༄༅།།ན་མོ་གུ་རུ་ཨཱ་ཡུ་རྫྙཱ་ན་ཨ་པ་རི་མི་ཏ་ཡེ། བཅོན་ལྡན་འདས་མགོན་པོ་ཚེ་དཔག་མེད་ལ་བརྟེན་ནས་ཚེའི་རིག་འཛིན་བསྒྲུབ་པར་འདོད་པས། ཐོ་རངས་སྐྱབས་འགྲོ་སེམས་བསྐྱེད་ཚད་མེད་བཞི་བསྒོམ་པ་སྔོན་དུ་བཏང་ལ། རང་གི་སྤྱི་བོར་རྨ་བྱས་བཏེགས་པའི་ཁྲིར། །
པད་ཟླའི་གདན་ལ་བླ་མ་ཚེ་མཐའ་ཡས། །ཞལ་གཅིག་ཕྱག་གཉིས་མཉམ་གཞག་ཚེ་བུམ་བསྣམས། །རབ་དམར་མཚན་དཔེའི་གཟི་བྱིན་སྟོང་འབར་པ། །རྒྱན་ཆས་ཡོངས་རྫོགས་ས་བོན་འོད་ཟེར་གྱིས། །ཡེ་ཤེས་སྤྱན་དྲངས་གཉིས་མེད་ཐིམ་པར་གྱུར། །ཡན་ལག་བདུན་པ་མཎྜལ་བཅས་ཕུལ།རྣམ་འདྲེན་རྒྱལ་ཀུན་སོར་རྟོགས་ཡེ་ཤེས་ཉིད། །བཞིན་ལེགས་མཚན་དཔེའི་དཔྱིད་དུ་ཡོངས་སྨིན་པ། །ཉི་འོད་འཐུང་པའི་བད་རག་ལྷུན་པོ་བཞིན། །རབ་མཛེས་ཚེ་མཐའ་ཡས་པས་དགེ་ལེགས་སྩོལ། །ཕྱི་ནང་རྐྱེན་གྱིས་ཚེ་སྲོག་ཡར་དང་འཁྱམས། །ཉམས་དང་ཟད་སོགས་མི་འདོད་རྐྱེན་ངན་དང་། །དུས་མན་འཆི་བདག་བདུད་སྡེའི་དཔུང་ཚོགས་རྣམས། །དམིགས་མེད་ཆོས་ཀྱི་དབྱིངས་སུ་ཞི་བར་མཛོད། །འབྱུང་བའི་ཚེ་བཅུད་བཀྲག་མདངས་གཟི་བརྗིད་དང་། །བསོད་ནམས་མངའ་ཐང་སྲིད་ཞིའི་ཡོན་ཏན་ཀུན། །བདག་ཡིད་ཁྱེའུ་ཆུང་དགའ་བའི་མཛའ་གྲོགས་སུ། །ཉེར་ཐོབ་རིག་འཛིན་ཚེ་ཡི་དཔལ་སྩོལ་ཅིག །ལམ་སྟོན་བཤེས་དང་ནམ་ཡང་མི་འབྲལ་ཞིང་། །ཡང་དག་ལམ་གྱི་བགྲོད་པ་མཐར་ཕྱིན་ནས། །ཚེ་དཔག་མེད་པའི་གོ་འཕང་མྱུར་ཐོབ་སྟེ། །བགྲང་ཡས་བགྲོ་བ་སྲིད་མཚོ་ལས་སྒྲོལ་ཤོག །དེ་ལྟར་གདུང་ཤུགས་དྲག་པོས་གསོལ་བཏབ་པས། །ཐུགས་ཀ་ནས་འཕྲོས་འོད་ཟེར་ལྕགས་ཀྱུ་ཡིས། །ཚེ་བཅུད་དཔལ་ཡང་བརྟན་གཡོའི་ལེགས་ཚོགས་ཀུན། །འོད་ཀྱི་རྣམ་པར་རང་ལ་ཐིམ་པར་གྱུར།བར་བསམ་ལ།ནམ་མཁའ་ལ་མིག་གིས་བསྟས་ཏེ་དབུགས་ནུབ་པས་མདུན་གྱི་ནམ་མཁའི་ཁམས་ཀྱི་ལྷའི་གཞལ་ཡས་ཁང་རྒྱུ་སྐར་སོགས་རྟེན་དང་བརྟེན་པར་བཅས་པ་དང་།ནམ་མཁའི་བཅུད་ཐམས་ཅད་བདུད་རྩི་སྔོན་པོའི་རྣམ་པར་བྱུང་།མཆིལ་མ་སྒྲ་མེད་གཅིག་མིད་པ་དང་མཉམ་དུ་རང་གི་ཁ་ནས་ཞུགས།ལུས་ཀྱི་ནང་ཐམས་ཅད་སྔོ་འཁྱིལ་གྱིས་གནས་བར་བསམ་ལ་དབུགས་ཅུང་ཟད་ནང་དུ་འཛིན་ནས། །རླུང་ཤུགས་དལ་བུས་ཕྱིར་གཏོང་བ་སོགས་ལན་ཁ་ཡང་བྱས་པས།སྒགས་པ་བྱུང་ན་འཆི་བ་ལོ་གསུམ་དུ་བཟློག་ངེས་པའི་རྟགས་སུ་གསུངས།མཇུག་ཏུ་གཟུངས་རིང་དང་སྙིང་པོ་ཅི་ནུས་བཟླས་མཐར་ཚེ་དཔག་མེད་འོད་དུ་ཞུ་ནས་རང་ལ་ཐིམ་པས་རང་ཚེ་དཔག་མེད་དུ་གྱུར་པར་མོས་ལ་བསྔོ་སྨོན་གྱིས་རྒྱས་གདབ་པར་བྱའོ། །དེ་ལྟར་ཚེའི་དངོས་གྲུབ་བསྒྲུབ་པའི་མན་ངག་ཁྱད་པར་ཅན་ནམ་མཁའ་ཟས་སུ་ཟ་བའི་གདམས་པ་ཉམས་སུ་ལེན་ཚུལ་འདི་ནི་ལྔ་རིག་སྨྲ་བ་བླ་མ་ཐོགས་མེད་རྒྱལ་མཚན་གྱིས་ལྷ་རྫས་བཅས་བསྐུལ་བའི་འདོད་མོས་ལྟར། ༸དབྱངས་ཅན་བཞད་པས་བྲིས་པ་ཛ་ཡནྟུ།།   །།པར་འདི་ཆོས་སྡེ་ཆེན་པོ་དཔལ་ལྡན་སྨྲ་བའི་སེང་གེའི་གླིང་དུ་བཞུགས།།