ་གསུམ་མའི་ཆོ་གའི་དབང་ལུང་དང་། བསྐྱེད་རྫོགས་ཀྱི་ཁྲིད་གནང་སྟེ་འཇིགས་བྱེད་ཀྱི་སྒྲུབ་མཆོད་བཙུགས་པ་ནས་བཟུང་། ད་ཆ་གསང་བདེ་འཇིགས་གསུམ་གྱི་སྒྲུབ་མཆོད་ས་ཆོག་དང་བཅས་པ། དེ་བཞིན་དཔལ་དུས་ཀྱི་འཁོར་ལོ་ཀུན་རིག་རྣམ་པར་སྣང་མཛད་མངོན་པར་བྱང་ཆུབ་པ་ཐུགས་རྗེ་ཆེན་པོ་རྣལ་འབྱོར་མ་སྨན་བླའི་མདོ་ཆོག་སོགས་སྒྲུབ་མཆོད་ཚད་དང་ལྡན་པ་བཞུགས།
གཞི་གསུམ་གྱི་ཉམས་ལེན་གཙོ་བཟུང་ཐོག་རྒྱུད་སྡེ་བཞིའི་མཚམས་བསྙེན་ལ་ཀུན་གྱིས་འབད། སྤྱིར་གཅའ་ཚང་གི་དགེ་འདུན་པ་གཞུང་ཆེན་ཁག་ལ་འཆད་ཉན་གནང་འདོད་ཡོད་རིགས་དབུས་འགྱུར་གྱི་གདན་ས་ཁག་དང་། མདོ་སྨད་ཀྱི་ཆོས་སྡེ་ཆེན་པོ་བླ་བྲང་བཀྲ་ཤིས་འཁྱིལ། སྟག་ཚང་ལྷ་མོའི་ཀིརྟི་དགོན། རྔ་བའི་ཀིརྟི་དགོན། ཨ་མཆོག་མཚན་ཉིད་དགོན། རྔ་བའི་སྒོ་མང་དགོན་སོགས་སུ་ཕེབས་སྲོལ་ཡོད་པ་བཞིན་ད་སྐབས་ཀྱང་ཨ་མཆོག་མཚན་ཉིད་དགོན་དང་རྔ་བའི་ཀིརྟི་དགོན་གཉིས་ན་གཅའ་ཚང་གི་གྲྭ་རྒྱུན་བརྒྱ་ཕྲག་གཅིག་ལྷག་རེ་བཞུགས། དེ་མིན་དགོན་པ་འདིར་དགེ་འདུན་ཞལ་གྲངས་ཉིས་བརྒྱ་སུམ་བཅུ་ཡས་མས་བཞུགས་ཤིང་དེ་དག་གིས་རང་དགོན་གྱི་སྒྲུབ་མཆོད་ཁག་དང་ཞོར་དུ་རྔ་བའི་ཀིརྟི་དགོན་དང་ཨ་མཆོག་མཚན་ཉིད་དགོན་སོགས་སུ་ཕེབས་ཏེ་དཔེ་ཆ་དཔེ་ཁྲིད་གནང་བ་མི་ཉུང་བ་བཞུགས། དེ་དག་གོང་ཞུས་ལྟར་རུ་ལྷ་སྡེའི་འདོད་ཆོས་སྒྲུབ་པ་ལ་འབད་འབུངས་ཆེ་ཞིང་། ལྷག་དོན་དཔལ་འབྱོར་གྱིས་འཁོས་ཁ་ཞན་པའི་དུད་ཚང་དག་ལ་སྙིང་རྗེའི་ཆོས་སྦྱིན་ཞེས་རང་དྲོ་ཁུག་མ་དང་རང་རྟ་སྒ་བཟུང་གིས་ཅི་འདོད་བཞིན་སྒྲུབ་པས་རུ་སྡེ་ལ་ཕན་ཐོགས་བླ་ལྷག་ཏུ་ཆེ། སྨྲས་པ། ཕྱི་རུ་སྤྱོད་པ་རྣམ་དག་འདུལ་ཁྲིམས་གཙང་། །ནང་དུ་སྒྲུབ་པ་རྣམ་དག་རིམ་གཉིས་ཟབ། །ཁྱད་པར་བྱ་བ་རྣམ་དག་གཉིས་ཕན་ལམ། །སྒྲུབ་མཛད་ངུར་སྨྲིག་འཆང་བའི་སྡེ་འདི་རྨད།།
ལོ་རྒྱུས་འདི་གཅའ་དགེ་བཤེས་ལྷ་རམས་པ་ཀླུ་སྒྲུབ་བཟོད་པ་མཆོག་ནས་མཁོ་སྤྲོད་གནང་བྱུང་བ་བཞིན་བཀོད་པའོ། །༡༩༨༨ ལོ་ནས་ ༢༠༡༧ བར་དུ་ དགེ་བཤེས་ཀླུ་སྒྲུབ་བཟོད་པ་སོགས་སོག་པ་འཇམ་དབྱངས་ཁང་ཚན་དུ་སྒྲིག་ཞུགས་གནང་ཡོད།།