ཨ་མཆོག་མཚན་ཉིད་དགོན་གྱི་སྒྲུབ་སྡེ་སྐྱ་འགོ་དགོན་ནི། ཁྱོམ་ཚ་བླ་མ་འཇིགས་མེད་ཚུལ་ཁྲིམས་ཀྱིས་མཎྜལ་ཀླད་ཟེར་བར་བཏབ། སྐྱབས་མགོན་མཆོག་གིས་བཀྲ་ཤིས་རྒྱལ་ཞེས་མཚན་བཏགས། བཀྲ་ཤིས་འཁྱིལ་དུ་གྲྭ་སར་ཞུགས་ཏེ་འདོན་རྟ་དབྱངས་སོགས་གང་ཆ་ནས་མ་ཚང་བ་མེད་པ་འདི་བླ་བྲང་གི་འཆམ་གསར་འཛུགས་དུས་སུ་ཆོས་རྒྱལ་གྱི་འབག་འཆམ་པ་ཡིན། དེའི་སྤྲུལ་སྐུ་ཨ་མཆོག་མགོན་པོ་རྒྱལ་གྱི་སྲས་དམུ་དགེར་བཞུགས། འདི་དང་བོ་འདེབས་དུས་ལྡིང་ཁོག་གནམ་དགེ་ཟེར་བའི་ས་ནོར་བས་ཡུན་རིང་མ་བཞུགས། ཕྱིས་སུ་འབྲས་རྩེ་ཕྱོགས་སུ་སྤོས་པའི་སྐྱ་འགོའི་དགོན་ཟེར། བཀྲ་ཤིས་འཁྱིལ་གྱི་གྲྭ་ཚང་དབུ་མཛད་ཁྱོམ་ཚ་ལྷུན་གྲུབ་སོགས་ཀྱི་སྐུས་རིམ་པར་བསྐྱངས། བཤད་སྒྲུབ་ཀྱི་བསྟན་པ་ཆེས་ཆེར་སྤེལ་ཅིང་སྐུ་གསུང་ཐུགས་རྟེན་སོགས་མཐའ་ཀླས་པ་བཞེངས་ཏེ་ཨ་མཆོག་གི་གྲྭ་སར་བཞུགས་པའི་ཁང་དམར་ཁྱོམ་ཚ་དང་སྐྱ་འགོའི་ཁྱོམ་ཚ་སྐུ་རྒྱུད་གཅིག་ཡིན། ཁང་དམར་ཁྱོམ་ཚ་ཚ་ཁོར་གཏོགས། གྲྭ་པ་བཅུ་ཕྲག་ལྔ་ལྷག་ཡོད་དོ། །